KANTHOUNA 7
7
Yuitang Thukkur
1Heirouri Umpune Noahnung shun, “Nangle heirou neiyei nuwa-chawa raple kalhonni mali rilla wachanglaka; angtuei tlaipang chaan arou tharmu chimri Keiyei mit'thrilnarou neitamtomngeiya. 2Nangle kalhonni khying yaalim-yoolim rapya pa khatle pui khatsol loubini urlhaklaka; heitoubi hyingmak yaalim-yoolim deideikhi pa khatle pui khat loubini pu khatsolkhi urlhaklaka. 3Heitoubi nungthourei traicha waalim rapkhi pu'eni, pa khatle pui khatsolkhi urlhakbi, heirou tlaipang dourouei yaya himaangyer'maknungei khoupilaka. 4Koungameiyo toulanungri, tlaini eniyei rilla tlaipangpalra masa-nunghang somlinibil Keine nung royerrouwa; heitoubi Keiyei sheemthutkur lhawaipal chiwi lim namyerwaya tlaipang'rouwei Keine maangyerrouwa.” 5Heirouri Noah'ne Umpuei shunpikur tloulhangrap hilthungni lhou namma toukur.
6Tlaipangpalra yuitang thukyeinung Noahri ai'mshaei kum machathruk tlungura. 7#Mt 24.38; Lk 17.27. Heirou Noah'ne aiyei chanao raple, aiyei nule heirou aiyei chawa rapbei nu raple pulni mali rilla wachangurbi, yuitang'rouwei kartleikur. 8Heisitoubi Dunpune Noahnung shunkur heinakrimni, khying yaalim-yoolim rapkhi, hyingmak yaalim-yoolim rapkhi, heirou nungthourei traicha waalim, heirou thleira ukni tulchabi klei frul'lim rapkhi; 9pa khatle pui khat toubine khintamsol loubini mali rilla wachangyerkur. 10Heitoubi tlaini eniyei hillouri tlaipangpalra yuitang thukkurbi dumphopkur.
11Heirou Noahyei chaan kum macha'thruk tlungkurle, khintam tlung tanglayei tlaini chiple'eninirou waiyoubini, samadru namyerrei tuyna putthutdura, heirou tuywok fyoubi, heirou Thangwanrei tuylamkhi phatdurla. 12Heitoubi tlaipangpalra nunghang somlini, heirou masa somlinibil nung rokur. 13Tlaini heihakrou Noah'ne aiyei chanaorap Shem, Ham heirou Japhethle, heirou aiyei nu, heirou aiyei chawa rapbei nu raple kalhonni mali rilla wachangkur. 14Heirou yakou kalhonni ramrei yaalim-yoolim kantang, heirou ui-waa limlim, heirou thleira ukni tulchabi klei frul limkantang, heirou cheemrei ui-waa lim kantangreikhi malira tungkur. 15Heirou Noah'le kalhonni lhawaipal chiwirap yaalim-yoolim kantangei khintamtam pu shabini mali rilla wachangkur. 16Heirou mali rilla wachangkur heirapri, yaalim-yoolim kantangei pa khatle pui khatsol pu shabini Dunpuei shunpikur hilthungni wachangkur; heitoubi Umpune aya thungphopkur.
17Heirouri tlaini somlinibil nung haamkurkhi naimakni rowurbi, tlaipangpalra yuitangni thrit'thrit katduilhakura, heitoubi malikhi trailouheibi thlei'rouwei chouni marlhaoloukur. 18Heirouri yuitangni tlaipangpal karyouwurbi, yuitang katduilhakkur, heirou malikhi yuidoura marlhaochakur. 19Heirouri yui heini tangachaknei ngamrou, tlaipang dourei klei Lhunglim chouna kounakkhi yuini omdumwurchila. 20Yuitang heini tlaipangpallei Lhunglimrap namma thong'yeng chiple phanga khyumni omdumwurbi yuini huphopburla. 21Heirouri tlaipangpalra kanchekchabi klei lhawaipal chiwirap namma, ui-waa'rap, ram-yaa'rap, frullim, heirou tlaipang thimi rapkhi namma hiwurchiya. 22Heitoubi thlei taarnarei klei lhawaipal chiwirap nammakhi hiwurchiya. 23Heisitoubi Ane tlaipangpallei ringbi klei tlaipang thimirap, ui-waa ram-yaa'rap heirou ukni tulchabi klei chiwirap nammakhi heirou nungthourei traichabi klei ramwaarap nammakhi hiyerwurbini tlaipangrouei mangyerkur. Heirou Noahle akou kalhonbi mali rilla wachangthungkur heirapyatom ringyerkur. 24Heirou yuitang heiri tlaipangpalra tlaini machale somngabil kanthritmakni omdumbini leikur.
Currently Selected:
KANTHOUNA 7: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.