1 SAMUEL 3
3
Subraiyung Samuelni thani nukjakmani
1Aphuru chwrai Samuel Elini yakchu-o tongwi Subraiyungno monwi tongo. Tei a jora-o Subraiyungni aroni kók phunukjakmabo báng tha ya. 2Abo hai jora-o Eli mokolbo nuk tha li ya, bo bini thuthaini khotolo rokoui tongo. 3Kaitorni chati thwiwi tháng ya kho tei Samuel Subraiyungni nok bisingo Kaitorni swmai bokhok tong thani thu-ui tongo. 4Hakhe Subraiyung Samuelno, “Samuel, Samuel!” Hwnwi ring kha. Bo, “Iko ang orono,” hwnwi sa kha. 5Elini thani khabrumwi thángwi hai hwnwi saui kha, “Iko ang oro se, nwngno ano ringna ble?”
Tamo khe Eli, “Ang nono ring ya, thu-ui tongwi di,” hwnwi sa kha. Hakhe bo thángwi thu-ui kha.
6Hakhe Subraiyung Samuelno tei uáisa “Samuel!” hwnwi ring phi u kha, hakhe Samuel bachaui Elini thani thángwi hai hwnwi sa kha, “Iko ang oro se, nwng de ano ring?”
Tamo khe bo hai hwnwi sa kha, “Sajla ang nono ring ya, thu-ui tongwi di.” 7Samuel abo Subraiyung hwnwi saui man ya kho, tamni hwn ba Subraiyung kók saui bini thani uáisa’-bo nukjak ya kho.
8Subraiyung Samuelno uáitham ring kha. Hakhe bo bachaui Elini thani thángwi hai hwnwi sa kha, “Iko ang oro se, nwng ano ringna ble?”
Hakhe Eli abo Subraiyung se chwraino ringwi tongo hwnwi saui man kha. 9Aboni bagwi Eli Samuelno hai hwnwi sa kha, “Thángwi tongwi di, bo nono ring phi khe ‘Subraiyung nini seleng khnaui tongo’ hwnwi nwng sa di. Hakhe Samuel thángwi thu-ui tongwi kha.”
10Subraiyung phaiwi bacha phai khe swkang phuruni hai khe’-no, “Samuel, Samuel!” Hwnwi ring phi kha.
Samuel, “Sa di, nini seleng khnaui tongo!” Hwnwi sa kha.
11Aphuru Subraiyung Samuelno hai hwnwi sa kha, “Nai di, ang Israilni bisingo samung kaisa khlai anw, abono khnanairok belai uanama chánai. 12A salo ang Elini núkhungno kebengwi kók sama hai yaphangni simi páithak jora khlai anw.” 13Ang bini núkhungno mol brúmni bagwi sátoknai hwnwi saui’-no páijak, tamni hwn ba bini bwslasong Kaitorno kebengwi kók sa kha, Eli abono saui mano. Hai phano bo abono kasu li ya. 14Abo baino ang Elini núkhungno swmai tangwi sa-o tei mungsa yapharmungrok bai bo bórokni sumsokno mol brúmni bagwi norwi man li ya.
15Samuel phung jora thuyamo rokoui tong kha, hakhe bo bachaui Subraiyungni nok duglamrok phiyok kha. Tamo khe bo Elino bini nukmani kókno sanani kiri kha. 16Phiya ba Eli bono ringhorwi hai hwnwi sa kha,
“Samuel, ani sajla.” “Ang oro se,” hwnwi Samuel sa kha.
17Eli hai hwnwi sẃng kha, “Bo nono tamo sa kha? Ano mungsa huiwi ta tong di. Bo samani kókrokno ano sa phi ya hwn khe Kaitor nono belai khe sátoknai.” 18Hakhe Samuel tong kwrwi saui rw bai kha, mungsa phano huiwi ton li ya. Eli hai hwnwi sa kha, “Bo se Subraiyung; bini chajakmani hai’-no khlai thung.”
19Hakhe Samuel torsaui phai khe, Subraiyung bo bai tong kha, bini kók tháisa-láisa phano ha-o klai li ya. 20Hakhe bebak Israilni bororok Danni simi Birseba jora Samuel kubui’-no khoroksa Subraiyungni diyari hwnwi saui man bai-o. 21Subraiyung Silo-o nukjak nukjagwi tong kha, Subraiyung Silo-o kók bai khe Samuelni bising tẃi nukjak kha.
Currently Selected:
1 SAMUEL 3: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
