KANTHOUNA 6
6
Tlaipang Thimiyei Lhangaimak
1Heirou tlaipang thimi rapbei mshing katduibi tlaipangpal karyoukur heirouri, tlaipang thimiyei chanapuiya rapkhi chungni pukkurla. 2Heitoubi Dunpuei chanapawa rapne tlaipang thimiyei chanapuiya rapbei shakrung lhangaiya mulhakbi, heirou yani ai'aiyei maduya khalbini nu'nungei lourilkur. 3Heirouri Dunpune kyun, “Keiyei Lhawairi tlaipang thimiyei rilla klui naimakni leiyermarou; ngamri a heiri khi-kya sharung khoi; heirou ari kum machale somni ringrou.” 4#Msh 13.33. Bongei chaanrouei tlaipang thimi tangrap (yarap heiyari Nephilim toubine mu'kna) chungni loupaalkhou; heitoubi Dunpuei chanapawa rapne tlaipang thimiyei chanapuiya raple lourilkhoubi, heitoubi yani chanao pukkhou; heirou yaiyei chanaorap heiri tlaipang heichaanyei Lhouwarap heirou mincha thimirap khoini paalkhou.
5Heirouri tlaipang thimi rapbei ukningra lhangaimakni thimmura, heirou yani borhyei lhouya kalleng-kallengni touwurlame touri Umpune muwurla. 6Umpune tlaipang doura kouya tounanungei thimiya sheemthutkurawo toubine Aiyei malung-thrammakura; heitoubi heini Aiyei Lhawai lahyerkur. 7Heitounei Umpune kyun, “Keine thleirei sheemthutkur tlaipang thimile kalhonni, thimi'roueini ramrei yoo-waa, frul limkhi heirou nungthourei traicha ramwaa lim rapkhi maangyerrouwa, ngamri Keine yaya sheemthutkuri Keilhawai lahyerwurla.” 8Heiya Noahri Umpuei mit'thrilnara malung'khrahkna thimi khat khoini leikhou.
Noahyei Mali
9Noahyei yu-cha rapbei chaanlamri asitoubi leilei: Noahri tharmu chim thimi khat hoikhou; aiyei chaanrou marmok touri koukhatkhi mak; heirou aiyei chaan khatrek ani Dunpule kalhonni chakhou. 10Heirou Noahyei chanapawa napung'khyum pukkhou; yarap heiri Shem, Ham heirou Japheth.
11Heichaan heirouri tlaipangpal heiri Dunpuei mit'thrilnara borhni marmokkura, heitoubi hatkril-khribkrilni bil thimmura. 12Heirou Dunpune thiyeinungri tlaipangpalri lhangaimakura, heirou thimi rapnekhi ai'aiyei sharungei kningyatom toubine borhyerwurla. 13Heirou Dunpune Noahnung shun, “Tlaipang thimirap namyerya Keine maangyerrouwa; ngamri tlaipangpal awari yaingamrou borhni heirou hatkril'khribkrillei lhou rapne bil thimmura. Heingammei thilak, Keine yayari tlaipangrei maangyerrouwa. 14Heineri nangni Gopher heengei Mali khat salaka, heitoubi Mali heiyei rilla bomtho chungni khaithutbi naiyerlak, heitoubi heiyei rillakhi heirou purakhi khenaini teifnallak. 15Asitoubi nangni mali sananungei manringrou da: Mali heiyei dungra thong-yeng macha-khyum shaangyerlak, heirou heiyei homrani thong-yeng somnga, heirou mlamrani thong-yeng somthum chouni sabaanglak. 16Heitoubi maliyei dourani bungkhum makhuplak, heirou mnakrei raaprani thong-yeng khat chouduiyerlak; heitoubi mnakra cheemkhar'tang khat touputlak; heirou maliyei rillani bomtho thak-dak thaak-khyum thukni salak. 17Kouweiyo toulanungri, thilak, Keine tlaipangpal karyouni yuitangni omdumyerouwa; heitoubi Keine thleidourei ringbi klei chiwirap nammaya himaangyerrouwa. 18Heiya Keine nangkou tlou kantomril khat khourou; heirou nangni mali rilla wachangbi, nangle, neiyei chanao raple, neinule heirou neichawa rapbei nu raple mali rilla wachangchilaka. 19Heitoubi lhawaipal chiwi kantangei puile pa pu khatsolkhi nangle kalhonni himaknanungei mali rilla urlhaklak. 20Heirou ramwaa rapkhi limlimyei pu khatsol, ramyaa limlimyei pu khatsolkhi, heirou thleira ukni tulchabi klei frul limlimyei pu khatsolkhi himaknanungei nangle kalhonni mali rilla urlhaklak. 21Heitoubi nangni chamainungei murchakkhi limlim marpeilhaklak; heini nanungeile heirou yoo-waa rapnungeikhi chamainungei murchak hoinarou.” 22Heisitoubi Noah'ne Dunpuei chay pikur hilthungni namma marshiklhakkur.
Currently Selected:
KANTHOUNA 6: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.