MATI 7
7
Amiem Bisarname
(Lk 6:37-38,41-42)
1“Amiem bisar mapeka, demamílo nolumkom bisaryé. 2Noluke amiem bisarnam kísape nolumkom bisaryé, delokke noluke lugenam kísapakpe nolumkom lugeyé. 3Nolu agí amig lokke botteyana takodem kaasumape noluk bírolok amig takodem kapeila kaadune. 4No agí amiglo botteyana takodem getídula nokke bíruem kape kísa ‘Nok amig takodem ngo ibíntoso’ emlayéne? 5Aromana kídí nolu, kerape agíke amig takodem laapak supotoka, delomin nolu noluke bírolok amig takodem laabíndope kaapayéne
6“Deena atíem ekii kídílo bimapeka; noluke gumí dogíngem ééklo yobbi mapeka; bulu dekedem alelok tujém tuyémla iyé, delokrongem tuulat sulangkula nolum ammínkope ipelo.
Kolangka, Matalangka, Pigalangka
(Lk 11:9-13)
7“Kolangka delomoko nolum biyéne; matalangka, delomoko nolu paayéne; pigatoka delomoko nolum eyabem siyya biyéne. 8Legade séko bulu kodudí, bulu paadung; séko matadudí bulu paadung; delokke piganem eyabem siyyabiyé. 9Nolu séko, ue donam komílo, elíngko binako kayéne? 10Demangkom bí engoko kodumílo, tabíko binako kayéne? 11Demílo nolu kanínge idolate noluke ome-uem aina amanem binamem kéndumílo, edítko pakyape teyong telo duuna noluke Abue bím kona kídíem aina amanem biyéne!
12“Depeila takam legangem amie nolum kape iyém aipe míídudí, nolute bulum dekepe ilangka; de agom demoko Ayon emlang Kaaluna miri kídíke luyilem poyindune.
Ajokna Luyabe
(Lk 6:43-44)
13“Ajokna luyabdelok aatoka. Kapeila luyabde bottedola bepoona bedade nyokpekolo gílíkdung, delokke alume delok gídung. 14Idakkom luyab tapétnade delokke bedang ajoknade turpekolo gílíkdung, delokke delok boséyange gídung.
Esing Ayélo Luyiisuname
(Lk 6:43-44)
15“Mena kotoki kídíem ansulangka. bulu nolukíng mér sobén egem gela aayé, idakkom aralo bulu pesonam sipyange. 16Buluke ayélok nolu bulum kangkénsuyé. Tanie taang esiilok onggur ayé kídarem delokke taanyum gooralok tapang ayém píldunía? 17Deke kísape esing aina miyode aina ayém éédung, delokke aimana esing emin aimana aayém éédune. 18Aina esiide aimana ayém éémang, delokke aimana esiidete aina ayé éémang. 19Atímape ayé ééna esing miyodem beeletla emelo romdo. 20Dekepe ila buluke ayélok nolu bulum kangkénsuyé.
Edílokom Ngo Nom Kangkénmato
(Lk 13:25-27)
21“Ngome ‘Ruutume Ruutume’ emla goktína miyode teyong amolo píímayé, idola teyong amolo duuna ngokke Yayike míínamem inademin pííyéne. 22Delo longedelo bosi amie ngom ‘Ruutume, Ruutume ngo nokke amínlok polupoor agomem pola delokke urom kídíem nokke amínlok monpakla delokke deddína irisinyo agérem imanía?’ 23Delo ngo bulum jonnampe poyé, ‘Edílokom nolum ngo kangkímang, atímape agér inakídí nolu gígéétoku!’
Ekum Mona Annyiko
(Lk 6:47-49)
24“Delok legape ngokke sim agom kídar sim tatna mipíde delokke dekedem igenade lííreng teyolo ekum mojina kísadung. 25Pedonge ola, korong asie goola, delokke asare mulla ekumdem muddasuto, idokom de lííreng teyolo mokeenam legape oletmang.
26“Idakkom ngokke sim agom kídar sim tatgeyéla delokke dekedem igemana miyode siiyé teyolo ekum mona mide kísane. 27Pedonge ola, korong asie goola, delokke asare ekumdem munname, delo de ekumde bénletla bénmík sukai!”.
Jisuke Ralname
28Edílo Jisu bí sim agom kídar sim poyintodí, bíkke kíbinam dooyidem mití maglínge irisinyope mííto, 29Kapeila bí buluke ukil kísape pomape, ralnam kana ami kísape ngiitomem poto.
Currently Selected:
MATI 7: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
