JOHON 13
13
Jisu bini sagrirokni yakung súmani
1Yókma Ter phainani tei salsa tong kho. Jisu saui man kha bo o swngcharno yakarwi Buphani aro thángnani jora sók phai kha. O swngcharo bini bororokno bo hamjak máng tháng kha, hakhe bo bórokno páithak jora hamjak lang kha.
2Jisu bai bini sagrirok chá laiwi tong phuru Soitan Jisuno rom rwna hwnwi Simon Iskariotni bwsla Judasno khá-o chong rwui pái kha, 3Bupha bini yago bebak phan rw bai kha, bo Kaitorni aroni phaimani, tabuk Kaitorni arono tháng phinai hwnwi Jisu saui man kha. 4Aboni bagwino bo chámani bachaui dulai khugwi bwchango rítuku khaui na kha. 5Hakhe bo takari-o twi lukhlaiwi sagrirokni yakung sú rwui bwchangni rítuku bai huna cheng kha. 6Bo Simon Pitorni aro sók phai khe Pitor bono hai hwnwi sa kha, “Subrai, nwng ani yakung súnai, hai da?”
7Hakhe bono Jisu hai hwnwi sa kha, “Ang khlaiwi tongmano nwng tabuk saui man glak kho, ulo se saui man anw.”
8Pitor hai hwnwi sa kha, “Nwng ani yakung kisa phano sú-ui man glak!”
“Ang nini yakung sú ya khe nwng ang bai kwrwi kha,” hwnwi Jisu sa kha.
9Simon Pitor bono hai hwnwi sa kha, “Subrai, yakung simi ya, ani bokhorok bai yakbo sú-ui rw si di!”
10Jisu hai hwnwi sa kha, “Twi tukujak borok bo sap-sutra wng kha, bini yakung simi se sú khe pái-o. Norok bebak’-no sap-sutra, khoroksa simi se sap-sutra ya.” 11(Jisu saui man súk kha sabo bono rom rwnai; aboni bagwino bo o kók sa-o, “Khoroksano karwi norok bebak’-no sap-sutra.”)
12Bórokni yakung sú baiwi Jisu dulai chumui chá thani achuk phai kha. Bo bórokno hai hwnwi sẃng kha, “Ang tabuk norokno khlaimano norok saui da man? 13Norok ano Hoda hwnmanibo, Subrai hwnmanibo, abo kahamno, ang’-no abono ba. 14Ang norokni Subrai, norokni Hoda wng tw tẃi se norokni yakung sú-ui rw kha. Aboni bagwi norok kiching norokbo yakung sú lai thai. 15Ang norokno khlaiwi phunuk langma hai’-no norokbo khlai lai di.#Luk 22.27. 16Ang norokno sóino kubui kók sa-o, seleng nokphangni slái kotor wngwi man ya, phiya rohorjakni rohornaini slái kotor wngwi man ya.#Mat 10.24; Luk 6.40; Joh 15.20. 17Tabuk norok o kókno saui man kha, hakhe omo hai khe tong khe norok bwswk se hamchanai!”
18“Ang norokni bebakni kókno sa ya, ang chongmarokno ang saui mano. Tamo khe elembakni o kók na se nang phainai, ‘Ang bai chánai borok bo’-no wng kha ani kena ari.’#Lob 41.9. 19Wng phai ya sini’-no tabuk norokno omono sa-o, hakhe omo wng phai phuru ‘Ang’-no Bo’ hwnwi norok poito khlai anw. 20Ang norokno sóino kubui kók sa-o, ang rohormani borokno yachaknai bo anobo yachago; ano yachaknai borok bo ano rohornaino yachago.”#Mat 10.40; Mar 9.37; Luk 9.48; 10.16.
Bo rom rwjaknai hwnwi Jisu samani
(Mat 26.20-25; Mar 14.17-21; Luk 22.21-23)
21O kók sa baiwi Jisu belai uanajak kha. Hakhe bo pháng-pháng khe hai hwnwi sa kha, “Ang norokno sóino kubui kók sa-o, norokni bere khoroksa ano rom rwnai.”
22Bo samani borok sabo abono tẃi sotonwi uanajagwi aphuru khe sagrirok bo’-bo bono naisik lai kha. 23Sagrirokni bere Jisu hamjakmani khoroksa tongo, bo Jisuni gana achukjak. 24Simon Pitor bono yak tail khe hai hwnwi sa kha, “Bo samani abo sabo hwnwi sẃng di.”
25Hakhe a sagri Jisuni bwkhak jabirwi hai hwnwi sẃng kha, “Abo sabo Subrai?”
26Jisu hai hwnwi sa kha, “Ang jamo ruti chomsaui khoroksano rw anw, abo’-no a borok.” Hakhe bo ruti belep lepsa chomsaui Simon Iskariotni bwsla Judasno rw kha. 27Judas a rutino nama logi’-no Soitan bini bisingo hap phai kha. Hakhe Jisu bono hai hwnwi sa kha, “Do di, nini khlainano khlaiwi pái di.” 28A chá thani achuknairokni bisingo Jisu bono samano khoroksa phano romwi man li ya. 29Judasni yago rang bogol tongma bai tero nangmani manwi pai di, eba khe kwrwirokno kisa swk rw di hwnwi Jisu bono sa khna hwnwi baksa sagrirok khá ka kha.
30Juda a ruti belepno naui logi logi’-no ongkhorwi tháng kha. Aphuru hor.
Kwtal khe dagimani
31Juda tháng bai khe Jisu hai hwnwi sa kha, “Tabuk Borokni Sajla chẃngsacha wngnai, bini bising tẃi Kaitorbo chẃngsacha wngnai 32Hakhe bini bising tẃi Kaitor chẃngsacha wng khe Kaitorbo bini bai Borokni Sajlano chẃngsacha khlai anw, dakti’-no khlai anw. 33Angsarok, norok bai ang tei kwbáng tong lang glak kha. Norok ano rutuk anw, phiya ang Judairokno sama hai tabuk noroknobo sa-o, ang tháng thani norok thángwi man glak.#Joh 7.34. 34Ang norokno hai hwnwi kwtal khe dagi-o, norok kiching norok hamjak lai di. Ang norokno hamjakma hai norokbo hamjak lai di.#Joh 15.12,17; 1Jn 3.23; 2Jn 5. 35Hakhe norok kiching norok hamjak laima tong khe norok ani sagri hwnwi jotono saui man anw.”
Pitor gosi glak hwnwi Jisu samani
(Mat 26.31-35; Mar 14.27-31; Luk 22.31-34)
36Simon Pitor Jisuno hai hwnwi sẃng kha, “Subrai, nwng buro thángna nai?”
Hakhe Jisu bono hai hwnwi sa kha, “Ang tháng thani nwng tabuk ani logi thángwi man glak, ulo se man anw.”
37“Subrai, tamo wngwi ang tabuk nini logi thángwi man ya wngnai? Nini bagwi ang butharjakna suda gosi-o,” hwnwi Pitor Jisuno sa kha.
38Jisu hai hwnwi sa kha, “Nwng ani bagwi butharjakna suda gosi-o, ahai da? Ang nono sói’-no kubui kók sa-o, tokla kokchik ya sini nwng ano sini ya hwnwi uáitham sa anw.”
Currently Selected:
JOHON 13: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.