CORINTHMIKO KÜNAO 2
2
1I nieko lü thi müshü la mo kütola nieko cie vo mo küto müdoyi te 2I nieko lü thi müshüsü tsüsa sopüh alü tho müluyi veta, I ulü thimüshüküsüko zo kümosa? 3Süla I dzü thopüh nieko cie sü kükrelamole a küvo tüce a thipüh anüyi kütsü müsüh mako yolü alü thi müshü küva kümüprü la, I nieko mülükhro küba a künüo sü nieko mütü nü zo kütsüla. 4Süo I kümüzhie mu alü thi no amhüdzü mükri zono nieko lü thi müshü vamo vele I nieko khrüshüba kütsü nieko po sheyi küto la thosü. 5Vele humi ulü shütari süo alü thi müshüvamo vele küdopüh nieko mütü thi müshüve. 6Sümi makro u müjoküta tsüpi sazho khatsü sa mori ve, 7vele nie uko küjova mu ulü thomüluyi te, pü lüzhiepo püthi müshü tsüntsova mo kütola. 8Süla I nieko po sümi khrü kütsü tha uka lasü no choyo. 9Hihi lano I thopüh nieko ce küsü nieko mha mütülü dzüzü tühlü ba memasi tsü sheyikütola. 10Nieko mi kühopüh küjo ri vasü tayo Iri vasü vayo. I vatsü küva süo nieko lano Khrista mhüdzülü vatsü vayo. 11Satan po uko yolü u mhopü thimokütola: kükrelamole uko pü doko shemo ba motsüla. 12I Troas lü Khrista dzüyiküve poto küvoce ri Niepoo yolü ciekha khri a tsüsü, 13vele a sazüo Titus ngoyi mo kütala a lü rüyiyi mota, süla ta Macedonia lü vote. 14Jihova müza, pü Khrista yolü ha süta pü kuküyi müshesüyo mu hayolü Püh sheküyi rüh küthünyü thüthi kühorapühri müshe süyo kütsü la. 15Süo ha Jihova mhüdzülü Khrista rüh küveo thite, külayi kütako mhüdzülü ri mu kataküzüko mhüdzülü ri: 16Kropüh la küsalü no küsalü küvocho mu kükreko la kürhülü no kürhülü küvocho. Mu somi si kütsü thiyi shüh-a? 17Hano thüma kükro Jihova dzü thimüshüh kütsü bimo: vele ha pü mhüdzülü müzi, mu Nyepoo mhüdzücie ha Khrista la dzü po yo.
Currently Selected:
CORINTHMIKO KÜNAO 2: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
