THESSALONIAKO KÜRAO 2

1Kekrelamori sazüjürako, neko thozori seba hako ta nekoce kevori, süo kemethu thi va mote. 2Vele süsa zori hako kemezhe, sü mhüjü hako kha kethengalü sü, neko seba Philippi lü Jihova la hako Jihova jüyikeve thepu shude popü neko cesü ketüshu tilü. 3Kekrelamori hako tahi tarho kesüko kemeda jümo, mori keresü kereva mori uhü thimekre tilümo, 4Vele Jihova hako melü sü keva jüyikeve süo hako potazo, thüma nü thinyüsa tizhümo, vele Jihova hako melü dojü pe kevazhü. 5Kekrelamori mishu keti kethokemojü mhapüceri pophra yomo, neko seba, mori mhakemeho kezhu püri tamozo, Jihova sü zhopozo. 6Mori thüma celüthechu therho kephu hayo tamo, mori neko celü sheri, mori kekremi celü sheri, ha neko lüzhe kethi khasü tari vezo sheri Khrista la ha apostle thi ketalü. 7Vele ha nedolü ketace tsümela, natsimi kethekü dipü biyosheri sübi tazo. 8Süla neko yo hanüsa, hako kelü neko po seyi kenyü, Jihova jüyikeve lebimo, veleha kerhüro sheri zo, kekrelamori neko hala khrüri tazo. 9Kekrelamori sazüjürako, neko rekra ba metse hako thehethi mhatho thi kesü, tüso tüzü metülü mhathothi, kekrelamori hakoyo neko po uma thikemo, hako Jihova jüyikeve zhopo thi pü nece sü. 10Neko süo zhopoko zo, mu Jihova sheri, hako dipü bide, mesa, jütho, mejoyikesu, thide hako nedolü ba vorishi; 11Hako dipü bide mi tahitarho, milü thomelu, mu nekehopü pori thino, züno posü, mipone mipü ununeko yo thi kesübi. 12Nekopo Jihova mhüjülü tayi keshü kethi, pü neko cüpü pü kederevü lü mu zapozale lü kesü bi. 13Mhasüo lari hako Jihova kemeza thiphayiho bayo, kekrelamori neko jüzükeyice, hako yo süosesü te, neko thüma celü ngokeyi bi tamo, jü süo kethotüzo ziti, Jihova jü, neko melü keyi bi neko yo süo thi süte. 14Kekrelamori neko sheri, züneko, Jihova kehuko Judea lükeba Khrista Jisu lü ketako saji thite; kekrelamori neko neko rünalü kemezhe keyi mhatho kemha kebide kemezhe süte Jewmiko belü. 15Süko Niepoo Jisu dokhri, mu saju keseko ri dokhri, mu hako sheri methi meni, mu uko Jihova nümothi, mu thüma metü zhotherü. 16Hako po Gentile miko ce jüyikeve pohino hako vakha, ukopo kelakeyi ngoyi mo ketola, uko kephoma lü tsü lazo; süla lekhu kerütho ukoyo ku zoto. 17Vele uko sazüjüra kethiko, dopü neko zü kekho tazo sheri, umelü lü kekho tamo, neko zü kengo sala keto menyü mekroku tate 18Nekoce vori nyüzo, I Paul zo sheri, vapü sala, vele Satan chokha thi bate. 19Kekrelamori hako kemeri dipü ba sheri, mori kenü mori rerthu keto kede pira? Neko hizo mome Niepoo Jisu Khrista mhüjülü ba keto pü kevori tülü? 20Kekrelamori nekohi hako zapozale mu kenüzo.

Currently Selected:

THESSALONIAKO KÜRAO 2: NAG5BSI

Highlight

Copy