MATI 12
12
Sabbath Legangem Poboname
(Mk 2:23-28; Lk 6:1-5)
1Depe iduem Jisu bí Sabbath nyodo longem arík raadalok gíto. Bíkkelo luyil suna kídíe kenue ikane ambeng ayoko yirla doto. 2Pharisi kídíe dem kaayé delo bím sikepe pokai, “Kaasutola, nokkelo luyil suna kídíe Sabbath nyodo longelo ipemanam agéreke idung”.
3Bí poyansukai, “Dabidlang bíkke gíbo sunam kídíe buluke keno duem kape ituadín deme nolu porimanía? 4Bí Shédíke ekumlo aato, delo bílang bíkke angong kídíe kumlík jolíknam ettíngem doto de bulu kepe iperumanam agérekíai, kapeila dem mirí kídí petomemín dobatuane. 5Demangkom mirí kídíe kumkeng ekumlo nyodo longem nyomape ilate imem kamang, dem nolu ayon kitablo porimanía? 6Ngo nolum podung, Kumkeng Ekumdem botteyane si dung. 7‘Ngo sobo yaarem empemílo, yaasamem mííyadung’ #Hos 6:6 emnam agom kídar sim nolu kéntuamílo, nolu ajéng gemana kídíem ajéng gedope imayai. 8Kapeila Tanike Oo demin Sabbath lokke Ruutume.”
Alage sina Amiko
(Mk 3:1-6; Lk 6:6-11)
9Delok amodelok gílangkula bí buluke kumkeng ekumdelo pííto, 10delo alage sina amiko dungai. Depe iduem Jisume aknape míídola bulu bím sikepe íngkíto, “Sabbath nyodo longelo ipínamde ibaadunía?”
11Bí bulum pokai, “Nolu akone mér sobénko bomdo delokke de Sabbath nyodo longelo deerulo olíkkai imílo, nolu dem gakla, sorep kumayénía? 12Mér sobén empemílo tanide edítko botte yadun! Delok legape Sabbath nyodo longelo Ayone akonem igul namem luyamang.” 13Delokrongem bí amidem “Nokke alage yamtarto” emto.
Delo bí yamtarname alag akon delok kísape aikaku. 14Idakkom Pharisi kídíe luyulo gíla kapepak imílo bulu Jisume petkandodí dem poruu bosuto.
Shédíke Ullennam Béérange
15Jisu bí dem kénsula delok amodelokke gínyok toku. Bosi borange bíkkíng gímín geto, delo bí buluke kinam takamem ipíto, 16delokke bí dem pokan mapeka emla bulum lutumto. 17Si Kaaluna miri Isaiahke sikepe lunam agomem apíímope emla inameke:
18“Simin ngokke ullennam béérange,
ngokke ayaname, ngokke mííyum sukenge,
ngo ngokke aidem bíkkíng biyé,
delokke bí angu ami kídílo jonna agomem poboyé.
19Bí lumín momín sumayé demangkom uggomayé,
sékote bíkke agomem bedu bedalo tatpamayé.
20Jonnamlok bíkke ikum mangem,
Gerna piikong kokom bí tírmayé.
21Bíkke amínlok mipak ami kídíete míídasuyé.”
Jisu Delokke Biljebub
(Mk 3:2-30; Lk 11:14-23)
22Delokrongem bulu bíkkíng epompe tumla mingmana delokke gommanako bomaname, Jisu bí, dem ipítoku. 23Ami takame sai emla mííla pokai, “Si Dabidke Oope ikandunía?”
24Idakkom Pharisi kídíde dem tayyédem bulu poto, “Si Biljebub, uyu ruutum lokmin Bí uyuem monpak nana ralnamem paatune.”
25Jisu bí buluke míngkorem kénla pokai, “Yéta takamde agí agísue angu arang iyémílo bulu agíe nyoksuyé, delokke agí agísue apan aran ina taonde demangkom ekum erade atelkope tolbo sulamang. 26Soitande Soitanem monpak kumílo, bí agí agísue ipan iran sudung. Demílo dekena yétade kape tolyéne? 27Delokke ngo uyu kídíem Biljebub kelok mondung kumílo, séko kelok ami kídíe uyu kídíem monpak dungkune? Demílo bulu nolum bisar ibinape iyé. 28Idakkom ngo uyu kídíem Shédíke Aidlok monpak dungkumílo, demílo Shédíke yéte nolukelo aadung.
29“Demangkom ralna amidem kerape bí yéépong mamílo, kape kísa akone ralna ekumdelo aala bíkke sérangem bomyékune? Yéépong mílomin bí bíkke ekumdelok atí-siríem giiruk laayéne. 30Ngokkíng duumanade ngom akne, delokke ngom gesii bosumanade pinnyokne. 31Dekepe ila ngo nolum podung ami kídíke paab takamdem delokke lukaa luyé namem maab biladung, idakkom Aidem lukaa namem maab bimayé. 32Sékodí Tanike Uem akpé suyédí bím maab bilayé, idakkom séko Deena Aidem akpé suyédí bím so yérum sokom demangkom yépenam lokom maab bimayé.
Esing kolang sokke Ayé
(Lk 6:43-45)
33“Esiidem aipe mosang mílo sokke ayékom aiyé, demangkom esiidem take taredope imílo sokke ayékom aimayé, kapeila esiidem ayé lokmin kangkén nadune. 34Nolu tabí opín kídía kape kísa nolu agíe atímape inade aina agomko pokényéne? Legade aapí ainalok míngat emmin nappalok polendune. 35Aina amie kumsulok aina atíem laalen bidung, delokke atímana amie atímana kumsulok aimana atíem laalen bidung. 36Idakkom ngo nolum podung, dekena ami kídíde buluke míngíímape potonam agom takamem bisardíku longelo posukupe aiyé. 37Legade noluk agomsulok nolum mesam biyé, delokke noluke agomsulok nolum ajéng iyé.”
Irisinyoem Mataname
(Mk 8:11-12; Lk 11:29-32)
38Delokrongem Pharisi ayokon elang ukil ayokone bím sikepe pokai, “Babue, ngolu nokkelok irisinyo iyodko kaalídung.”
39Bí poyansukai, “Mirul amielang abír ina siirume irisinyo iyodem matadunía! Idakkom Kaaluna Miri Jonahme binam iyod kékonlo séko mekom iyod ibimayé. 40Kapeila Jonah bí longum kolang yongumko ngone akiilo duuto, dekepe Tanike Ue longum kolang yongumko kédeng arabelo duuyé. 41Ninebi lokke ami kídíe sim siirum sim bisarlo dakbo suyéku delo bulum ajéng gemoyé; kapeila bulu Jonahke pogoo bikolok míílat sutoku, delokke supak Jonah mempemílo botte yanako si dung. 42Sokko danlokke mime roje sim siirum sim bisarlo dakbosuyé delokke bulum ajéng gemoyé; kapeila bí among kéényung lok aala Solomonke ngiitom kénnamem tatgapto, delokke supak Solomon mempemílo botte yanako so dung.
Atímana Aidlokke Aalatkuname
(Lk 11:24-26)
43“Edílo deemana aidde tanilok lendokudi, de erengko amolo gígoola duupeko matadung idokom dem paamang. 44Delo de pokai, ‘Ngo ngokke gírong ekumlo aalat suyéku.’ De aayé kudem kaaname ekumde arape dung deename delokke kamporupe repla metung. 45Delo de gílangkula agíem rulyana aideke kínítko langaala, delo bulu gíla dungkai. Delo delok ami delokke yékore kerang kempenem loorí mayape ikai. Dekepemin si mirul siirum si iyéne.”
Jisuke Ane delokke Bírokídíe
(Mk 3:31-35; Lk 8:19-21)
46Jisuke milung delo pobo dungadape, bíkke anelang bíro kídíe bím luposupe emla luyulo dakya dungai. 47Akone bím “Nokke anelang bíro kídíe, nom luposupe emla luyulo dakdung” emla pobito.
48Bí poyansuto, “Séko ngokke anede, delokke séko ngokke bíro kídíde?” 49Bíkke lo luyilsuna kídílo sullíkdola, bí poto, “Sikesimin ngokke ane delokke ngokke bíro kídíe. 50Legade sékodí teyong telo duuna ngokke Abuke míínamem ibidudí demin ngokke bírue delokke bírme delokke ane.”
Currently Selected:
MATI 12: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
