MATI 23
23
Ukil Kídíemlang Pharisi Kídíem Jisuke Lutosubiname
(Mk 12:38-39; Lk 11:43,46; 20:45-46)
1Delokrongem Jisu bí milung kídíemlang delokke bíkkíng luyilsuna kídíem poto, 2“Ukil kídíe lang delokke Pharisi kídíe Mosike ayonem pobipene dung. 3Depe ila nolu bulum mínggerupe aido, delokke buluke ponam takamem ibipe aido. Idakkom buluke inam kísape imapeka, kapeila bulu ingkuem pobodudí dem igemang. 4Bulu tebegna siirígem éétung delokke dem ami gordulo pyalíkdung, idakkom bulu agísue delokke lakkéng kééyi kokom lengon kítope emla imang. 5Buluke inam takamde ami kídíem kaayépe emla inam petome. Depe emnamde bulu agí lakjinem bottepe gela, ege nomém bodope medung; 6bulu duusum dakrumlo míngge kosulídung delokke kumkeng ekum kídílo aiyalumna duupekuem matadung, 7bulu dukan bojar kídílo yamrík irík kosulídung delokke amikídíem bulu ‘Babue’ emko sulídung. 8Idakkom nolum ‘Babue’ empe nammang, kapeila noluke ruutume atelko delokke nolu takame bíro kumsue 9delokke tani amoso sékomekom ‘Yayi’, empeko kamang, kapeila noluke Abue atelko, delokke bí teyong telo dung. 10Nolum ‘Poyilbone’, emlangkom gokpe nammang kapeila noluke poyilne atelko, de Kristo bí. 11Noluke aralo botte yalumnade noluke béérange. 12Legade séko agíem bottepe míísududí bím amémoyé, delokke séko amépe míísududí bím bottemoyé.
Aromanem Jisuke Akname
(Mk 12:40; Lk 11:39-42,44,52; 20:47)
13“Aromana ukil kídía delokke Pharisi kídía, nolu gérmang daklangka! Ami kídíem teyong amongem kaamo mape buluke mingmuem nolu pokomdung. Nolu agísue depe aamang delokke aapena kídíemte nolu aamomape idung. #23:13: Ayokon agome sikepe podung, 14 Aromana ukil kídí delokke Pharisi kídí nolu gérmang daklangka! Meyéng ekumem nyokmona kídí nolu kaayépe emla bodope kumne. Delok legape nolum bojérupe ingééyé.
15“Aromana ukil kídía delokke Pharisi kídía, nolu gérmang daklangka! Nolu moopílok delokke asilok midum atelem langku penam legape among tabulo gígoodung, delokke edílo nolu akonem laayékudí, dem nolu noluke kísape pakyape doorum líísam oope imodung.
16“Mingmadola gíbona kídía! Nolu emdung, ‘Séko kumkeng ekum amín lok pésuyédí de atí are kamang; idakkom séko kumkeng ekum lokke uunlok pésuyédí, delomin bíkke pésuname arodune.’ 17Nolu mingmana mide kídía! Ingkue botte yadun; uundía ma, uundem deemamona kumkeng ekum día? 18Nolu sikepete emdung, ‘Séko kumko baarilok pésuyédí bíkke pésude are kadung.’ 19Nolu mingmana tani kídía! Ingkue botte yadun: amandía ma, amanem deemamona kumko baaridía? 20Delok legape séko kumko baarilok pésuyédí, bí delo duuna amínlok pésudung. 21Delok legape séko kumkeng ekumlok pésuyédí de kumkeng ekum deloklang delo duuna amínlok pésudung. 22Delokke séko teyong amínlok pésuyédí de Shédíke palenglok pésudung delokke delo duuna amínlok pésudung.
23“Aromana ukil kídía delokke Pharisi kídía, nolu gérmang daklangka! Nolu takéé lokke, murkong lokke, kési képa lokke delokke ampunlokke dohombagem bidung. Depe idakkom nolu ayonlokke gomlong kídí jonnam, yaasam delokke míngke sunamem bomgap mang. Nolu méélamke agom kídar sim kerangke simteng mepakmape ige penamkuai. 24Nolu mingma dola gíbona kídía! Nolu tamidem pibín pala uut simonem méddung!
25“Aromana ukil kídía, delokke Pharisi kídía, nolu gérmang daklangka! Nolu bati luyuem beebíndung idola aradelo kaabo tatbue delokke míímem imeme bíísétdung. 26Mingmana Pharisia! Kerape bati lokke delokke ekunglokke arangem beepotoka demílomin luyu dekom deeyéne.
27“Aromana ukil kídía delokke Pharisi kídía, nolu gérmang daklangka! Nolu sunlok molnam ago kísa, de luyulo kaaname kampue idung idakkom aralo ami simang along mílí idung delokke takamde deemange idung. 28Deke kísape, luyulo nolu yéjinape kaaname idung idakkom noluke arade menam yadname delokke rulnam kééname bííséddung.
Bulum Ingéépenamem Jisuke Potosubiname
(Lk 11:47-51)
29“Aromana ukil kídía delokke Pharisi kídía, nolu gérmang daklangka! Nolu kaaluna mirikídí legape ago mobidung delokke deena kídí simang yupekuem leemo líkdung. 30Delokke nolu sikepe podung, ‘Ngoluke buku neku longedelo ngolu duutuamílo, ngolu bulukíng kaaluna mirikídíem yilí bídkolo yébo sumayai.’ 31Depe iname nolu kaaluna miri kídíem petna kídílokke adonge emnamem nolu agísue popéé sudung. 32Demílo noluke bukukídí paab inamem inyok tolangku: 33Bítpyor kídí nolu! Nolu kape kísa doorum líísamlo ajéng ipe namlokke dugge yékune? 34Delok legape ngo nolum kaaluna miriem delokke kénna ami kídíem delokke poyilbona babu kídíem melíkdung. Bulum ayokonem nolu petyé delokke ayokonem pansaayé; abídem nolu noluke kumkeng ekumlo demngééyé delokke taon konlokke taon konlo monbomyé. 35Delokke irepe ajéng kamape deesuna Abelme petdolokke ilangala kumkeng ekum kelang kumko baari pénsamlo noluke petnam Berakike oo Jekariahke iyyie, ajéng gemanem petnam ajénge nolukelo duuyé. 36Ngo nolum aropakpe pobidung, si takam si so siirum so duuyé!
Jirusalemem Jisuke Akname
(Lk 13:34-35)
37“Jirusalem, Jirusalem, no kaaluna miri kídíem petna delokke nokkíng melíknam kídíem elínglok gene, edítko rongne rogo kídarem tomdumsula agíke labbíng rumkílo gubbomnam kísape leko leko noluke ome-oo kídíem goodumsula ngo ankípene. 38Kaasutola, noluke ekumem kumrompe nolukíng melíktung. 39Kapeila ngo nolum podung, nolu lekoda ngom ‘Ruutumke amínlok aanade gérne’ #Miri 118:26 emkuma tetengem ngom kaapang kumayé.”
Currently Selected:
MATI 23: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
