MATI 22
22
Nyamranlo Luyiisuname
(Lk 14:15-24)
1Jisu bí lekoda bulum sikepe luyiisunam agomko potoku: 2“Teyong amode rojakone agí oo nyamran legape iruu saarunam kísadung. 3Bí agíke béérang kídíem nyamranlo goknam ami kídíem aadope potoka emla melíkto, idakkom bulu aalímang emkai. 4Delokrongem bí béérang aluyangko melíkdola pokai, ‘Tomnam kídíem ngo nyamranem itubong, ngokke unarung runem ranmík tubong, delokke takamem iruu tubong, nyamranlo aalangka emtoka’ emla políkto. 5Idakkom bulu atí tatbimang delokke ennyokai, akone agí aríklo, akone agí paata dotalo gínyokkai. 6Abíde bíkke béérang kídíem umla, ipu siléé pala bulum mokato. 7Rojade séngéépe markai. Bí agí sipayingem melíkla mokana amikídíem petyin geyéla buluke dungko taondem rompakto. 8Delokrongem bí agí béérang kídíem poto, ‘Nyamranem iruu tubong idola ngokke tomnam ami kídíe so aape maneke. 9Bedalo gíkaala noluke kaanam kénnam takamem nyamranlo goktoka.’ 10Delo béérade bedalo gíla edítko paklayédí ami kídíem, ainem delokke aimanem, gokdumsula iname nyamran ekumde mibo mílí bííbomkai.
11“Idakkom rojade mibo kídíem kaayédem, amiko nyamran ege gemanako bí kaapato. 12Bí tatkíto, angonge, nyamran ege gemape no kape kísa so aatone? Amide agom atírung pomang. 13Delo rojade ibi saabina kídíem lulíkto, ‘bím alagemlang alem yééla luyulo kaamo ruruklo yoplíktoka, delo kapla rííla delokke iipange koteksula duuyépe.’ ”
14“Legade tomname bojéko toname anyongko.”
Kajanang Binam Legangem Íngkíname
(Mk 12:13-17; Lk 20:20-26)
15Delokrongem Pharisi kídíe gílangkula bíkke agomlok bím língkitlok gakpe emla míírusuto. 16Bulu buluke luyilsuna kídíem Herodia kídíem lekope bíkkíng melíkto. Bulu pokai, “Babue, no Shédíke bedangem poyil bodung dem ngolu kéndung. 17Demílo, nokke míínamem ngolum potola? Kaisarme kajanang binamde bibaa namkua ma, bibaa manamkua?”
18Idakkom Jisu bí buluke atímana aapíem kaala pokai, “Nolu aromana kídía! Nolu kapeila ngom língkitlok gakpe emla idune? 19Kajanape bipenam poisarko ngom lengkantola!” Bulu adoliko bím laabito, 20delo bí bulum poto, “Sékoke mimange si? Delokke sékoke amíne si?”
21“Kaisar” emla bulu pobito.
Delo bí bulum poto, “Kaisar kedem Kaisarme bitoka, delokke Shédí kedem Shédíme bitoka.”
22Bulu dem tayyédelo kapei emla mííto. Depeila bulu bím mege yéla gítoku.
Sinakídí Lokke Gerep Kunam Legangem Íngkíname
(Mk 12:18-27; Lk 20:27-40)
23Delo longedelo gerep kunamde mename emna Sadduki kídíe, bím íngkí bengkípe aato. 24Bulu pokai, “Babue, Mosi bí ngolum sikepe poto milue ome-oo kamape siyémílo, bíkke bírue meyédem laalangkula bíkkepe ome-oo okupe aido. 25Ngoluke aralo bíro kumsu kínítko kato. Abíyalumde méng laatuai idokom sikai, delokke bí ome-oo kamape siname, bí agíke méngem bíkke bírolo mebito. 26Deke akampe annyi napena delokke angum napena, delok ilangala kínít napena deloope depe ikai. 27Méélam yalumpe mimede sikai. 28Supak demílo, sina kídí lokke gerep yékuem sékoke méépe bí iyékune? Takamde bím méépe ito.”
29Jisu bí poyansuto, “Nolu míímul sudung kapeila nolu dooying kitabem demangkom Shédíke ralnamem kénmang. 30Sina kídí lokke gerep yékuem amikídíe mime milo laabo sumayé; buludan teyong kotoki kísape iyé. 31Idakkom sina kídílokke turlat kupenam legangem; Shédí bí nolum kape emtudí dem nolu porikímanía? 32‘Ngomin Abrahamke Shédíe, Isaakke Shédíe, delokke Jakobke Shédíe.’#Gílen 3:6 Bí sina kídíke Shédímang idakkom turna kídíke Shédíemin.”
33Mibamde dem tayyédem, bulu bíkke luyilnam em talla sai emla míngkai.
Bottena Ngiitome
(Mk 12:28-34; Lk 10:25-28)
34Jisuke Sadduki kídíem pokum namem talla, Pharisi kídíe leko bosukai. 35Ayonlo kénna akonde bím ankangkípe emla sim agomsim íngkíto; 36“Babue, ingkuei ayon lokke ngiitom botte yalumne?”
37Jisu bí poyansuto, “‘Nokke Ruutumme nokke aang tabulok, nokke aid tabulok delokke nokke aapí tabulok ayalangka.’#Pobeng 6:5 38Simin kerayalum delokke botte yalumna ngiitome. 39Delokke annyinape nade si: ‘Nokke kumríem agí kísape ayalangka.’#Lebi 19:18 40Takam ayonde delokke kaaluna miri luyilde so ngiitom annyiso dungke sudung.”
Messiahke Legangem íngkíname
(Mk 12:35-37; Lk 20:41-44)
41Pharisi kídíe dumsu yédem, Jisu bí bulum íngkíto, 42“Nolu Kristome kape kape míídune? Sékoke ue bí?”
“Dabidke ue” emla bulu poyansukai.
43Bí bulum poto, “Demílo kapeila Dabid bí Aidlok poyém, bím ‘Ruutum’ emla gokkane? Legade bí sikepe poto,
44“ ‘Ruutume ngokke Ruutumem poto,
Ngo nokke miruem nokke lepyo rumkílo yédope ima tetengem Ngokke lakbíklo duulangka.’ ”#Miri 110:1
45Dabid bí bím “ ‘Ruutum’ emdumílo, bí kape kísa bíkke oope iyéne?” 46Sékote bím gompil koteng poyansukén mato, delokke delok longe delokke ila sékote bím agom íngkítope emla ilana kaimang.
Currently Selected:
MATI 22: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
