MATI 14
14
Joan Baptiske Siname
(Mk 6:14-29; Lk 9:7-9)
1Depe iduem, Galil lokke among ruutum Herod bí Jisuke legangem pobinamem tatto, 2delo bí bíkke béérang kídíem poto, “Si Baptist Joan bí; sikolokke gerepkune ai! Depe ilamin bíkkíng irisinyo ralname duudune.”
3Herod bí Joanme kerapekai umla yééla delokke agí aní Philip ke méng Herodiake legalok bím pateklo líktubong, 4legade Joan bí sikepe ludungai, “No bím méépe laanamde laamem dung.” 5Herod bí Joanme petpe míítuai, idakkom ami kídíem bí pesogeto, kapeila bulu bím kaaluna miripe míídungai.
6Herodme odí longekolo Herodiake ome bulum paksong soobito delokke de Herodme airupe ashéng mokane omede ingkuem mííyédí 7dem bipe emla bí pébisuto. 8Ane lulíklok bí pokai, “Baptist Joanke dumpongem ngom so ekuso bilangka.” 9Rojade duuge ituai, idola bíkke dobo ajon keralo pébi sukolok bí dem rogudem tatbidope hukum bito, 10delokke patek aralo Joanme patumoto. 11Bíkke dumpongem ekungkolo bomabila mime koodem bito, delo mime koode bíkke anelo bomabitoku. 12Joankelo luyilsuna kídíe aala bíkke amílem laala yusiito. Delo bulu gíla dem Jisume pokanbito.
Jisuke Éjar Pilngo Amiem Doboname
(Mk 6:30-44; Lk 9:10-17; Jn 6:1-14)
13Edílo Jisu bí Joanme depe tattodí bí pesuppe etkunglok rongngamko amolo gígeto. Dem tatla milung de taon kídí delokke alelok bím mamín gekai. 14Jisu bí moopílo oido delo, bí ami mibamdem kaato, bí bulum kaala ayang míípa sukai delo buluke kinem ipíto.
15Yume pííyédem, luyilsuna kídíe bíkkíng aala poto, “Si mootengko amonge, adol dubong. Milung dem mepan sulíktoku, bulum doolung kídílo gílangkula delokke agí agí dope namem resu motokui.”
16Jisu bí poyansukai, “Bulu gíku mangkom aiyé. Nolu bulum dopenam atíko bitoka.”
17“So ngolu lub roti pilngo kolang delokke engo annyi petomko kadung” emla bulu poyansuto.
18“Dekedem so ngokkíng bomatoi” emla bí poto. 19Delo bí ami kídíem miijéb teyolo duudope poto. Roti pilngo demlang engo annyiem bomdola, teyotelo kaasudola, bí yidgeto delokke roti kídíem pento. 20Bulu takame dodarpe doto delokrongem luyilsuna kídíe dongongem laadum sukuname aapé íying kolang annyikolo bíísét nako engo penmík name ido. 21Dona kídílokke isabe mimemlang delokke ome-oo kídíem lutak sumape iname midum éjar pilngoko ido.
Jisuke Asi Teyolok Gíname
(Mk 6:45-52; Jn 6:15-21)
22Mibam dem gípan sumo dungkuem luyilsuna kídí dem etkungdelo saala rotkonlo menape kongge dope Jisu bí lulíkto. 23Bulum mepan sulík rongkuem, bí agí petome kumsupe emla etpang teyolo sangkai. Adenge idolope bí petom delo duuto, 24idakkom etkungde konggo delokke mootengkope kongkabong, depe iduem asare mutkolok etkungde sipyarlo kuppé kupléla ito. 25Yoh perok legodelo Jisu bí sine asi teyolok buluke anínlo gíato. 26Luyilsuna kídíde bí sine asi teyolok gínamem kaayédelo, bulu pesorunge ito. Bulu “Si uromko” emla pesuem ulo jérto.
27Idakkom Jisu bí delopak bulum luto, “Edíípe duulangka, si ngomoko. Pesomapeka” emto.
28Pitor bí poyansukai, “Ruutume, norumílo, ngomte nokkíng asi teyolok aadope potola.”
29“Aatola” bí emto. Delo Pitor bí etkung delokke oila asi teyolok Jisu kídan aato. 30Idakkom edílo bí asar munnamem antodí bí pesoto delo giilumpe emla iname, “Ruutume, ngom laasing tokui” emla ulo gokto.
31Delo menang asak Jisu bí bíkke alage pííla bím gaktoku. Bí luto, “No míngkeng anyone, kapeila no mííne míngokane?”
32Delokrongem bulu etkungdelo aayédem, asare aikaku. 33Delo etkunglo duuna kídíde bím kumsudola poto, “Arorupe nomai Shédíke Ue.”
Jisuke Genesaretlo Kinem Ipíkuname
(Mk 6:53-56)
34Bulu kooyinrongem, Genesaretlo aato. 35Delo delok amodelokke amikídíe Jisume kangkén yédem, buluke doolung dunggong takamem agom bigooto. Amikídíe buluke kina ramna takamem bíkkelo bomato 36delokke kina kídíem bíkke galuk petom emkom ukkí modope bím roguto, delo bím ukkína takame aikaku.
Currently Selected:
MATI 14: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
