MATI 8
8
Amikonem Jisuke Ipíkuname
(Mk 1:40-45; Lk 5:12-16)
1Bíkke díítelok oidokuem deddína amie bíkke méélamlo mamín getoku. 2Delo tíídna amiko aala bíkke keralo peladola poto, “Ruutum, nokke míísang emílo, no ngom ipíyéku”.
3Jisu bí agí alage meetandola amidem ukkídola poto, “Ngo míídung, deetolangku”. Menang asak ami delok tííd kiname aikaku. 4Delo Jisu bí amidem poto, “Tattola, sékomete pomapeka idola jonnampe Mirilo gíla bím kaamo toka delokke nokke aikunamem lengkan nape Mosike ponampe amanem bilangka.”
Rom Amolokke Migom Béérang konem Jisuke Ipíkuname
(Lk 7:1-10)
5Edílo Jisu bí Kapernaumlo píítodí, delo sipaying ruutum kone bíkkíng aala, igul koto. 6Bí pokai, “Ruutume, Ngokke béérange ekumlo gíkén yimape keddung delokke pesorupe kidung”. 7Jisu bí bím poto, “Ngo gíla bím ipíyé”.
8Delo sipaying ruutum de pokai, “Ruutume ngo nom ngokke ekumlo aamopeteng annyisue idung. Depe iname agom atel petomko pobiyika delo ngokke béérange ekeryéku. 9Kapeila ngo agíete ami rumkílo dung; ngokke rumkí loteng sipaying kadung; ngo akonem ‘gíkaala’ emmílo, bí gído; delokke akonem ‘Aato’ emmílo, bí aado. Delo ngokke béérangem ‘Sim ilangka’ emmílo bí dem ido”.
10Edílo Jisu bí dem tattodí, delo bí sai “emla” míídola bíkkíng gímín gena kídíem pokai, “Ngo nolum aro rupe podung, Ngo Israel aralo sikepe míngkeng edíína atel kokom kaapamang. 11Ngo nolum podung, bosie sanggo loklang anggo danlok aala, teyong amonglo Abraham, Isaak delokke Jakob bulum duubosula doomanlo dobosuyé. 12Idola among delokke ami kídíem luyulo, kaamo ruruklo yoppakyé, delo iipangem koteksula kapnam ríínam mílípe iyé.” 13Delok rongem Jisu bí sipaying ruutum dem poto, “Gíka langku! Nokke arope iyé emla míínam kísape iyé”. Delo béérade delopak aikaku.
Jisuke Bosi-borang Amiem Ipíkuname
(Mk 1:29-34; Lk 4:38-41)
14Edílo Jisu bí Pitorke ekumlo aatodí, delo bí Pitorke ayo anem ippulo kisala keddope kaato. 15Bí bíkke alagem ukkí toname ramnam kiname nyokkaku, delo ayo anede bím ibo saabokupe emla gereptoku.
16Adenge pííyédem, urom duubomnam ami kídíem bíkkíng bojéko bomabito, delo bí urom kídíem agomlok lupak langkula, kina takamdem ipítoku. 17Shédíke Kaaluna miri Isaiahke ponam agomem aromope emla depe ikai,
“Bí ngoluke deemangem laanyok bito,
delokke ngolum kimona kídarem bomnyokbito.”
Jisukíng Gímín Genam Are
(Lk 9:57-62)
18Edílo Jisu bí bíkkíng gígoo mínna ami kídíem kaasutodí, bí sine rotkondelo koodope lulíkto. 19Delo ukilkone bíkkíng aala, poto, “Babue, no ingkolo gíyédí, ngo nokkíng gímín gepe.”
20Jisu bí poyansuto, “Ménsurungke arung kado delokke pettangke asup kado, idakkom Tanike Ue bíkke dumpongem ingkolote leepeko kamang.” 21Delo luyilsuna akone pokane, “Ruutum, ngom kerape gímo langkula ngokke abuem yumopoyika.”
22Idakkom Jisu bí bím poto, “Ngokkíng gímín getola, delokke sina kídíem agí agí simangem yusu motoka.”
Jisuke Gumnam Asarem Eetet Mokuname
(Mk 4:35-41; Lk 8:22-25)
23Delokrongem bí etkungdelo aato delo bíkkelo luyilsuna kídíete bíkkíng gímín geto. 24Delo gumgíng kamarupe sine paatang delo séngéépe gumname ila, delo etkungde sipyardelo kuppé kupléla ikai. Depe iduemte Jisu bí ipla dooto. 25Luyilsuna kídíe gíla bím utrepdola poto, “Ruutume, ngolum mopítoyi! Ngolu nyok dakbong!”
26Bí pokai, “Míngkeng pííramna kídí nolu, kapeila deddípe pesokane?” Delo bí darep langkula gumnam asar demlang sipyar dem luto, delokrongem de eetet kaku.
27Ami kídí de kapei emla íngkíbosuto, “Si kapena amikoi? Asarelang sipyarete bíkke agomem tatbito!”
Urom Duubomnam Annyikonem Jisuke Ipíkuname
(Mk 5:1-20; Lk 8:26-39)
28Edílo bí rotkonlo Gedaren#8:28: Ayokon agome Gergese, abíde Gerasen emdung. amolo píítodí, delo urom duubomnam ami annyiko ago kídarlok lenla bím ríksuto. Bulu írmí ormo iname sékote delok bedang delok gítakna kamato. 29“Shédíke Ue, no ingkoko ngolum ipe míídune?” emla bulu gokkai. “No ngolum moodíe píímang adape iréékape emlangía aadune?” emla pokai.
30Depe iduem buluke yéko delokke mooteng gamlo yékbamko dotala yéto. 31Urom kídíe Jisume “No ngolum monpak kupemílo, ngolum yékbam elo melíktola,” emla roguto.
32Bí bulum “Gílangka” emto. Delo bulu gílen langkula, yékbam delo gíto, delo yékbam tabude sine robengkíng dukboo danla, asidelo olíkla siyinkai.
33Éék kaabomna kídíde duklangkula taondelo angkaku delo sim inam takam simlang urompe tumna ami kídí delokke legangemte pokan bitoku. 34Delokrongem taon tabung delokke amie Jisume kangkíkape emla gílento. Delo bulu bím kaayédem, buluke amolokke gígéé dokupe bím roguto.
Currently Selected:
MATI 8: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
