1 SAMUEL 1
1
Silo-o Elkana bai bini núkhung
1Elkana hwnwi Ephraim bosongni borok khoroksa tongo, bo Iphraimni hathái kami Rama kami kotoro tongo. Bo Jehoramni bwsla tei Elihuni busuk, bo Juph bosongni Tohu núkhungni borok. 2Bini bihik khoroknwi tongo; Hanna bai Penina, Peninani khe bwsa-bẃtẃi tongo, Hannani khe bwsa khoroksa phano kwrwi. 3Bisi brúm brúm bórok Ramani Silo-o phan gwnang Subraiyungno khulumnani tei yapharnani bagwi tháng thángo, aro Elini bwslasong khoroknwi Hopni bai Phinehas Subraiyungni ochai wngo. 4Elkana yapharmung yapharmani salo bini bihik Peninano banta kaisa rw-o, abo hai khe’-no bini bwsa chwla tei bwrwiroknobo rw-o. 5Hakhe bo Hannano belai khe hamjak phano bono banta kaisa se rw-o, tamni hwn ba Subraiyung bono bwsa rw li ya. 6Penina bono podrepot kók saui thesra khlai-o; tamni hwn ba Subraiyung bono chwrai rw li ya. 7Abo hai khe máng nokha bisi kwbángma lái tháng kha, bórok Subraiyungni nogo tháng lai phuru khe Penina Hannano podrepot kók saui thesra kari-o, hakhe bo kabwi mungsa chá ya-nung ya khe tongo. 8Bini bwsai Elkana bono hai hwnwi sẃng kha, “Hanna, tamo wngwi nwng kap? Tamni nwng mungsa chá li ya-nung li ya wng lang? Tamni aswk nini bwkha dukhu nangjak? Sajla khorokchisongni slái ang ham kuk ya diba?”
Hanna bai Eli
9Salsa bórok Silo-o Subraiyungni nok bisingo chá bai khe nung bai khe Hanna bacha kha. Eli ochai Subraiyungni nokni dugar gana-o achugwi tongo. 10Hanna belai bwkha hamya wngwi Subraiyungni thani suriui kap kha. 11#Lek 6.5.Hakhe bo swmai tangwi hai hwnwi sa kha, “Sengkrakrokni Subraiyung!#1.11. Sengkrakrokni Subraiyung: Hibru-o khe “Jehoba-Sabaoth”.Nini selengjwk, ano naikhlai ja di, ani tektono naiwi ano muitu khlai ja di, ano ta pok ja di! Nwng ano bwsa chwla khoroksa rw khe, ang swmai tangwi sa-o, ang bono kwthang tong sak Subraiyungni thani yapharnai teibo bwkhnai bo rajak glak.”#1.11. Bwkhnaibo rajak glak: Omo wng kha Subraiyungni thani yapharmani mari. (Lek 6.5 no nai di.)
12Hanna Subraiyungni thani suri san máng tong kha, Eli khe bini búkhúkno naichomwi tongo. 13Hanna bini bwkha bisingo kók saui tongo, bini búkhúk simi se ula-ula wngo, bini khorang khe khna ya; hakhe Eli bo chuak nungjak se wng khna hwnwi chong kha. 14Hakhe Eli bono, “Nwng bwswk kwdwk arak phegwi tong sinai? Nini aroni arak khibiui rohor si di!” hwnwi sa kha.
15Phiya ba Hanna hai hwnwi sa kha, “I’nhi, bubagra ang arak kephek ya, ang belai’-no tekto nangjak bwrwija se; ang suri twtwi Subraiyungni thani bwkhani kók se saui tongo. 16Ahaino baliknai bwrwi hwnwi ta chong di, ang belai bwkha ui-ui wngwi se abo hai khe suri-o.”
17Hakhe Eli, “Kwchang kwchang khe tháng di, Israilni Kaitor nwng sanmano rw si thung,” hwnwi sa kha.
18Tei bwrwi hai hwnwi sa kha, “Nini selengjwk khairokmung man thung.” Hakhe Hanna thángwi chá kha-nung kha tei bwkha-o tekto kwrwi kha.
Samuel achaima tei yapharjakmani
19Bórok teini phung aidrobo dakti bachaui Subraiyungno khulum baiwi Rama-o bórokni nogo kiphilwi tháng kha. Elkana bini bihik Hanna bai thu kha-chá kha; hakhe Subraiyung bini surimano khna kha. 20Hanna jora’-ono sakderiya wngwi chwla bwsa khoroksa bá kha, bini mung Samuel hwnwi phar kha, tamni hwn ba bwrwi hai hwnwi sa kha, “Ang bini bagwi Subraiyungno san kha.”
21Elkana bai bini núkhungni bororok tei uáisa Silo-o Subraiyungni thani bisini yaphar lainani tei bo chakmano yapharnani phai lai kha. 22Tamo khe a jora-o Hanna khe tháng li ya. Bo bini bwsaino hai hwnwi sa kha, “Chwrai abuk cháma yakar khe ang Subraiyungni thani tlangnai, hakhe bo thwi yasak’-no aro tongnai.”
23Elkana bini bihikno hai hwnwi sa kha, “Nwng chajakmani tẃi’-no khlai di; abuk kak ya sak nwng nogo’-no ton di, Subraiyung bini kók narwk thung. Hakhe Hanna abuk kak ya sak jora nogo tongwi chwraino naikini khlai kha.”
24Bo abuk cháma yakar khe Silo-o bono tlangwi logi-o nokha bisik thamni musuk bwsa masa,#1.24: Nokha bisik thamni Musuk bwsa: Baksa kwcham kók séma-o khe nokha bisik thamni musuk bwsa; Hibru-o khe musuk maktham. auan kilo kaichi tei mui bukur sola bai kupulung arak tlang kha. Bo Silo-o Subraiyungni nogo Samuelno tubu kha, aphuru chwrai belai kwlwi kho. 25Bórok musuk rathar bai khe chwraino Elini thani tubu kha. 26Hanna bono hai hwnwi sa kha, “O bugra! Oro Subraiyungni thani suriui tong phuru nwng nukmani bwrwi ang’-no. 27O chwraini bagwi ang suri sanmani, Subraiyung ang sanmano rw kha. 28Hakhe ang bono Subraiyungni thani yapharo. Bo kwthang tong sak Subraiyungni’-no wngnai.”
Hakhe bórok#1.28: Bórok: Baksa kwcham kók séma-o khe bórok; Hibru-o khe bo. aro Subraiyungno khulum lai kha.
Currently Selected:
1 SAMUEL 1: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
