MATI 6
6
Dokang Legangem Poboname
1“Ansulangka; amiem kaayé tayyépe emla, buluke keralo nolu dormo agér imapeka. Nolu depe imílo teyong telo duuna Abukelok aman paamayé.
2“Depeila no edílo opan kídíem dokang biyédí delo aromana ami kídíe kumkeng ekumlo delokke bedu bedalo, amie erkíyépe emla inam kísape, agíe lengkan sumapeka. Ngo nolum aruem podung, bulu agí agí paapenamem paatobong. 3Idokom edílo nolu dokang biyédí, noluke lakbíge ingkuem idudí dem lakkém kénmo mapeka. 4Demin noluke dokangde pesuppe iyéne. Delo pesuppe kaana noluke Abu bí nolum amanem biyé.
Kumnam Legangem Poboname
(Lk 11:2-4)
5“Edílo no kumyédí, delo yadgoona kísape imapeka, kapeila bulu amie kaayé tayyépe emla kumkeng ekum lolang bedum ampelo dakla kumnamem aipe míídung. Ngo nolum aruem pobidung, bulu agí agíke paape namem paatobong. 6Edílo nolu kumyédí, nolu ruum aralo gíla, eyabem sittum pala delo noluke kaapa manam Abume kumlangka. Delomin noluke pesuppe inam atíem kaana Abu bí nolum amanem biyéne.
7“Delokke edílo nolu kumyédí, mipak kísape are kamana agomlok kummapeka, kapeila bodope kumkolok Shédí bí taddung emla bulu míídung. 8Buluke kísape imapeka, kapeila noluke míínamem bím komang adapekai noluke Abue kéndung.
9“Sikepemin nolu kumpene:
‘E, ngoluke teyotelo duuna Yayia,
nokke amíne duuyar kalangka,
10nokke amope ikalangka;
teyong amonge kape kísa idudí
delok kísape tani among sote nokke míngkampe idaklangka.
11Ngoluke dope tíípe namem
silo bika.
12Ngoluke ajéng genem ngolu kape kísape ayatuadí,
delokke kísape ngoluke ajéngemte ayala metoyika.
13Ngolum darkang pekolo gímomapeka,
idola atímana lokke ngolum umbom langka.’
14“Legade ami imemem nolu mesam yémílo, ngoluke teyong Abuekom noluke imemem mesambiyé. 15Idakkom nolu ami imemem mesam bimayémílo, ngoluke Abue noluke imem emkom mesam bimayé.
Domape Nyonam Legangem Poboname:
16“Delo edílo nolu domape nyoyédí, depe iyém aromana ami kídí kísape nabbula duumapeka, kapeila buluke nyonamem amie kaayérupe emla buluke mingmue morukdung. Ngo aruem nolum podung, bulu agí agí paape namem paatobong. 17Idakkom edílo nolu nyoyédí, delo noluke dumpolo tél molsula delokke mingmuem momik sulangka, 18demílomin nolu nyodung emla amie kangkén mayéne, idola noluke kaapa manam Abu petome kényé; delokke noluke pesuppe inamem kaana Abu bí nolum amanem bisuyé.
Teyong Amolo Miremname
(Lk 12:33-34)
19“Takíd elang yokyé doko, doppyo tíísine aala pyoonyok peko tani amoso agíke ekurangem memapeka. 20Idola yokyé takíde domangko, delokke doppyo tíísine aala pyoola mangko teyong amolo, agíke ekurangem mesiilangka. 21Legade ingkolo noluke ekurange duududí delo aangekom duuyé.
Amíl Lokke Angune:
(Lk 11:34-36)
22“Amig si amíl lokke merue. Noluke amigde aimílo, noluke amíl tabude angunrunge iyé. 23Idakkom noluke amigde aimamílo, noluke amíl tabude kaamorunge iyé. Nolukelo duuna angunde kaamo dumílo, de kaamode edítko pesorunampe idun!
Shédí Delokke Ekurange
(Lk 16:13; 12:22-31)
24“Sékote ruutum annyi aralo agér ilamang. Bí akonem míímala delokke akonem mííyala iyérung, demangkom bí akondelo mínggapyé delokke akonem mepakyé. Nolu Shédí melang murkongem kumpe sulamang.
25“Delok legape ngo nolum podung, noluke yépenam legape ingkuem dolapei demangkom tíílapei; demangkom noluke amíl legape ingkuem gemíloi emla míídír sumapeka. Turnamde donamem botte yamanía? 26Taleng telo yopna pettang kídíem kaasutola; bulu ngiimang remmang demangkom kumsulo gekummang, depe ilate noluke teyong Abue bulum donamem bidung. Nolu bulum pemílo are kayamanía? 27Nolu séko ankípe míngkolok noluk turpenamem anyongko turbyan moladun?
28“Ege ebe legape kapeila míídír sudune? Kaasutola aríklokke lili appune kape kísa siisa sudune. Bulu ankípe ngiimang demangkom enno koteng momang. 29Depe idola ngo nolum podung Solomonteng deddípe mirem lateng sok appun kídísok kísape kampona ege gemang. 30De kepe Shédí bí arík lokke ííng kídí, silo dung delokke nyampo emelo rompak kupe namemte udumílo, E míngkeng pííramna kídía, bí nolum ege galuk bimape duuyénía?
31“Dekepe iname, ‘Ngolu ingkuem dolapei?’ demangkom ‘Ngolu ingkuem gelapei’ emla míídír sumapeka. 32Kapeila mipak ami kídíemin dekedelo mata tatídune, delokke noluke teyong Abue dekedem noluke míínamem kéndung. 33Idakkom kerape bíkke yétem delokke bíkke yéjinam bedangem mata pootoka, delo sim takam simte nolum biyé. 34Delok legape nyampoke legape míítí mapeka, kapeila nyampo kedem nyampo míísuyé. Longe miyodelo egetsue kasudung.
Currently Selected:
MATI 6: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
