MATI 19
19
Milo Méng Mepansukunam Legangem Jisuke Pobiname
(Mk 10:1-12)
1Jisu bí atí kídíem poyinrongem, bí Galilem megeyéla Jordan rotkonlo Judia amolo gíkai. 2Deddína mibame bíkkíng gímín geto delokke bí bulum delo ipítoku.
3Delo Pharisi kídíeke aala bím ikang darkaape emla ito. Bulu íngkíto, “amie atí atí legalok agíke mimem mepan suladokunía?”
4Bí poyansuto, “Kerayalumpe pílenne ‘bulum milo pelang mimepe píto#Keyum 1:27 5delokke delok legalok agí ane abuem megeyéla agíke ménglo milue duubosuyé delo annyide adín atelkope iyé’ #Keyum 2:24 dem nolu porimanía? 6Depe iname bulu midum annyikope iyimang, idakla dínbíng atel pemin ibosukane. Delok legape Shédí bí ingkuem idum sutudí dem sékokom ipan sumapeka.”
7Bulu tatkítoku, “Demílo kapeila Mosike ngiitome milue agíke mimem mekunana kakot bigeyéla delo mimem metokuka emkane?”
8Jisu bí poyansukai, “Mosike nolum méngem mepan sudokupe tolík binam legade nolu aapí angkam gekolokmin. Idakkom kerape depe kamangai. 9Ngo nolum podung sékodí, ketbo doobo belum penam kékonlo agí méngem mepan sulangkula delokke mimekonko laayékudí bí abír ine.”
10Luyilsuna kídíde bíkkíng aala pokai, “Milo méng legade dekepe idumílo, milo méng laamade aiyado.” 11Jisu bí poyansuto, “Mipile sok agomsok ilamang, idakla séko bulum sikepe idope ruutudí, bulu petommin ilayéne. 12Kapeila ayokonem ane olen lokkekai mumbalpe otung; ayokonde tani isunam mumbale; akon akone teyong yéta kepe agíem agíe mumbalpe mesudung. Séko dem toladudí dem tolado.”
Koo Aména Kídíem Jisuke Lubéélíkname
(Mk 10:13-16; Lk 18:15-17)
13Delokrongem koo aména kídíem Jisuke alage buluke teyolo leetan líkla bulum kumbidope bíkkíng aaboto. Idakkom luyilsuna kídíe bulum aabona kídíem luto. 14Jisu bí pokai, “Koo aména kídíem so ngokkíng aamotoka, delokke bulum luya mapeka, kapeila teyong amode buluke kísana tanike.”
15Bí buluke teyolo alage leetanla lubéé líkpala delokke gíto.
Mirem Yaaméko
(Mk 10:17-31; Lk 18:18-30)
16Depe iduem amiko Jisukíng aala tatkíto, “Babue, duuyarpena turnamem paadope, ngo ingkona aina atíem iperung aidon?”
17“Kapeila no ngom aina atí legangem tatkídune” emdola Jisu bí poto, “Aina atíde Atel petomko. No turpekolo aalídumílo ngiitomem igetoka.”
18“Ingkona ngiitomem” emla amide íngkíto. Jisu bí pobito, “Ami petmapeka, abír imapeka, pyoomapeka, menam hakii bimapeka,#Gílen 20:12-16 19nokke ane abuem míngge langka,#Gílen 20:12-16 delokke ‘Noluke kumríem agí kísape ayalangka.’ ”#Lebi 19:18
20De amide pokai, “Sim takam sim ngo idung, ingkuem ngo supak peteng pííramdune?”
21Jisu bí pobito, “No arorulok yépe míídumílo, gílangkula nokke sérangem opan kídíem ortolangku, delokke delomin no teyong amolo miremyéne. Delokke kaju ngokkíng gímín getola.”
22Yaamé amide dem tayyéname, buulangala gíkaku, kapeila bí ekurang kana rungkuai.
23Delokrongem Jisu bí bíkkíng luyilsuna kídíem poto, “Ngo nolum aruem pobidung, mirem amikepe teyong amolo aanamde bomram runame. 24Lekoda ngo nolum pobidungku, mirem amie Shédíke amolo aapemílo, uut simone pesi arulok pessul namde ipoyaname.”
25Luyilsuna kídíde dem tayyédem, bulu abah emla míídola íngkíto, “Demílo sékoda mopít kosulayéne?”
26Jisu bí bulum kaasudola pokai, “Tanilok si ilamaname, idokom Shédí kelok takam atíem iladung.”
27Pitor bí bím poyansuto, “Ngo atí takamem megeyéla nokkíng gímín gedung! Demílo ngolu ingkuem paapene?”
28Jisu bí bulum poto, “Ngo nolum aruem pobidung, Tanike Ue bíkke angun ralna palenglo duuyékuem, atí takame anípe batyéku delo nolu ngokkíng gímín genakídí nolu Israel lokke íying kolang annyi opínem bisar dakla nolukom íying kolang annyi umkélo duuyé. 29Delokke agí ekum kídíem demangkom bíro kídíem demangkom bírme kídíem demangkom abuem demangkom anem demangkom ome-uem demangkom arík anam kídarem ngokke legape mepaksuna mipíde lííyi língope laabem paayéku delokke turyarna yénamem ruutum dogeyé. 30Idakkom deddíko kerang nekom méélam yéku, delokke méélam nekom kerayéku.
Currently Selected:
MATI 19: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
