MATI 24
24
Jisuke Kumkeng Ekum Bénkupenamem Poboname
(Mk 13:1-2; Lk 21:5-6)
1Méélamdem Jisu bí kumkeng ekum delok gílen dakkuem, bíkkelo luyilsuna kídíe bím kumkeng delo písut sunam kídarem kaalíkpe emla mongnyolo aato. 2“Nolu sim atí takam sim kaadunía?” emla bí íngkíto. “Nolum ngo arorupe pobidung, elíng akone akon teyolo kumtem kumlem suyimayé; elíng miyode bényéku.”
Taronange Delokke Ebín Longe
(Mk 13:3-13; Lk 21:7-19)
3Jisu bí Olib dííte teyolo duuduem, luyilsuna kídíe bíkkíng aala pesuppe tatkíto. Bulu pokai, “Edílo de atíde dekepe iyéne delokke nokke angku penam delokke yéyin longe iyodde kapepak iyédí dem ngolum pobika?”
4Jisu bí pobito, “Sékote nolum yadmadope ansulangka. 5Kapeila deddína amie ngokke amínlok, ‘Ngomin Kristo bí’ emla deddínem yadyé. 6Nolu mimagem tatyé, delokke mimak idunaike emnam gomtíngem tatpayé, idakkom nolu kénsulangka nolu pesue emla míípenam kamang. Sikena atíkídí de kaperung aido, idakkom yéyin longe píímangada. 7Opín opíne akmín surepyé, delokke doolu doolunge akmín sulenyé. Among regolo díríkeno delokke mooton taron mílí iyé, 8Si takam si okii kilene.
9“Delokrongem nolum iréé sinyokolo delokke sipe kolo melíkyé, delokke nolum opín takame ngok legalok belumyé. 10Dekepe iyém bosi amie míngke lokke ngéélat suyéku delokke mirulo yadlíkyé; mipile kangki bosuyé, 11delokke delo mena kotoki kídíe lenyé delokke deddína amiem yadyé. 12Rulnam agére bojékolok ayabosuname ansiyéku, 13idakkom séko edíípe yéyinlope duuyédí bí turyé. 14Delokke sim teyong yéta sokke ngiitomem tani among tabuso opín opínlo hakiipe poying gooyé, delokrongem yéyin longe pííyé.”
Pesoruname
(Mk 13:14-23; Lk 21:20-24)
15“Delo edílo nolu kaaluna miri Danielke pobinam, belumrunam nyokmona atíem#Dan 9:27; 11:31; 12:11 kaayédí sim porine tatkén sulangka. 16Delo Judialo duuna kídíe dííte kídarlo dugge langka. 17Séko agí ekum míílolo duududí de oilangkula ekum lokke atíem giilenkupe imapeka. 18Aríklo yéne enlangkula agíke ege galugem langkupe imapeka. 19De longe kídíde koogena mime delokke anyun sunna mimekídí kepe edítko peso penampe iyéne! 20Noluke dugge namde Sabbath longelo demangkom dígínlo imadope kumtoka. 21Legade delo longedelo adír pename lendak delokke ilangala silo melope ikímanam botteruna pesonam longepe iyé. 22Idakkom Shédí bí dem longekídí isabem andeng motung, andeng momang amílo takame nyokyinyai. Legade bíkke tonam amikídí kepe depe idokom Shédí bí longe isabbem andeng moyé.
23“Delo longedelo akone nolum, ‘Kaatola, simin Kristo bí’ demangkom, ‘Kristo bí elo dung!’ emnako paayémílo dem arope míímapeka. 24Kapeila menamlok Kristo emsune delokke mena kotoki kídíe lenyé, delokke bottena iyodem delokke irisinyuem ibola ullennam amiemte paklamílo yadyé. 25Kénsu langka, moodíe píímang adape ngo nolum kerape potosubito.
26“Dekepe iname ami akone nolum ‘Ee mooruk among esi bí dung’, emdakkom gímapeka; demangkom ‘Ruum arasina bí dune’, emyémílokom dem arope míímem mapeka. 27Legade sanggo danlok yaarie latyémílo uadan lokom píídung, deke kísape Tanike Ue aadakkuem iyé. 28Ingkolo simang kadudí delo sogume dumsuyé.”
Tanike Ue Angkupename
(Mk 13:24-27; Lk 21:25-28)
29“De ebín longe kídarde píírong pagem, doonyie rurukyé, delokke poolue angun biyimayé; takare taleng telok oletyé, delokke taleng telokke atí kídare engenyé. #Isa 13:10; 34:4 30Dekepe iduem Tanike Oolokke píídíku iyode taleng telo lenyé, delo tani amosokke ami takame ankí kenue iyé. Tanike Ue taleng doomug telok ralnam kala, botteruna angun ralnam kanarupe aadak kupe bulu kaasuyé. 31Delokrongem bí tomdum sunana muudukna bikul tapungem bíkke teyong kotoki kídílo bilíkyé, delo bulu bíkke tonam ami kídíem among kéényung konlokke kéényung konlo goodum suyéku.”
Tapang Anelok Kangkén suname
(Mk 13:28-31; Lk 21:29-33)
32“Supak sim agomsim tapang anelok kéntoka; sokke aage yayii lenyékuem sokke annete lendoku, delo díyue anínkai emla kénsudung. 33Dekepe iyém, nolu sim atí takam sim kaasuyé, yablelo anín dubong emla nolu kénsupe aido. 34Ngo nolum aruem pobidung, si siirumsi, si atí takam si píímangem nyokmayé. 35Among talenge nyokyé, idakkom ngokke agom kídísi nyokyimayé.
Aadípakku Longe Delokke Gontem Sékote Kénmang
(Mk 13:32-37; Lk 17:26-30,34-35)
36“Sékote aadípakku longem demangkom gontem kénmang, teyong kotoki kídí ekom kénmang, demangkom Uekom kénmang, idakkom Abu petome kénsudung. 37Noahke yédo longe kídídelo, kape ituadí, dekepe Tanike Oolokke aadíku longemte iyé. 38Legade puumu kerang longe kídídelo, ami kídíe dola tííla delokke omum nyameng ibosula delokke nyamran ila, Noahke etkunglo aado longe deloope ito; 39delokke bulum puumue aabomla yuyin bommang adape bulu kape iyédí dem atí kénmangai. Dekepemin Tanike Ue aadokuem iyéne. 40Midum annyiko aríklo yébosuyé; akonem laayé delokke akonem meyé. 41Mime annyiko delot íbosuyé; akonem laayé delokke akonem meyé.
42“Delok legape orol langka, kapeila edílo noluke Ruutum bí aayékudí, dem nolu kénsumang. 43Idakkom sim kéntola; ekum atue edílo yuem doppyone aayédí dem kénsu tuamílo, bí darbomsula delokke bíkke ekumem rulamayai. 44Dekepe iname nolu leemosula duuperung aido, kapeila Tanike Ue noluke míínam sudímang moodílo angkupeke.
Míngkesuna Kolang Míngke Sumana Béérangko
(Lk 12:41-48)
45“Demílo séko ruutumke ekumlo béérang kídíem yébola bulum dodí tíídílo apim bipena míngkesuna delokke kénsuna béérange? 46Ruutume bíkke aayékuem dekepe ibomdope paapenam béérade gérne! 47Ngo aruem nolum pobodung, bímmin bí sérang takamem kaabom moyéne. 48Idakkom béérade atí manako imílo bí agíe sikepe posuyé, ‘Ngokke ruutume oolko duunyokyé’, 49emyé delo bí bíkke béérang ajonem demla delokke tíngír doírsula duuyé. 50Béérang delokke ruutume longeko bíkke kénsumape yédungem aayéku. 51Bí bím teksin tekmínla iyéku delokke aromana opéélo bím melíkyé, delo kapnam ríínam delokke iipange koteksuna mílí iyé.”
Currently Selected:
MATI 24: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
