MATI 15
15
Buku Ngiitom Legange
(Mk 7:1-13)
1Delokrongem Pharisi kídí elang ukil kídíe Jirusalemlok Jisu kíng aala lukai, 2“Kapeila nokkelo luyilsuna kídíe abu kídílokke yénam ayonem iyimane? Bulu buluke alagem kerape laksuk sumape dodung!”
3Jisu bí poyansukai, “Kapeila nolu agíke luyilnamem bomsupe Shédíke ngiitomem betkane? 4Kapeila Shédíbí potuai, ‘Nokke ane abuem míngge langka#Gílen 20:12 delokke séko agí abuem demangkom anem, béésuyédí bím simorupe aido.’ #Gílen 21:17 5Idakkom nolu ludung, ‘Ami akone agí abuem demangkom anem, igul lanana ekurang kadolateng, “Si Shédíke” emla poyémílo, 6bí agíke abuem #15:6: Ayokon agome abu demangkom bíkke anem. míngge penam kamang,’ emdung. Sikepe nolu agíke luyilnamem mesiisupe Shédíke ayonem mepakdung. 7Nolu aromana kídía! Isaiahke noluke legangem polupoor binam si poyin bitung:
8“Si ami kídí si ngom buluke nabbéllok mínggedung,
depe idokom buluke aapíe ngokkelok mootedung.
9Bulu emmumpe ngom kumsudung;
buluke luyilde tanike ayonlok pobiname!”#Isa 29:13
Taniem Deemang Mona Atí Kídare
(Mk 7:14-23)
10Jisu bí milung dem bíkkíng tomnín sudola poto, “Tatgap langka delokke kénlangka. 11Ingkuedí tani nappalok aadudí de bím ‘Deemang’ momang, idakla ingkuedí nappalok lendune, demin bím ‘Deemang’ modune.”
12Delo luyilsuna kídíe bíkkíng aala sikepe íngkíto, “Pharisi kídíe dem tadrongem míínyidung dem no kéndunía?”
13Bí poyansuto, “Ngokke teyong Yayike lelíkmanam asul takamdem appír lokkai bupakyé. 14Bulum metoka bulu mingmadola gíbone.#15:14 Ayokon agome mingmanem gíbone. Mingmane mingmana terengem gíbomílo, annyi dekai deerulo olíkyé.”
15Pitor bí pokai, “Dem luyiisunam agomdem ngolum pobeng bikui.”
16“Nolu supak peteng tatkén manía” emla Jisu bí bulum luto. 17“Ingkue nappalo aadudí de akiilo tokdung delokke delo amíllok gípak dungku dem nolu kénmanía? 18Idakkom nappalok lenkuna atí kídíde aapí ainang lokmin lendune, delokke dekede taniem ‘Deemang’ modung. 19Legade aapí-aang lokmin míísi mííngo, petka moka, abír ajon, mime milo belum bekam agér, doppyo tíísi, melí yaddong, lukang pokang takamsi lendune. 20Sike simin tanime ‘Deemang’ emmone; idakkom laksuk sumape donam delok bím ‘Deemang’ momang!”
Míngkesuna Mimeko
(Mk 7:24-30)
21Dem amodem megeyéla, Jisu bí Tur lolang Sidonlo gílat sukaku. 22Delo amodelo duuna Kanaan mimekone bíkkíng aala, gokto, “Ruutume, Dabidke Ue, ngom yaasam toyika! Ngokke omem urome duubomla pesorupe kidung.” 23Jisu bí gompil kokom poyansumang. Dekepe ila bíkkelo luyilsuna kídíe bíkkíng aala sikepe roguto, “Bím melík tokuka, kapeila bí ngoluke méélamlo goktí míndung.”
24Bí poyansuto, “Ngom Israel mér sobén nyokna kídí lomin melíktune.”
25Delo mimede pííla bíkke keralo peladola pokai, “Ruutume, ngom igulru toyika!” emla bí roguto.
26Jisu bí delo poyansuto, “Koo kídí lokke dotkéyem laabínla buluke ekiilo yobbinamde aimang.”
27“E, Ruutum” emdola bí pokane, “Idokom ekiie ruutumlokke apim ekunglok pimpil olet nemkom dodo.”
28Delo Jisu bí poyansukai, “Mime, nokke míngkenge bottedung! Nokke roguem tatbidung.” Delokrongem bíkke omede delokke ila aikaku.
Jisuke Bosi-borang Amiem Ipíkuname
29Méélamdem Jisu bí delokke gílangkula Galil sine ayirlo pííto. Delokrongem bí etpalo saala delo dungaato. 30Milungko bíkkíng aala, lebyanem, mingmanem, lebéénem, agom pokénmana midem delokke abíd abíd amiem bulu Jisuke alelo aaboto, delo bí bulum ukkíla ipítoku. 31Edílo agom pokén mane polen tokudí, lebééne aikakudí, lebyane gílen kakudí delokke mingmane kangka kudí, delo amie sai emla míngkai. Delokrongem bulu Israel lokke Shédíme yidgeto.
Jisuke Midum Éjar Appiko Donam Biname
(Mk 6:1-10)
32Jisu bí bíkkíng luyilsuna kídíem poto, “Ngo sim amikídí sim ayang kaapa sudung; bulu ngokkíng longum kokai yémín gekolok dope tíípenam kayimang. Ngo bulum kenodope melík língkumang demamílo bulu bedalo molayimape iyé.”
33Bíkkelo luyilsuna kídíe poyansukai, “Siddína milung sim donam bidope so mootengko amoso ingkolok ettíngem píídope paayéne?”
34“Lub rotie edítko nolu kadun” emla Jisu bí íngkíto. Bulu “Lub kínít kolang engo améneke anyongko kadung” embito.
35Bí mibamdem amolo duulangka emto. 36Delokrongem bí lub roti kínít demlang engodem laato, delo bí yidgerongem, bí dekedem penla luyilsuna kídíem bito, delo bulu amikídíem orto. 37Bulu takame dola tííla kiidarto. Méélamdem luyilsuna kídíde dongong tíngongem laadum sukuname aapé bíína kínítko ido. 38Mime kíangko kídíem lutak sumape sankíname dona kídíe midum éjar appiko. 39Méélamdem Jisu bí milung dem mepan surongkuem, bí etkunglo rengaala Magaden ayirlo entoku.
Currently Selected:
MATI 15: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
