CORINTHMIKO KÜNAO 1
1
1Paul, Jihova müdolü Jisu Khrista apostle, mu uzüo Timothy ni püh Jihova kühu Corinth lü küba mu Achaia lü küba kümüsako mütü cie küsü: 2ngokümüzhie mu thülükümünü Poo Jihova mu Nuo Jisu Khrista cielü küvoo po nieko zü ba küyio thiyite. 3Jihova pothüchuh-o püyite, u Nyepo Jisu Khrista Po, ngokümüzhie Po mu thokümülu mütü Poo, 4Pü ha müzhie mütülü halü thomülu sü, sino hari müzhie kühopühri kübami lü thomüluyi yo, Jihova thokümülu püh halü thomülu küsüo süh no. 5Ha Khrista la müzhie ri ngoyiyo küzho bi, Khristaeno thokümülu ri kha ha tsü yo. 6Mu ha kümüzhieyi ri süo nie po thülükülu mu külaküyi ngoyi kütola, mu ha thokümülu ngoyi zorei süo niepo tho kümülu ngoyi kütola, süo nieri ha müzhie bi kümüzhieküyilü sügüsühe yi tsüsa. 7Mu ha kümüri nieko mütü zoyito, kükrelamole nie hazü kümüzhieyo küzho bi hazü künüri ngoyito tsüla. 8Süla ha küzüko Asia lü kümüzhie kütsü hayo küvo niepo shiemo bansa mo, süo müdeyi kündi pü thizo, mu rhüyiküto ri lü mota zo: 9ha hatho hayolü küsa zhokhro kha ha tsü kütsü lüta; kükrelamole ha thipüh hapo hatho ha mülüta mono Jihova küsami rei thi mürhüyi yo küzhoo münguyi kütola; 10Pü tüsüh kürüh hilü ha süphrayi mu ha külasü mu Pü hisari küsalü u külasüto. 11Süla nieri hazü kükhoyo no küchothi yi tsüsa ngokümüzhie püh güu küsü la mi kükro ha sühlü kümüza poto. 12Ha künüo sü hihi, halü thori ha zhopo thiküba ha uzhotü mu müsamüzi no ciedzü hio mu nieko mhüdzülü müku no ciedzü mhashieo mo vele Niepoo ngokümüzhie püh nieko zü hü küba la. 13Ha thopüh nie kütsü mha kükre mo, vele nie phri mu shieyi küveko zo, süla nie shie mütsüyi küto müri yo. 14Nie hayolü hu shieküyi la Niepoo Jisu zho nha nie hala nienü to mu hari niela hanüyi to. 15I hi shietü kütsüla hidzü nieko cie vo müra kütsü lüsü, sino nieko po künü kürükri ngoyi kütola. 16I Macedonia lü küvoce nieko püthü mu Macedonia lü la nieko ce vo mu Judea lü küvoce nieko po a cho phi tsü lüh. 17I siton lü kütsüce I lü kürüjo me? Mori I thipho müdo züno to, mo simo? 18Vele Jihova no dzütho tsü bino, hadzü püh niecie küsüto mori mo simo, 19ri Silvanus mu Timothy hako püh niecie zhopo thiküsüo Jihova Nuo, Jisu Khrista, yolü pütü mütülü to sitsüo zo. 20Kükrelamole Jihova po küsüko pü oh siyo süla ha Amen sipüh Jihova zapozaleo yo süyo. 21Pü Khrista yolü uko thi kümütü sü mu ha kütsü püh niecie sü; 22Püh hayo soma vüve mu hetü ropüri kha ha mülülü süve. 23I Jihova za cüpüh a zhopo thiyo süo I tsüo va Corinth lü vori mo küta nieko la küve zo. 24Ha nie kümülümho kükha te sitsüo mo vele nie künü po kroyi kütola nie kükhrühi mi zo, kükrelamole nie kümülü lü tha mütü kübala.
Currently Selected:
CORINTHMIKO KÜNAO 1: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
