RUIHNGEI TULLU 20
20
Mesedoniya Lea Greece/Akaiya Ah
1Aou hlakka am ha dai juija chu Pol na ngoiring lim ta kokka bomtul pi ah thanum thathou pi ah mani kol hai thou wa thing so. 2Amo na ram hatieng nga thing nga mee ngei kolla rou rilla thanum thathou pi phur ah. Amo na Akaiya ah thing so. 3Amunt hana hlathum am ma, Jihudi ngei na amo ta aru han ta mant rang sem sha dang pa chu Syria lalla thing weta Mesedoniya ah lea ang sang nge ta alung ngir so ae. 4Berea ah Pyrrhus sanao Sopater kom amo hitta thing ha ae; hana Thesolonikiya ah Aristarchus lea Secundus, Derbe ah Gaius, hana Asia ram shung nga Tychicus lea Traphimus akha chu Timothi. 5Mani na masha ah thing hak weta Troas ram ma kani ta hakka am meh. 6Kani na chol tol no badol reen shu weta Philipi hai thou wa kung nga phao ung nge. Hana rungnie ranga takka Troas ram tuk hlakka amunt hana hapta jong pa am phur ung nge.
Troas Ah Pol Atreem Na Veng
7Thangsha nitakka kani lim pa bomtul ha ah bu bakha unge. Hana Pol na mani ta yanyai phao rourilla am meh, rouram chu amo hi atuk huwarra chu thing ang ti pa chu. 8Hana kani am na chungtieng ka shung nga sarmei atam hlanna ong ung nge amunt hana ae kani bomtul na ha. 9Eutychus ti rungthar sanao akha na innharte ah unga am meh, hana Pol na hata rourilla am ma amo hi leima inn num ma mui shukka thinga atreem na chu amo hi hra bakta enn so ae. Hana inthum shu na pa akang hai thou wa amo na alei chung phao matulla chu, kani na sar junga chu amo hi thi so ae. 10Hana Pol na kom tum ma jung weta amota aban na kolla shi weta ril, “Nangei na ol no oh,” “Amo hi ring song nge!” 11Hana amo na innkang chunga kalla budol samma bakso. Apha sotta amo na mani kolla rourilla semni shuk phao trenga Pol na tah manita hou phurra thing so ae. 12Mani na rungthar sanao hata ma inn na aringa rui ah thinga mani lim ha ariem tul shukkae.
Troas Heithou Miletus Phao
13Kani na maitienga hata kung thou wa thinga Assos pha ah. Amunt hana kani na Pol ta tung pi num ma ae. Na hi amo na kanita rilla hou ae rouram chu hana thou wa chu amo hi akae ah thing ang so weh. 14Kani na Assos ah amo ta tukhlak juija kani na amota rui ah Mitylene tieng nga thing so. 15Kani na hata kung thou wa Khios ramma mathangpa rungnie ah tung so ae. Hana rungnie waitakka chu Samos lalla thinga Miletus ram tung so ae. 16Pol na alung ngir sho weh ha chu Ephesiya hi lal ah theng rang. Asia ram shung hina apha hi mang nu no ah. Rouram chu Amo hi ngeilea chu Penticost ni ah Jerushalem ma tung nun jarra.
Ephesiya Ulien Ngei Kolla Pol Atreem Na Rou Ril
17Miletus hai thou wa Pol na Ephesiya ulien changei ta amo hitta tukhlak rang nga rou rilla hla ae. 18Mani na tung jui ja amo na manita ril, “Nangei na dang ange, Asia ram shunga ahalpa rungnie katung hai thou wa keina alo ta nangei hitta am ha mo ti ha. 19Arengpu hina kor akha chang nga Jihudi ngei na keita hrano eja shilla waklei ah keina alota mittui tulla mani thui donga ka-ngam ae mo. 20Nangei na dang ange keina ephao wa atal am no lutta nangei kolla rourillinge, hana inn, inn changhon na akha chu mee abom, abom am na oh, chupi takpi inge nangei ta hella san rang nga. 21Keina Jihudi akha chu jat adang ngei ta kom riemtuk hit munt ha ah pak ngan hai thou wa lea weta Chungthieng akha chu Rang Jisu ta ngoiring ranga rourillinge. 22Chuna atun chu muihla athieng na ril nu juija kei na ejongpa shukkang mo dang no hal Jerushalem ma thing ang singe. 23Keina kadang akha te chak chu am meh, ha chu hupi changhon na Muihla athieng na kuita dangpi ae raen inn shung nga am ti lea aol ana hina keita hakka am meh. 24Chutihal kom karing chang tarang nga chu keina ephao wa hal nange, ejonga Arengpu Jisu no keita pek hlou hi chak shu lea chu nu ta hallinge na hlao ha chu Chungthieng hina lungshit ahra trongsan ha meelimta dangpi ha ae.
25Kei na nangei lim am na thing shu sange, Chungthieng rengram rourilla. Chuna atun chu nangei atu akha na woiha lea ah keita ri pha ang ni jo chau ae. 26Chuna ehekta ahoi awoni rungnie hina nangei kolla thieng nga dangpi inge. ejong atu jong akha na mang lea chu, na ha kasharuk ni jo weh. 27Rouram chu kei na Chungtheing marouril rang hi katalna ephao am nonge. 28Chuna nangei takna takta hrabak ta an na am mo, hana muihla athieng na nangei sanao ngei hi Chungtheing na mathi makka leisha sanao ngei ta hakka rung-ngo kelmopu hekta. 29Kei na dang inge, nangei ta kahou phur takka hrano na ramui changa mangei am na phao hulkom amo na nangei abom ta ru wa thing nea ang no ae. 30Nangei shunga apha akha ah chu amur thui ja ngoiring ngei ta adang nga rui ah thing ang apha phao ang nge. 31Chuna mak no oh de soun jan nei no wa kumthum kamittui atam tulla nangei ta kachupi katakpi ha.
32“Atun chu keina nangei ta trongsan hi Chungtheing na lungshit akha chu marouril jaihra hana jarra nangei na ratta hang nea ang nge rouram chu mamee limta amo na jaihra pi ae. 33Keina sona rupa akha chu meepun meeni atu akha ta phao di nong nge. 34Nangei tak na dang ang nge keina katarang nga akha chu katonpi ngei tarang nga tullu ka ae ha. 35Keina nangei ta ripta dangpi ah ri pi sang nge ha chu tullu rakta ae weta aol ana asul eja ta san thei oh ta arengpu Jisu makna ril ha, “Apha ngei hitta ape ngei na hella jaihra ae.” 36Pol na nalim ril shu takka ahuk hrun weta mani hitta nie so. 37Mani lim na amo ta kolla abe chuppa tappa thing jou de bye. 38Mani na hella olna chu nangei na woiha lea ah kei ta ripha ang no che ae ril ha ae. Hana mani na amo hitta kung am na phao thing ha so ae.
Currently Selected:
RUIHNGEI TULLU 20: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
