JOHON 12
12
Bethania-o Mariam Jisuno thok motom phulmani
(Mat 26.9-13; Mar 14.3-9)
1Jisu Yókma Terni nokha saldok swkang Lasar tongmani Bethania-o tháng kha, a Lasar wng kha Jisu kwthwini mwthangmani a borok. 2Hakhe bórok bini bagwi aro panda khlai kha; Martha chá rw kha, Lasarbo Jisu bai baksa chána achuk kha. 3Aphuru Mariam nard kahamni snamjak belai morok thok motom sisisa Jisuni yakungo luproui bini bwkhnai bai hu-ui rw kha, hakhe thok motom báhai nok pung súk kha.#Luk 7.37-38. 4Jisuno rom rwnai Judas Iskariot hwnwi bini sagrirokni bere khoroksa hai hwnwi sa kha, 5“O thok motom rang khok thamra khe phalwi tamo wngwi kwrwirokno rw ya wng lang?” 6Bo sikhok wngma bai se o kókno sa-o, kwrwirokno khá súgwi sama ya. Bini yago rangni bogol tongma bai aroni le kisa misa na trwng bla.
7Hakhe Jisu hai hwnwi sa kha, “Khlai thung! Ano phobna phuruni bagwi bo abono narwk thung. 8Kwrwirok ba norok bai máng tong bla, ang le norok bai tong glak.”#Uái 15.11.
Lasarno butharna kók chap laimani
9Jisuno Bethania-o tongo hwnwi saui manẃi Judairok kwbángma aro tháng kha. Bórok Jisuni bagwi simi thángma ya, Jisu kwthwini mwthangmani a Lasarnobo naina hwnwi thángo. 10Aboni bagwino ochai okrarok Lasarnobo butharna hwnwi kók chap lai kha, 11tamni hwn khe aswk Judairok bórokni hodarokno yakarwi Jisuno poito khlai rwrwgo.
Kwplai khe Jisu Jerusalemo hap phaimani
(Mat 21.1-11; Mar 11.1-11; Luk 19.28-40)
12Tero phainai luku kwbángmarok teini salo Jisuno Jerusalemo phai-o hwnwi khna kha. 13Hakhe bórok khajuri bedekrok naui hai hwnwi chirikhógwi bo bai malaina tháng lai kha, “Kaitorno lob di!#12.13: Kaitor lobjak thung: Eba Hosana. Subraini mungwi phainaino Kaitor hamari rw thung! Israilni bugrano Kaitor hamari rw thung!”#Lob 118.26.
14-15Hakhe “Ta kiri di,
Siyonni bororok!
Nahar di, korai chirka bwsa o khe kasaui norokni bugra phai-o,”
hwnwi elembago swijak tongma hai Jisu korai chirka masa nugwi a saka-o kasa kha.#Sak 9.9.
16Jisuni sagrirok aphuru abono romwi man li ya, bo chẃngsacha khlaijak phuru se elembago bini bagwi o kók swijak tongmano bórok muitu manjago, bórok bono omo hai khlaimanobo muitu manjago.
17Lasarno Jisu mangkhorni ringwi mwthang phuru bini logi tongnai lukurok o wngmano saui khna rw kha. 18Aboni bagwino lukurok bo bai malai kha, tamni hwn khe bo o soidomni samung khlaimano bórok khna kha. 19Aphuru Pharisairok bórok kiching bórok hai hwnwi sa lai kha, “Nai di, chwng ba w se wng li ya bla! Naharwi nai di, swngchar ba bono máng se rwkthar si bla!”
Grikrok Jisuno naitukmani
20A ter phuru surina hwnwi Jerusalemo thángnairokni bere baksa Grik tongo. 21Bórok Galilini Betsaida o tongnai Philipni thani phaiwi hai hwnwi sa kha, “Takhuk, chwng Jisu bai malaina muchungo.”
22Philip Andriani thani thángwi saui kha, hakhe bórok khoroknwi’-no Jisuni thani thángwi saui kha. 23Jisu bórokno hai hwnwi sa kha, “Borokni Sajlani chẃngsacha khlaijaknani jora sók phai kha. 24Ang norokno sóino kubui kók sa-o, maichlam kolsa ha-o klai thwi ya khe bo a kolsa’-no kolsa wngwi tongo. Bo thwi khe se kwbángma thái-o. 25Kwthang tongna muchungnai borok bo thwinai, phiya o swngcharo kwthang tongnano samung nangjak ya borok bo mwthangjak phlainai.#Mat 10.39; 16.25; Mar 8.35; Luk 9.24; 17.33. 26Ani samung khlaina muchungnai borok bo ani logi phai thung, hakhe ang tong thani ani selengbo ang bai baksa tongwi man anw. Aphabo ani samung khlainaino bóri anw.”
Bo thwinani kókno Jisu samani
27“Ang tabuk uana kha; ang tamo sanai? O Apha, phaina hwnmano ani thani ta tubu di hwnwi da ang sanai kha? Phiya ba omoni bagwi se ang oro phaimani. 28O Apha nini mwkhang chẃng rw di!”
Hakhe nokhasani kók hai hwnwi sakhlaijak kha, “Ang abono chẃng rw kha, phiya tei uáisa chẃng rw anw.”
29Aro bachaui tongnai lukurok a kók khnaui hai hwnwi sa lai kha, “Omo ba phirang se kók bla!”
Baksa ba “Suari se bo bai kók sa-o,” hwnwi sa lai kha.
30Tamo khe Jisu bórokno hai hwnwi sa kha, “O kók ani bagwi sama ya, norokni bagwi sama se. 31O swngcharni buj thumnani jora tabuk sók phai kha, tabuk o swngcharni bugra rwkhlaiwi rohorjak anw. 32Ang o hani tisajak phuru ang bebak bororokno ani thani so hor anw.” 33(Bubo tẃi khe thwino bo abo swkang baira kók khitarwi sama se.)
34Luku hai hwnwi sa kha, “Masia kwthang tong phlainai hwnwi chini Kerongo sajak tongo. Hakhe Borokni Sajla tisajakna nangnai nwng bahai khe sa? O Borokni Sajla hwnjaknai abo sabo?”#Lob 110.4; Jis 9.7; Esk 37.25; Dan 7.14.
35Jisu hai hwnwi sa kha, “Tei srapsa se norokni bisingo pohor tong si anw. Pohor tong sak’-no him lai di, hakhe mwnakma norokni thani phai glak; mwnakma-o himnai borok bo biyang tháng abo saui man ya. 36Pohor tong sak bono poito khlai di, hakhe norok pohorni borok wng anw.”
Poito khlai ya Judairok
O kók sa baiwi Jisu bórokni aroni sak samlogwi tháng kha. 37Bo bórokni bwskango aswk soidomni samungrok khlai phano bórok bono poito khlai li ya. 38Hakhe Jisaia diyari hai hwnwi sa langmani abo nang phai kha,
“Subrai, chwng sama kókno
sabo khnanai tong?
Bini phanno Subrai
sabono phunuk kha?”#Jis 53.1.
39Aboni bagwi bórok poito khlai man li ya, tamni hwn khe Jisaia o kókbo sa lang kha,
40“Bórok mokol ta nuk thung,
phiya bwkhabo ta si thung hwnwi
Kaitor bórokno nuk ya khlai kha,
phiya bwkhabo si ya khlai kha.
Hakhe bórok ham rwjakna bagwi ani thani kiphilwi phai glak hwnwi Kaitor sa-o.”#Jis 6.10.
41Jisaia Jisuni chẃngsachano nugwi bini kók sa lango; aboni bagwino bo o kók sa-o.
42Hai phano Judai hodarok kwbángma Jisuno poito khlai kha. Tamo khe Pharisairokni bagwi bórok o kókno pháng-pháng sa rak ya, wng ya khe bórok thumnogo basijak anw. 43Bórok Kaitor bai kaham hwnjakma slái borok bai kaham hwnjakma se hamjago.
Jisuni kók bai se majra berjakmani
44Jisu sotonwi hai hwnwi sa kha, “Ano poito khlainai borok bo ano simi poito khlaima klai ya, bo ano rohornainobo poito khlai-o. 45Ano nuknai borok bo ano rohornainobo nugo. 46Khoroksa swk phano ano poito khlai khe bo mwnakma-o ma tong ya tẃi hwnwi ang pohor wngwi o swngcharo phai kha. 47Khoroksa swk phano ang kók samano khnaui abo hai tong ya khe ang bono majra ber ya, tamni hwn khe ang o swngcharno majra bernani phai ya, mwthangnani se phai-o. 48Ang kók samano khna yaui ano khibinai borokno majra bernai khoroksa tongo; ang tabuk samani kókno páithakni salo bono majra bernai. 49Tamni hwn khe ang ani bai sama ya, ano rohornai Apha se omo hai sa di hwnwi ano dagi-o. 50Ang saui mano bo dagimani abo mwthang phlainai se. Hakhe ang samani omo Apha sa di hwnwi samani abo hai se.”
Currently Selected:
JOHON 12: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.