1 SAMUEL 15
15
Amaleksarok bai choba nang laimani
1 #
1Sa 10.1. Hakhe Samuel Solno, “Subraiyung Israil bini bororokni saka-o nono habugra chongnani bagwi ano se thok phul di hwnwi rohoro; aboni bagwi tabuk Subraiyung tamo sa khna di,” hwnwi sa kha. 2#Lam 17.8-14; Uái 25.17-19.Kwplaisa Subraiyung hai hwnwi sa-o, “Israilrok ha Ijipni ongkhorwi phai phuru bórokno kebengmani bagwi ang Amaleksarokno sátoknai. 3Tabuk thángwi Amaleksarokno swpragwi bórokno tong kwrwi bebak sokomor súk di, bórokno kwthang ta narwk di; chwla, bwrwi, chwrairok, absarok, musukrok, merarok, mangingang tei koraichirkarok bebakno buthar bai di.”
4Sol bini sengkrakrokno buthup khe ringwi Telaimo lekhaui nai ba khorok 200,000 Israilni tei khorok 10,000 khe Judani sengkrakrok ká-o. 5Sol bini bororok bai Amaleksani kamiyungo tháng laiwi harungo naisingwi tong lai kha. 6Sol Kenisarokno hai hwnwi sa kha, “Amaleksarok bai kagwi tháng di, wng ya khe bórok bai baksa norokbo butharjak bainai se, tamni hwn ba Israilrok ha Ijipni yógwi phai phuru norok bórokno khairok kha.” Hakhe Kenisarok Amaleksarokno yakarwi tháng lai kha.
7Sol Amaleksarokno ha Ijipni salka bwkhak Habilani simi Sur jora mechen kha. 8Bo Amaleksani habugra Agagno kwthangno rom kha tei bororokno khe seng bai buthar bai kha. 9Tamo khe Sol tei bini bororok Agagno buthar li ya kaham kaham merarok, musukrok, musuk bwsarok, mera bwsarok tei kahamrokno buthar lai li ya tei hamya, chúk yarokno khe sokomor súk bai kha.
Sol Habugra norjakmani
10Subraiyung Samuelno hai hwnwi sa kha, 11“Ang Solno habugra snamwi belai cha ya khlai kha, bo ani aroni uphilwi tháng kha, ani dagimarokno khna li ya. Samuel belai khe jolijagwi hopung Subraiyungni thani kap kha.” 12Teini phung aidrobo Sol bai malaina tháng kha. Sol Karmel kami kotoro tháng kha hwnwi sajak kha. Bo aro sakni bagwi thongla kaisa songchaui Gilgalo tháng kha. 13Samuel Solni thani phai khe Sol bono, “Subraiyung nono hamari rw thung! Ang Subraiyungni dagima hai’-no khlai kha,” hwnwi sa kha.
14Samuel hai hwnwi sẃng kha, “Hakhe tamni ang musukrok pungmani tei merarokni khorang khna?”
15Sol hai hwnwi sa kha, “Ani bororok Amaleksarokni yakni abórokno tubu kha. Nini Subraiyung Kaitorni thani yapharnani bagwi abórokni bisingo kaham kukrokno na lai kha tei bebakno sokomor súk bai kha.”
16Hakhe Samuel Solno, “Thak di, tini horo Subraiyung ano tamo sa kha ang saui khna rw anw,” hwnwi sa kha.
Sol, “Ano sa di,” hwnwi sa kha.
17Samuel hai hwnwi sa kha, “Nini sakno nwng mungsa chúk ya hwnwi chong phano nwng Israilrokni bokhorok. Subraiyung nono Israil bosongni habugra chong kha.” 18Subraiyung nono bebak borok hamya Amaleksarokno sokomor di hwnwi dagiui rohor kha tei bórokno komor súk ya sak choba nangwi di hwnwi sa kha. 19Nwng tamni Subraiyungni kók khna li ya? Hakhe tamni manwirokno segwi naui Subraiyungni bwskango cha ya samung tang?
20Sol Samuelno hai hwnwi sa kha, “Ang Subraiyungni kók khna kha, bo sama haino ang ongkhorwi thángwi Amaleksani habugra Agagno tubu kha, bebak Amaleksarokno sokomor kha. 21Tamo khe ani bororok se kaham kaham merarok, musukrokno Gilgalo Subraiyung nini Kaitorni thani yapharnani bagwi buthar lai ya khe tubu lai kha.”
22Hakhe Samuel hai hwnwi sa kha, “Subraiyung tamono chajak, sógwi yapharma de tei bini kók khnanani de? Nai di, yapharmani slái bini kók khnamani se ham kugo. 23Bono kebengmani le danda-baji phunuknairok bai baksano hamya, khá si ya wngmarokbo mwtai khulummani bai baksano sumsok khlaima klai-o. Nwng Subraiyungni kók na li ya wngmani bagwi’-no bo’-bo nono tei habugra ton glak.”
24Hakhe Sol Samuelno hai hwnwi sa kha, “Ang sumsok khlai kha, ang Subraini dagimarok khna li ya tei nini kókbo na li ya. Ang ani bororokno kiriui se bórokni kók ma khna si-o. 25Aboni bagwino tabuk ang nono koi ja-o, ani sumsok nakar si di. Ang Subraiyungno khulumui mannani tẃi khe ang bai baksa kiphilwi phai ja di.”
26Tei Samuel Solno hai hwnwi sa kha, “Ang nwng bai kiphil glak, nwng Subraiyungni kókno normani, Subraiyungbo haino nono Israilrokni saka-o habugra tongmano nor kha.”
27 #
1Sa 28.17; 1Ha 11.30-31. Samuel thángnani bagwi uphil khe Sol bini rí romwi soton khe abo kichik kha. 28Aphuru khe Samuel bono hai hwnwi sa kha, “Subraiyung tini Israil hano nini aroni sichigwi nini slái borok kaham kukno abono rw kha. 29Israilni Chẃngsacha Kaitor tatal wng glak tei khábo slái glak, tamni hwn ba bo borok buya hakhe bini khábo slái glak.”
30Hakhe Sol hai hwnwi sa kha, “Ang sumsok khlai kha, phiya ba tabuk ani bororokni tẃiphangrok tei bebak Israilrokni bwskango ano bórom khlai di, Subraiyung nini Kaitorno khulumui mannani bagwi ang bai pal kiphil di.” 31Hakhe Samuel bo bai pal khe tháng kha tei Sol Subraiyungno khulum kha.
32Aphuru khe Samuel, “Amaleksarokni habugra Agagno oro ani thani tubu di,” hwnwi sa kha. Agag bwkha srangjak khe phai kha tei “Butharjakna ma nangmani yók kha!” hwnwi tong kha. 33Hakhe Samuel, “Nini seng bai kwbángma bumarokno bwsa kwrwi khlaima hai tabuk nini bumabo bwsa kwrwi wngnai,” hwnwi sa kha. Hakhe Samuel Agagno Gilgalo Subraiyungni bwskango phondrik-phandrak khe tanwi pái kha.
34Aboni ulo Samuel Rama-o tháng kha tei Sol Gibea bini nogo tháng kha. 35Samuel kwthang tong lang sak Solno tei mwkhang nuk li ya, bo Solni bagwi belai bwkha kham kha. Subraiyung Solno Israilni habugra snamwi belai bwkha nang kha.
Currently Selected:
1 SAMUEL 15: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
