MATI 9
9
Amíl Olekone Sina Amikonem Jisuke Ipíkuname
(Mk 2:1-12; Lk 5:17-26)
1Méélamdem Jisu bí etkungdelok koolangkula agí doolupe entoku. 2Delo amieke ippulo dooyarna amíl olekone sina amiko bíkkíng bomabito. Delo Jisu bí buluke míngke sunamem kaala, kinadem poto, “Ue edíípe míílangka, nokke paab kídíem ayala mepakbito.”
3Sim ukil ayoko kaala buluke aralo agí agísue posuto, “Si ami si Shédíme lukaadung!”
4Delo Jisu bí buluke aapíem kénbom dola pokane, “Noluke aange kapeila míínyingkane? 5Ingkuem pobayadone, ‘Nokke paab kídíem mesambito,’ emnamdía demangkom ‘Darepla gíto’ emnamdía? 6Dekom tani amoso Tanike Ue paab kídíem mesam ladung dem nolu kényépe emla idung.” Delokrongem bí amíl olekone sila kina amidem “Darepla, nokke ippuem bomlangala ekumlo gíto langku” emto.
7Amide darepla ekumpe gítoku. 8Dem kaala milude pesorunge ito; delo bulu sikena ralnamem tani kídílo binamem kaala Shédíme yidgeto.
Jisuke Matime Tomlenname
(Mk 2:13-17; Lk 5:27-32)
9Jisu bí delok gídungem, Mati emnam amiko kajanang ulko opislo duudope kaato, “Ngokkíng gímín getola” bí dem amidem emto, delo Mati bí darepla bíkkíng gímín geto.
10Jisu bí Matike ekumlo yume dobo dongo dungem, kajanang ulna kídíeke delokke “Paabgena” kídíeke aala bíkkíng lang bíkkelo luyilsuna ami kídílo dobosukai. 11Pharisi kídíe dem kaayédelo, bíkkíng luyilsuna kídíem, “Kapeila noluke babude kajanang ulna kídí lolang ‘Paabgena’ ami kídílo dobosukane” emla íngkíto.
12Dem tatla Jisu bí poto, “Amíl ekernade daktor kaabomang, idakla kinemin kaabodune. 13Nolu gílangkula ‘Ngo ipagem pemílo, ayang emmin míídune’ emnam agomsok leríngem kénto langku. Kapeila yéjipe míísuna kídíem ngo tomkape emla aamang, idakla paabna kídíem tomkape emlamin aadune.”
Domape Duuromnam Legange
(Mk 2:18-22; Lk 5:33-39)
14Delokrongem Baptist Joankelo luyilsuna kídíe aala bím sikepe tatkíto, “Ngolulang, Pharisi kídíe nyodíem domape nyodung, idakkom nokkíng luyilsuna kídíe domape nyokímang, si kape inamei?”
15Jisu bí poyansuto, “Makbode bíkke mibo kídíem duubo sudung adape kape kísa bulu ankípene? Longeko makbodem bulu kelokke laanyok díku moodíe pííyé, delomin bulu domape nyoyéne.
16“Sékote ege aníem ege akulo omtakna kamang; depe imílo omtakde bétla, de bétmík yayang imodung. 17Delokke amikídíe onggur alang aníem gíri akulo purlíkna kamang. Bulu depe imílo, gíride bukkéyé, delo onggur alangde toolenyé delokke gíride benmíkyé. Idakkom onggur alang aníem gíri anílomin medune, delomin annyide edííyéne.”
Migom lokke Omelang delokke Jisuke galugem Ukkína Mimeko
(Mk 5:21-43; Lk 8:40-56)
18Bí sim agom sim bulum pobidungem, ruutumkone aala, bíkke keralo peladola “Ngokke ome supak pak sikai. Idakkom aala, nokke alage ukkí bimílo, bí turyéku,” emla pokai.
19Jisu bí darepla bíkkíng luyilsuna kídíem gíbola bíkkelo gímín geto.
20Dekepe idopakdem dítak íying kolang annyi kokai iyyi bíttína mimekone bíkke méélamlo aala bíkke galugem ukkíto. 21Bí agísue, “Ngo bíkke galugem ukkí petom dokom, ngom ipíyé,” emla posuto. 22Jisu bí ngéngkut sudo langkula mimedem kaato. Delo “Ome, aange edíí langka, nokke míngkenge nom ipítoku” emla poto. Delok rongem mimede delokke ila kiname aikaku.
23Jisu bí ruutum delokke ekumdelo aala, tapung mulla inakídí demlang kapla rííla inakídí dem, 24bí poto, “Nolu gígéétoku. Mimeko si simang, ipdu namino” emto. Delo bulu bím ngilkaato. 25Méélamdem ami kídíem gígéé morodem, bí aala mime koodem alaglo boto, delo koode gerepkaku. 26De koborde delo amo delo byargongkai.
Mingmana Annyikonem Jisuke Ipíkuname
27Jisu bí delokke gílen dakkuem, mingmana ami annyiko bíkkíng mamín gedola, “Dabidke Ua, ngolum ayang toyika” emla gokto. “E, Ruutum” emla bulu pokai. 28Méélam dem bí ekum aradelo aatoname, migmana ami annyide bíkke ayirlo aato. Delo Jisu bí bulum, “Ngo sim ilayé emla nolu arope míídunía” emla ingkíto.
“E, Ruutum” emla bínyi pokai.
29Delo bínyike amigem bí ukkí bidola poto, “Noluke míngkesunam kísape de idaklangka,” 30delo buluke amige migdar kaku. Jisu bí bulum “Sim séko meteng kénmo mapeka” emla pogapto. 31Idakkom bulu gíkakune de koborde delo amodelo gígongkai.
Agom poyimana Amikonem Jisuke Ipíkuname
32Buluke gídakkuem, urompe tumna agom polang yimanako Jisukíng bomalíkto. 33Uromdem monpak rongkuem agom pokén yimanade polenkaku. Delo milung ami kídíe sai emla kaadola, “Israel ami aralo edílokom sikena ami kerape kangkí rumangai” emla pobosuto.
34Idakkom Pharisi kídíde emkai “Urom ruutum lokmin bí urom monpak nana ralnamem paatune”
Agér Gérna Kídí Si Anyodung
35Jisu bí taon takam lola doolung-doolulo gígoola, yétalokke ngiitom tatporuna agomem pogoola delokke kina ramna mipíem ipíbito. 36Mibamdem bí kaasukane, bí bulum ayang kaapasuto, depe emnamde bulu yébona kamape ina, ankí kenona mér sobén kísa ito. 37Delo bíkkelo luyilsuna ami kídíem poto, “Alie alummang idola isiine anyoodung, 38delok legape ali Ruutumem bíkke aam aríklo nyiipena amiem melík dope kotoka.”
Currently Selected:
MATI 9: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
