RUIHNGEI TULLU 21
21
Jerushalem Ma Pol Thing Na
1Kani na manit heraphur ah am jou de ril shu takka Kos ram tieng nga kung thouwa thing nga hana hu war ra chu Rhodes tung songe. Hana hai thou wa Patara ah thing songe. 2Hana kung chunga Phoenisiya tung rang nga kani na kung thou wa thing song nge. 3Kani na amunt hana thouwa Cyrus ri pha ah, akha chu natak Syria am na thinga Tyre turel ralla kung na choi pot lim hla so ae. 4Hana kani na ngoiring ngei ahre tuk hlakka mani hitta hapta akha am ha unge Muihla athieng hina jarra mani na Pol ta Jerushalem ma thing no rang rou rillea. 5Chutiweta mani hitta am ha apha shu jui ja chu, manita houphurra kani lam ma thing rang ae shonge hana mani namei sanao akha chu unga manilim na rachunna hupi hai thou wa turel aral phao kani hitta thingha ah amunt hana huk hrun na nie ha unge. 6Hana kani akha lea akha riemtuk pehlakka mani inn na lea ah kani na kom kung chunga thing shonge.
7Kani na Tyre haithou Ptolemais phao tuichung lam ma kung thou wa amunt hana ngoiringei hitta rungnie naha solha ah ariem pi ae. 8Hana mathangpa rungnie ah mani ta houphurra Kaisariya ah tung songe amunt hana Jerushalem ma ahalsha sari shunga rouril Philip inn na sol ha pha unge. 9Amo chu asanaonu taichang lou roumaphu inly am meh. 10Rungnie ahre kani na am shu waitakka, Juhudiah hai thou wa rouphu Agabus jung nga. 11Kani am na wa weta amo na Pol konghit la ah akha chu akae makut ren ah ril, muihla athieng na hita ril, “Na konghit mitpu hi Jerushalem ma am Jehudi ngeina konghit hina hup ang nge, akha chu mani na adang jat ngei kolla pea ang nge.”
12Rou hi kani na theipha juija, adang ahre hitta kanina Pol kolla Jerushalem ma thing no rang makolla hlem shonge. 13Chutiweta amo na sang, “Ejerang nga hata rilla akha chu kalung ta olpi ah chau mo weh? Kei chu Jerushalem ma huppa shi chakno wa arengpu Jisu tarang nga Jerushalem ma athi ang phao ati nong nge.”
14Amo ta kani na hlem nea no wa, kani na makolla nahal ha ae jou oh ta ril songe, “Hana arengpu na ahal chang shu oh.”
15Amunt hana apha atante am shu takka kani ron nang pot lim semsha ah manita houphur ah Jerushalem ma thing shonge. 16Kaisariya hai thou wa rui ahre kom kani hitta thing ha ah. Cyprus ah Mnason hitta kani tung ha ang inn tolla kani ta rui ah thing nge amo ha chu ama tieng hai thou wa ngoiring nga am mee sha ae.
Pol Na Jacob Am Na Veng
17Jerushalem ma kani tung nga ngoiring nga am ngei na kani ta ariem ma tuk shukkae. 18Hana hu warra Pol na kani hitta Jacob rilhlak ranga thinga abom shunga ulien changei kom am tol ae. 19Pol na manita ariem ma riemtuk pe ah Chungtheing na jat adangei karra alota machung nga tullu lu mo tina rou hi ripta ril sho. 20Makol hai thou rouhi thei shu takka mani na Chungthieng ta domma mani na ril, “Uleanao Pol oh, nang na ripha ang che ae Jihudi lishing eja na ngoiring nga am hi, akha chu alo ta mahai mani na roukung hata ngoiring moti. 21Mani na hitta rillea, ha chu nangna jat adang ngei am na am Jihudi ngei ta Moses hina talit tamang roukung juino wa unga makhai ha ashar tan no hal kom ngai ae ta mani ta ril ae ti ae. 22Ani na alo ta ae ei meh? mani na nang hi phao so ae ti hi thei sho ae. 23Kani na nakolla ae ki num chu. Saro eisha spa inly kani hitta am ha ae. 24Spa ngei hi rui ah mani dramo anujuija thiengpi na hlou alut sum nang na pe oh, chu lea chu mani lu sham tanna hou wange. Hana chu meelim na narou ha adiek no ae ta dang ang nge, ha chak no wa nang hi Moses roukung hina ril juija am mehta dang shu oh. 25Khrista ngoiring jat adang ngeita chu kani na mani kolla jiekka hla ung nge ha chu kutta sem hlawang kolla bu don an don akha chu ahongrui hitta thi asha ano lea athi bakno oh hachakno wa vokno hrano tullu hai thou wa aram laa oh am mo ta ril song nge.”
26Chuna pa chu Pol mathangpa rungnie ah manita rui ah athieng pi na tullu ha ae rang sha rukka mani hitta thing ha so. Hana amo na mokna inn na lut weta ejongpa rungnie ah hijongpa thiengpi na hi tem mang mo akha chu mani lim changhonna ae ang mo tina rou hi dangpi thing so.
Pol Ta Mant Na
27Rungnie sari hi shu ang nga wak jaija Asia ram tieng hai thou wa Jihudi ahre na Pol ta mokna inn shung nga ri pha so. Mani na wairul riha ta julla hla ah Pol ta mant so. 28Mani na ril, “Israel mee ngei oh!” “Sanpi oh! Spa hi ae amunt chang honna amo na thing thing weta ani Israel ta anda ah rolla akha chu Moses roukung ta ngei num no wa rol ae, Hana chakno wa ani athieng mokna inn na phao jat adang ngei ta rui ah lutta mut pi ae!” 29(Mani na rouril hi chu Ephesiya ah Trophimus hi Pol hitta hupi ah mani na ri sharukka Pol na mokna inn na rui oh luttang nge ta halla ae.) 30Hupi shung nga am meelim na halla shuk no wa spa ngei na rachun na Pol ta phitta rei ah mokna inn hai thou wa kaiya shuk so ae hana mokna inhar lim thing hap so. 31Hana meelim na Pol ta that tukkae ta ae ah rou lim hi Rom lamkaipu kolla mani hla juija Jerushalem ma am lim hi hamne ni jo weh. 32Apha hana makka lamkaipu na offisar akha chu ralmee ahre hitta amunt hana harra phoa so ae. Mee ngei na amo akha ralmee ngei ta ri juija Pol ta mani phit chan so ae. 33Lamkaipu na Pol am na wa ah amant rang rou rilla akha chu thirling takka jem rang nga ril so. Hana amo na sai, “Spa hi atu meh akha chu amo na ejongpa tullu lu ah meh?” 34Ahre akha na akha ril hana adang ahre akha na adang nga ril ti pa chu lamkaipu ha elo wa na hi shukka am mo ae tina hrabakta dang nea ni jo weh, chuna pa chu mamee ngei ta Pol hi ma am na inn na rui rang nga rou pe sho ae. 35Mani na ma am na rui ah lutta Pol ta ralmee ngei na nam ma rui ah shuk so ae, rouram chu hana am mee ngei hi ramsha hek ti hap so ae. 36Manutieng mani na jui ja wa ah rang nga au ae, “Amota that oh!”
Pol Na Matak Tarang Rouril
37Ralmee ngei na Pol ta maralpal am na rui ang ae lei ah, amo na lam kaipu kolla ril, “Nakolla kei na ejongpa rou te rilla ngei ang meh?”
“Grik trong naril chu nang trong nea ah che?” lamkaipu na ril. 38“Halea chu nang hi Egypt sanao, apha akha ah spa lasing inly homma ramrukka ral bom thou mee ha nang no ae nu?”
39Pol na sang, “Kei hi Jihudi sanao inge, Cilicia Tarsus ah don mee inge hajong maruol hupi sanao inge, chuna lungshi ngei ah meelim kolla rou ahre te ril tikkae.”
40Chuna lamkaipu na amota angai pe so ae. Chuna pa chu Pol na aban dokka shukka meelim ta dai ah am rang rou ril. Meelim na dai ah am thou juija Pol na mani ta Ebriya trong nga ril.
Currently Selected:
RUIHNGEI TULLU 21: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
