MATI 25
25
Mime Íyingkolo Luyiisuname
1“Dekepe iyédelo teyong amode, agí agí meruem bomla makbuem gírík sukape gílenna mimum íying kísa iyé. 2Pilngode míírusuma neke delokke pilngode mííru suneke. 3Mííru sumana kídíde buluke meruem bomtuai idola tél atí bomtak sumang. 4Míírusuna kídí dedan gílenla agí agí télem bomtaksula meruem bomkai. 5Delo bulu immiyé ila ipto.
6“Yoh raajang delo ‘Sina makbue píídune! Bím gírík sutola’ emla ebínpe mankai. 7Delo mimum takamde darepkai delokke agí agí meruem nyotkai. 8Mííru sumana kídíde míírusuna kídídem, ‘Noluke tél ayokonem bisui; ngoluke merue middakbong’ emto. 9Bulu ‘Bisulamang, nolu kepelang ngolu kepe pííramyé. Dempenem télkona kídílo gíkala nolu agí agí kepe resu tolangka.’ emto. 10Idakkom bulu tél repe emla bedalo ennge sudungem, makbode pííputo. Míírusuna nyamne aro kídíde bíkkíng nyamranlo aabosuto. Delo eyabem sittumto.
11“Méélamdem abíd dete píídakku. ‘Migome! Migome, ngolum eyabem siyya bikui’ emla bulu gokto. 12Idakkom bí poyansukai, ‘Ngo nolum aruem podung, ngo nolum kénmang.’
13“Delok legape ansulangka, kapeila aadíku longem, gontem nolu kénsumang.”
Béérang Angumkolo Luyiisuname
(Lk 19:11-27)
14“Lekoda, teyong amode amikone mibolo endakla, agíke béérang kídíem tomla bíkke sérangem bulukíng melíknam kísape idung. 15Akondem bí murkongem jarngoko bito, akondem jarnyiko bito, delokke akondem éjarko bito, mipildem mipil adulok bito. Delokrongem bí mibolo enkai. 16Jarngoko paanade menape gíla bíkke poisar delokke agér gérname jarngoko paapek lento. 17Dekepe jarnyi paana deteng jarnyiko paapek lento. 18Idakkom jartel paana amide gílenla, among aralo deerungko koola delo bíkke ruutumke abalem yunyokto.
19“Oolko doorongem delok béérang kídí delokke ruutumde enang langkula bulum isabem ibosutoku. 20Jarngo paana amide jarngo konko bomato. Bí pokai, ‘Ruutume no ngom jarngoko bila melíkto. Kaasutola, ngo jarngo konko paapekto.’
21“Bíkke ruutumde poyansuto, ‘No aina delokke míngkesuna béérange, airudo! No anyongo atílok míngkesupa; ngo nokkíng atí takamem melíkyé. Aatola, delokke no nokke ruutumke ashéngkolo ashéng mínlangka!’
22“Jarnyi paanade angkai. Bí pokai, ‘Ruutume, no ngom jarnyiko bila melíkto; kaasutola, ngo jarnyi konko paapekto.’ 23Bíkke ruutumde poyansukai, ‘Aina delokke míngkesuna béérange, airudo. No anyongo atílok míngkesupa; ngo nokkíng atí takamem melíkpe. Aatola, no nokke ruutumke ashéngkolo ashéng mínlangka!’
24“Delokrongem jartel paanade aato. Bí pokai, ‘Ruutume, ngo nom míngkam keramna amiko, nokke kuujéng mangkolok no ali gatkunako delokke nokke pidjé mangkolok giidum sunako emla kénto. 25Depeila ngo pesola, gíla nokke abalem among aralo mesiito. Kaasutola, sina nokke abale.’
26“Bíkke ruutumde poyansukai. ‘Atímana loobakna bééra no! Ngokke kuujé manam aliem ngo gaddokupe delokke pidjé manam amliem ngo giidum sudokupe no kéntonía? 27Demílo, no ngokke poisarem bénglo melík penamíai! Delo ngokke aalat yékuem ngo ngokke laabem paatak suyékuai. 28Éjar murkodem bíkkelok laalangkula jarying kana amidelo bitokuka.’ 29Legade séko kadudí bím bojéyape biyéku, delo bí jéyé. Séko kamadudí, bíkke kanam anyong emteng bíkkelokke laabín yéku. 30Delokke ‘dem loorímana bééradem luyulo kaamo ruruklo yoplíkto, delo kapnam ríínam mílí delokke iipange koteksuna mílí iyé.’
Iyinnana Bisare
31“Edílo Tanike Ue angun ralnamlok aayékudí, delokke teyong kotoki takame bíkkíng aabo suyékudí, delo bí angun kanarung teyong amolokke palenglo duuyé. 32Opín takamem bíkke keralo goodumsuyé, delo ami kídíem mér kaabomne mér sobén kídarem sobén kídar lokke langusunam kísape bí akonlokke akonem langu suyéku. 33Mér sobénem bí agí lakbík danlo delokke sobén kídíem bíkke lakké danlo meyé. 34Delokrongem Rojade lakbíklo duuna kídídem poyé, ‘Aatola, nolu ngokke Yayike lubéélíknam kídíe; noluke dungko tarongem tani amongem pílendak delokai nolukepe meruubinam amongem laalangka. 35Kapeila ngokke kenola yédungem nolu ngom dope namem bito, ngokke tíílíla dungem nolu ngom tíípenamem bito, ngokke mibope endungem, nolu ngom dobo tomto, 36ngokke mílípe yédungem nolu ngom ege galugem bito, ngokke kila duudungem nolu ngom kaabomto, ngokke pateklo duudungem nolu ngom kangaato.’
37“Delokrongem yéjina kídíde poyansuyé, ‘Ruutume edílo ngolu nom donam bidope, kenodope kaatone, demangkom tíípenam bidope nom asi tíílídope kaatone? 38Edílo ngolu nom dobo tomdope. no mibope endope kaatone, demangkom ege galuk píllíkdope nom arape yédope kaatone? 39Edílo ngolu nom kangaadope no kidope demangkom pateklo duudope kaatone?’ 40Rojade pobiyé, ‘ngo nolum aruem pobidung, nolu ingkuem sim amé yalumna ngokke bírokídí sim ibitodí, nolu ngomkom ibito.’
41“Delokrongem bíkke lakké danlo duuna kídí dem bí poyé, ‘Nolu uyu kepelang delokke uyu kotoki kepe iruubinam, miyyimana emelo béélíknam kídí nolu ngokke lokke gígéétoku. 42Kapeila ngokke kenola duudungem nolu ngom atí dopenam bimato; ngokke tíílíla yédungem nolu ngom tíípenam bimato, 43ngokke mibope yédungem nolu ngom dobo tommang, ngokke mílípe yédungem nolu ngom ege galuk píllík mato, ngokke kila delokke pateklo duudungem nolu ngom kaapatmato.’
44“Bulukom poyansuyé, ‘Ruutume, nom kenodope demangkom tíílídope demangkom mibope yédope demangkom mílípe yédope demangkom kila duudope demangkom pateklo duudope kaatola, ngolu nom edílo igulmape itone?’ 45Bí pobiyé, ‘Ngo nolum aruem pobidung, ingkuem nolu sim aména kídíkepe imatodí, nolu ngomkom ibimang.’ 46Delokrongem bulu nyokyimana ingéékolo gíyé, idakkom yéjina kídí dedan turyar pekolo duuyé.”
Currently Selected:
MATI 25: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
