MATI 20
20
Onggur Aríklo Agér Ina Kídíe
1“Kapeila teyong yétade among akone rokompakpe gíla agí onggur aríklo agér gérpena ami tomna kísadung. 2Bí bulum longem adolipe bidope emla lubo supala bulum agí onggur aríklo melíkto. 3Konang bajilo bí gíla kaatoname abíde pesikoret ipomlo atí imape dakdo. 4Bí bulum poto, ‘Nolukom gíla ngokke onggur aríklo agér itolangka, delokke ngo nolum bibaa bibaape bisupe.’ 5Delo bulu enkai. Bí lennyinape, doonyi kaadusudo pagemlang delokke angum bajilo gílangkula iyang iyape itoku. 6Pilngo bajilo bí gílangkula kaaname abíde yéman tetedung. Bí bulum íngkíto, ‘Nolu kapeila so longe rubungem agér imape yémankane?’ 7‘Kapeila sékote ngolum ríkrap tomna kamang’ emla bulu poyansukai. Bí bulum poto, ‘Nolukom ngokke onggur aríklo gíla agér gértolangka.’
8“Adenge pííyédem, onggur arík atode ekum ruutumdem pokai, ‘Agér ina kídíem tomla buluke irem, méélam yalumpe tomnam kídíem bitoka.’ 9Pilngo bajilo agér ilenna amikídíe adolipe mipile paato. 10Kerayalumpe tomnam kídíem bidíe pííyédem, bulu bojéyape paape emla míítuai. Depe ilate bulukom mipile adolipe paato. 11Bulu dem paayédem, among atodem lugekai. 12Bulu pokai, ‘Si méélamyape tomnam ami kídísi gonta petomko agér gérto, depe ilate no ngolum doonyi pamkilo agér gérbona kídíke akampe bulumteng bitung.’
13“Idakkom bí, akondem poyansuto, ‘Angonga, ngo nom imemmang. Nokke irem adolipe idope tobo sumanía? 14Nokke irem laala gíka langku. Ngo méélampe tomnam amisim nolum binam kísape bipe míídung. 15Ngokke poisarlok ngokke mííbape ilamanía? Demangkom no ngokke bidar namsim nesudunía?’
16“Depeila méélame kerayé, delokke kerange méélamyé,” emla Jisu bí poto.
Jisuke Agí Sipenamem Lengumnape Pobisuname
(Mk 10:32-34; Lk 18:31-34)
17Jisu bí Jirusalemlo gídagem, bí midum íying kolang annyi luyilsuna kídíem tomngu sugeyéla bulum poto, 18“Ngolu Jirusalemlo endak, delo Tanike Uem miri ríne kídí lolang delokke ukil kídílo yadlíkyé. Bulu bím simoyé, 19delokke bím mipak gooralo ipusiléé dope melíkyé, demngéémola delokke pansaala meyé. Longum napenalo bím turdokupe kiirepyéku!”
Mime Anekone Roguname
(Mk 10:35-45)
20Delokrongem Jebedike ménge bíkke oo annyiem gíbola Jisukíng aala, peladola bím tatkíto.
21“No ingkuem mííbomdun?” emla Jisu bí bím tatkíto.
Bí pokai, “Ngokke oo annyi sokke akone nokke lakbík danlo delokke akone nokke lakké danlo nokke amolo duudope itoyika.”
22“Nolu ingkuem tatkídudí, dem nolu kénsumang”, emla Jisu bí bulum poto. “Nolu ngokke tíípenam batilo tíílayénía?” emla Jisu bí íngkíto.
“Ngolu tíílayé” emla bulu poyansuto.
23Jisu bí pokai, “Nolu ngokke batilo tííyé aro, idakkom ngokke lakbíklo demangkom ngokke lakkélo duupenamde ngokkelo kamang. Si jéga kídarsi ngokke Yayike iruu binam amikídí kepemin kadune.”
24Edílo midum íyingde dem tattodí, bulu bíro annyi teyodelo míínyingkai. 25Jisu bí bulum tomdum supala poto, “Nolu kénsudung Mipaklokke kebang ruutum kídíe buluke ruutumpe idung, delokke buluke miro kídíe bulum lubo pobodung. 26Nolukelo depe kamang. Dempenem noluke aralo séko botte lídudí de noluke béérape ipe aido, 27delokke kerang línade noluke abílpe iperung aido, 28kapeila Tanike Uekom igul kosukape emla aamang, idakla igulkape emlamin, delokke bíkke turnamem miti miling takam legape repít subi nadokupe emlamin aatone.”
Mingmana Ami Annyikonem Jisuke Ipíkuname
(Mk 10:46-52; Lk 18:35-43)
29Jisulang bíkkíng luyilsuna kídíe Jeriko doolungem mepala gídakkuem deddína miti maklínge bíkkíng gímín geto. 30Mingmana ami annyiko bedang tugéplo dungai, bulu Jisu bí gídak emnamem tayyédem, “Ruutume, Dabidke Ue, ngolum yaasamtoika” emla gokto.
31Milude bínyim asoope duulangka emla luto, idakkom bulu pakyape, “Ruutume Dabidke Ue, ngolum yaasam toyika” emla gokto 32Jisu bí dakpodola “Nonyi ngom nolukepe ingkoko imope míídun?” emla bulum tatkíto.
33“Ruutume” emla bulu poyan sudola “Ngolu amige mikdar lídungku,” emto.
34Jisu bí bulum ayang míípa sukai delokke bínyike amigem ukkíbito. Menang asak bínyi migdar langkula bíkkíng gímín geto.
Currently Selected:
MATI 20: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
