ROMIYA 8
8
Ringchang Muihla
1Khrista Jisu hitta am ha sa ngei taranga atun chu neinunt non rang am ni jo weh. 2Muihla tieng nga rou phungna ring changta Khrista Jisu hitta am ha rang ruiphao pi so hana pak athi kum sunga hai thou wa keita hla pi so. 3Rouphun na ae pi nea no ae rouram chu malmashi ring changna sul jarra asanao pa ta malmashi ringchang tul shukpi weta hajong pak ha hourang sarukka malmashi mel hekta hlapi. 4Chuna pum nutienga thingno lutta muihla nutieng jui anita rouphun hana rilha tung ranga ae. 5Malmashi pum ringchanga ringa am ngeina hata pum taranga hallea chuti weta muihla nutieng jui ngei na muihla na adit ha ae. 6Pum anu juija ringa am mani hina atreem na chu athi ha ae, hana muihla nu jui ja am na atreem na chu aring akha chu adai pha ae. 7Chuna malmashi ringchang tulpa na nea ah ringa am lea chu amoha Chungthieng ta jiekna mee ae rouram chu amona Chungthieng rou ril jui no wa ae hana jui kom jui ang no ae. 8Malmashi ringchang tul juija am mee ngei na Chungthieng ta lungshi nea ang no ae.
9Chuna nangei ringchang tulla ringno oh, hana hutta muihla na ril lam ma ringo. Ejongpa routakka Chungthieng muihla na nakolla am lea chu, hana atujong ngei na Khrista hina muihla amno wa ringa am lea chu amo ha chu makolla Khrista mee no ae. 10Chuti weta Khrista nakolla ringa am lea chu, muihla na nangta ringchang pe ange. Rouram chu nanghi Chungthieng am na ah thiengpi sa ae. Napum na pak sarukka thi su hal kom. 11Jisu Khrista ta thi hai ringa thou pi Chungthieng muihla na nakolla ringa am lea chu athi hai ringa thou Khrista amona nang ngei pum hita ringchang pe ange nangei sunga am ma muihla ha na jarra.
12Chuna uleh nao ngei oh, anina ae ang akha chu am meh ha chu ani ringchang tulla adit hana anina ring no tah so ae. 13Rouram chu ejonga nangna naring chang tanna ringa am lea chu athi pha ange. Chuti weta muihla na nakolla ring lea chu pak luna tullu ah thi pi hal kom nangna aring pha ange ae. 14Chungthieng muihla na lamkai ah rol ngei ha Chungthieng sanao ngei ae. 15Chungthieng pek muihla na nakolla ephao wa meeshuk meekor changpi ang no ae hana ati pi ang no ae hana hutta muihla na nangta Chungthieng sanao ngei changpi ange hana muihla jaitha na Chungthieng am na anina “Apa! Kapa!” kokkange. 16Chungthieng muihla mak na ani muihla ah tolveta ani hi Chungthieng sanao ngei aeta phu shukkae. 17Ani na masnaongei chang sou chu mamee ngei taranga mashi jaihra ha ani kom pha tol ta so ae akha chu Khrista taranga Chungthieng na mashi ha kom pha ange; rouram chu ejongpa anina Khrista hina aol saruk ja tol lea chu anina mahung majai ha pha ha ange.
Anutienga Ahung Ajai
18Keina hallinge atun apha hina aol ana lim hi anutienga ani ta mapek kang mahung majai hitta anhlak ngai an no ae. 19Makutta mashem limna Chungthieng masanao pa ta mari pi ang ha hakjou no wa hakka am meh. 20Rouram chu makutsem makhai na ephao kaneno wa am hi mani ae no ae nahi Chungthieng ahalhana ae shukpi sa ae, chu phao sunga asa chu am songe. 21Chuna nahi chu makutsem lim na amang hana shuk changa am halkom hla pi ange. hana juija chu Chungthieng sanao ngei na pha mahung majai ha pha tollange. 22Atun apha hina anina na dangpha chu makutsem lim na ana kou ah am meh, unga don ang tieng hekta. 23Chuti weta nahi makutsem ngei chak na ana kou no ae Chungthieng na masha ah pek muihla ani sunga ana kou ah am ae, anina Chungthieng masanao pa chang ranga hakkae akha chu ani pum lim hi hitta sanpi ranga. 24Chuna ani na lungrang hina sarukka anita sanpi so ae; chuti weta ani ri hata lungrang alea chu naha adiek lungrang no weh maram chu atujong na ejong mari hatta lungrang ae ah am meh? 25Chuna ejongpa anina ri no hata lungrang ae chu anina dong thei ah hakka am meh.
26Chuna chu hekta anina sulla am lei ah athieng muihla na jungveta sanpi ae, rouram chu anina alota ni ang meh ti phao dang no ae. Hana muihla mak na Chungthieng kolla ani ril nea no rou ha rilla pi ae. 27Hana ani lung ta ri pi ah am Chungthieng na muihla hana ejongpa mahalla am ha dange. Rouram chu muihla na mamee ngei hutta Chungthieng kolla mahal nu juija nipi ae.
28Anina dangpha ae Chungthieng na amo ta lungshi ngeita ti chu, mahal anu juija kokpi ngei hata ahrat ranga tullu lim ae ha pi ae. 29Chungthieng na masha ah ahalsha ngei hatta masanao pa hek ti pi so ae. Chuna asanao pa hana ulenao ngei lim karra masha pa ae. 30Hana Chungthieng na adanga halla shi ngei ta kom amona makok ngeita amo hekta athieng changpi ae akha chu amona mani hitta mahung majai ha pha ha pi ae.
Chungthieng Na Khrista Jisu Ta Lungshit
31Hilim nahina sarukka anina alota ril leisha? Ejongpa Chungthieng hi ani ta lea atu na anita e ae nea ang meh? 32Amona masanaopa ta kolla shi no ae. Chuti weta amona anitaranga pe ae. Amo na eheilimpa anita pe ang no meh? 33Chungthieng ahal sha ngeita atuna e ae nea ang meh? Hana Chungthieng na thieng pi sha ngeita kom! 34Atuna manita neinunt pe anga meh? Thi weta ringa thou Khrista Jisu na Chungthieng ban changtienga am weta anitarang rou ril pi ah am ha. 35Atuna Khrista hina lungshit hai thouwa hran pi nea ang meh anita? Aol ana,butang jutang anoleh pun nie sal hana mo, anoleh champ seina mo ae. 36Jieksha rouna hita rillea:
“Nangei sarukka kanina apha chang honna
thi ang eja pha unge,
kanita athat tanga ruija
wak kelmo hekta lah so ae.” 37Anita malungshit jarra nalimpa hi kanina ral nea ah shu songe. 38Chuna sarukka keina kahal chu ejong akha phao na hija malungshit hai thou wa hran hlak pi nea ang no ae. Athi na kom ringchang nakom, wanruina kom ah noleh thangwan na ane angam na kom atun na akha chu anutienga kom. 39Anoleh simlei achungtieng na kom anoleh simlei athui tieng na kom makutsem ejong akha na ani arengpu Khrista Jisu majar hana Chungthieng na lungshit hi ahran nea rang jaitha am no ae.
Currently Selected:
ROMIYA 8: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
