1 SAMUEL 14
14
Jonathan kiri yaui thwimani
1Salsa Solni bwsla Jonathan bini seng tẃinai sikla khoroksano hai hwnwi sa kha, “Phai di, chwng Philistiasarokni bathamno bárwi tháng lai anw,” phiya ba Jonathan bini buphano sa li ya. 2Aphuru Sol Gibea gana Migronni dalim buphang yaphango tongo tei bini logi-o borok khorok dok-ra swk wng anw, 3tei bórokni bere Ahia khe Ephod kanjak, Ahia Ahitubni bwsla, Ahitub khe Ikhabodni takhuk, Ikhabod khe Phinehasni bwsla tei Phinehas khe Elini bwsla, bo Silo-o Subraiyungni ochai. Jonathan tháng kha hwnwi bororok saui man ya.
4Jonathan Philistiasarokni bathamo thángna naimani lama-o holong budul tháinwi kotorma babaisa-o tháisa tei babaisa-o tháisa tongo, kaisani mung Bojej tei kaisani mung khe Sene. 5Kaisa khe salsibai bwkhago Mikmas phaising naharjak tei kaisa khe salgrabai bwkhakni Geba phaising naharjak.
6Jonathan bini aital tẃinai siklano hai hwnwi sa kha, “Phai di, chwng sakur rajak ya Philistiasarokni bathamo tháng lai anw, Subraiyung chwngno chubaui mano kwbángma bai phano kisa bai phano, Subraiyung kwplai khlaimano kebo kebengwi man ya.”
7Tei bini da-seng tẃinai sikla, “Nini khá-o chongma hai’-no khlai di, nai di ang nwng bai’-no tongo,” hwnwi sa kha.
8Hakhe Jonathan, “Phai di, chwng bárwi tháng lainai tei Philistiasarok chwngno nuk thung,” hwnwi sa kha. 9Phiya ba bórok chwngno bathak di hwnwi sa khe chwng bathaknai, chwng bórokni aro tháng glak. 10Phiya ba tumung bórok, “Chini thani phai di, hakhe chwng tháng lai anw; tamni hwn ba Subraiyung bórokno chini yago yaphar kha. Abo se chini mari wngnai,” hwnwi sa khe,
11hakhe bórok khoroknwi’-no Philistiasarok bai nukjak khe Philistiasarok hai hwnwi sa kha, “Nai di, Hibrurok hakhoro huijagwi tong baimani ongkhorwi phai lai kha!” 12Hakhe bórok Jonathan bai bini aital tẃinaino hai hwnwi ringhor lai kha, “Chini thani phai di, norok bai kók tongo.”
Jonathan bini seng tẃinaino hai hwnwi sa kha, “Ang bai phai di, Subraiyung bórokno Israilni yago yaphar kha.” 13Jonathan bini yak-yakung bai khe kasasaui phai khe, bini pal bo bai tháng kha. Hakhe Philistiasarok Jonathan bai mechenjak bai kha tei bini aital tẃinaibo bini utung-utung buthar kha. 14Jonathan bai bini aital tẃinai uáisa bai hektor kaisa jagani bak brwi-o borok khorok nwichi buthar lai kha. 15Hakhe Philistiasarokni bisingni bathamo tongnai, panthoro tongnairok belai kirijak lai kha. Mikmasni bathamo tongnairok tei choproknai sengkrakrok suda kirima cháui kwlwi bai kha, yang aboni bere se banglabo phai kha. Abo belai kirimasingchabo wng kha.
Philistiasarok chenmani
16Solni bororok Benjamin amchoini Gibea-o mwrwgwi tongnairok Philistiasarokno urumuru nang laiwi khár laimani nuk kha. 17Hakhe Sol bo bai tongnai bini bororokno, “Sengkrakrokno lekhaui nai di, sabo kwma kha,” hwnwi sa kha. Bórok lekhaui nai lai khe Jonathan bai bini aital tẃinai kwrwi nuk kha. 18Sol Ahiano hai hwnwi sa kha, “Kaitorni swmai bokhokno#14.18: swmai bokhok: Kaisa kók séma-o ephod (2.28. no nai di) Hibru-o khe swmai bokhok. oro tubu di.” O jora-o Israilsarokni logi-o Swmai bokhok tongo. 19Sol ochai bai kók sa lai tong phuru khe Philistiasarokni bathamo urumuru teibo báng kha; tei Sol ochaino, “Ton si di, nang li ya,” hwnwi sa kha. 20Hakhe Sol tei bo bai tongnai bebak bini bororok Philistiasarok bai choba nang laina tháng lai kha; bórok chap laiwi se man lai li ya sak bai sak se nang lai si-o. 21Aboni swkango Hibrurok Philistiasarok bai tongnai tei bórok bai bathamo tongnairokbo kiphilwi Israil bai Sol tei Jonathan bai pal wng kha. 22Tei Iphraimni hathái-o huijagwi tong bainairok Philistiasarok khár bai kha hwnwi khna khe bórokbo choba-o ongkhorwi phai lai kha. 23Tei Bethaben láiwi choba nang lai kha, a salo Subraiyung Israilsarokno phiyók kha.
Chobani yagulo wngmani
24Tei Israilsarok bebak bwkha nangjak bai kha, tamni hwn ba Sol hai hwnwi swmai tang kha, “Ang ani kena arirokno yagul su ya sak tei tini sanja wng ya sak mai chánai bo swraimung nangjak wngnai.” Aboni bagwi khoroksa phano sapung mungsa chá li ya. 25Bebak bororok bolongo phai lai kha, hakhe aro ha-o bórok piya bwtwi nuk kha. 26Bororok bolongo hap lai khe piya bwtwi ha-o klaiwi tongma nuk lai kha, hai phano aro kebo yak rw li ya, tamni hwn ba bórok Solni swraimung nang anw hwnwi belai kiri lai kha. 27Phiya ba Jonathan khe bini bupha bororokno sikirimano khna li ya, hakhe bini yago dang tongmani buchuk bai piya bwtwi-o chomwi kisa chá kha, bo belai thokjak kha. 28Borok khoroksa bono hai hwnwi sa kha, “Nini nwpha bororokno hai hwnwi kwrak khe sa kha, ‘Tini mai chánai bo swraimung nangjak wngnai,’ aboni bagwi bororok aswk khe dengdul bai kha.”
29Jonathan hai hwnwi sa kha, “Apha ba bororokno le se lengpra rw si bla; nai di ang kisicha piya bwtwi nungmani se bwswk phan man kha! 30Kena arirokno mechenwi sekproui manmani chámungrokno lukurok ma chá khe bwswk se ham kha mun, hakhe Philistiasaroknobo teibo butharwi man kha mun!”
31Bórok a salo Philistiasarokno Mikmasni simi Aijalon jora mechen kha. Tei bórok belai khe ok khuijak bai kha. 32Hakhe bororok kena arirokni aroni merarok, musukrok, musuk bwsarok na laiwi buthar laiwi thẃi gwnang khe abórokni bahan chá lai kha. 33#Yap 9.4; Leb 7.26-27; 17.10-14; 19.26; Uái 12.16,23; 15.23.Bórok Solno, “Nai di, bororok thẃi gwnang muihanrokno chá laiwi Subraiyungni thani sumsok khlai lai kha,” hwnwi sa kha.
Sol chirigwi, “Khna di, norok kók narwk yaui dera bai kha! Tabuk dakti dakti holongdap kaisa ani thani goirok rwui tubu di,” hwnwi sa kha. 34Hakhe bo teibo hai hwnwi sa kha, “Norok bororokni thani thángwi merarok, musukrok, musuk bwsarokno oro tubu-ui tantharwi chá di hwnwi saui di, thẃi bai khe bahan cháui khoroksa phano Subraiyungno kebengwi sumsok ta khlai thung.” Hakhe a horo bórok jotono bórokni musukrok tubu-ui aro buthar lai kha. 35Tei Sol Subraiyungni bagwi aro háyá kaisa snam kha, abo’-no bo puila Subraiyungni bagwi háyá snammani.
36Sol bini bororokno, “Phai di, chwng horo thángwi Philistiasarok bai hopung nang lai anw tei phung ai jora nang laiwi bebak’-no buthar lai anw,” hwnwi sa kha.
Bórok hai hwnwi sa kha, “Nini chajakmani haino khlai di.”
Tamo khe ochai, “Phai di, swkang Kaitorno sẃngwi nai lai grana,” hwnwi sa kha.
37Hakhe Sol Kaitorno hai hwnwi sẃng kha, “Ang Philistiasarok bai choba nang laina thángnai de?” Nwng bórokno Israilrokni yago yapharnai de? Tamo khe Kaitor a salo bono mungsabo sa li ya. 38Sol bororokno hai hwnwi sa kha, “Sengkrak bokhorokrok oro phai di, tini tamo khe o sumsok khlaijak kha rutugwi chwng naitugwi nai lai anw.” 39Israilrokno phiyóknaisa kwthang Subraiyungni mung bai ang swmai tangwi sa-o, ani angsla Jonathan phano abono khlai khe, bo phano wng thung ma se ma thwinai; tamo khe bororok khe siring khe tong kha. 40Hakhe Sol bebak Israilrokno, “Norok babaisa-o bacha lai di tei ang bai angsla Jonathan khe tei babaisa-o bachanai,” hwnwi sa kha.
Lukurok, “Nwng chajakma hai’-no khlai di,” hwnwi sa kha.
41 #
Lek 27.21; 1Sa 28.6. Aphuru khe Sol Subraiyung Israilsarokni Kaitorno hai hwnwi sa kha, “Subraiyung tamni nini selengno tini mungsa sa li ya wng lang? O sumsok Jonathan eba ani wng khe Urim bai khe tei abo Israil bororokni wng khe Thumim bai khe sa di.”#14.41. Urim ... Thumim: Ochairok holong tháinwi bai khe Kaitorni muchungmano saui manma; bahai khe bórok samungo thepa srai-srai khe saui man ya. Jonathan bai Sol khe manjak kha, bororok khe yók kha. 42Hakhe Sol hai hwnwi sa kha, “Angsla Jonathan bai ani bisingo pat karwi nai di,” hakhe Jonathan manjak kha. 43Sol Jonathanno, “Nwng tamo khlai lang ano sa di?” Hwnwi sẃng kha.
Jonathan, “Ani yakni dang tongmani buchuk bai piya bwtwi chá naiwi nai kha, iko, ang thwinani tiyar tongo,” hwnwi sa kha.
44Sol bono hai hwnwi sa kha, “Au, Jonathan nwng butharjak ya wng khe Kaitor ano buthar si thung.”
45Bororok Solno hai hwnwi sa kha, “Israilno kwplai khlainai Jonathan de butharjaknai? Subraiyung kwthang tong sak chwng swmai tangwi sa-o, bini bokhorokni bwkhnai twngsa phano ha-o klai glak, bo tini Kaitorni chubachu bai se abo hai khlaiwi mano.” Hakhe bororok Jonathan thwina tongmano mwthang kha.
46Aboni ulo Sol Philistiasarokno tei riphrik li ya, Philistiasarokbo haino bórokni ha-o uphilwi tháng kha.
Sol bugra cháma tei núkhung
47Sol Israilo habugra chámani ulo bo bebak bwkhago bini kena ari Moabrok, Ammonsarok, Idomsarok, Jobani habugra tei Philistiasarok bai choba nang lai kha, bo tháng thángma phaising bebakno’-no mechen kha. 48Bo phankrak khe nang laiwi Amaleksarokno suda mechenwi choproknairokni yakni Israilrokno mwthang kha.
49Solni bwsarok wng kha Jonathan, Isbi tei Malkisua. Bini bwsajwk okrani mung Merab tei kusuni mung Mikal. 50Bini bihikni mung wng kha Ahimajni bwsajwk Ahinoam, Solni sengkrak bokhorok wng kha bini bukhra Nerni bwsla Abner. 51Solni bupha Kis tei Abnerni bupha Ner wng kha Abielni bwsla.
52Sol kwthang tong lang sak Philistiasarok bai jai khe’-no nang lai kha, hakhe bo khoroksa swkno phan gwnang tei kirima kwrwi nuk khe bini sengkrak bodol snamo.
Currently Selected:
1 SAMUEL 14: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
