MATI 11
11
Baptis Joanke Kotoki Melíkname
(Lk 7:18-35)
1Jisu bí bíkkelo luyilsuna íying kolang annyidem ngiitom birongem, delok amo delokke Galil taonlo luyilla, delokke pogoola ipe emla gíto.
2Edílo Joan bí pateklo duudola Kristoke inam saanamem tattodí bí bíkkelo luyilsuna kídíem 3“Nua Joanke bí aayé emla mantí bomname, demangke ngolu angukonko aayé emla míínam supía?” emla Jisume tatkítoka emla melíkto.
4Jisu bí, poyansuto, “Gílat langkula Joanme potoka no ingkuem taddudí delokke kaadudí demoko. 5Mingmane migdar kaku, lebaane gíkaku, tíídnem aimotoku, ruubénem tatmotoku sinem turmotoku, delokke opan kídílo tatpona dooyingem kíbito. 6Ngokke lokke gílat kumana amide gérne.”
7Joankelo luyilsuna kídíe gírongkuem, Jisu bí milung delo Joanke legangem sikepe polento, “Mooruk amolo nolu ingkuem kaape emla gítuane? 8Dem kaamamílo ingkuem kaape emla gítuane? Kampona ege galuk gena amikua? Demang, ege galuk kampona gena kídíde roja dungkolomin duudune. 9Demílo ingkuem kaape emla gílentuane? Kaaluna mirikua? E, ngo nolum podung, kaaluna miriem pakya nemmin kaatone. 10Simin sékoke legangem attudí de:
“ ‘Ngo ngokke kotokiem noluke kerape melíkpe bí noluke bedangem noluke kerape iruubiyé’#Mal 3:1
11“Ngo nolum arorupe podung; mime anelok oname sékote Baptis Joanme botteyana lenmarung; depe idokom séko teyong yétalo amé yalumdudí bí bím botteyadung. 12Joan ke yédo longe kídí delokke ila supaklope teyong yétade ralperung en gedung, delokke ralna amikídíe dem yébomdung. 13Kapeila kaaluna miri takamelang delokke ayone Joanke kerape polupoor bitung. 14Delo nolu dem torík sulídumílo, aapena Elijahmoko de amide. 15Séko nyorung gedudí, de tatsu langka.
16“Ingkoloi sim siirum sim luyii supene? Bulu bojar amolo duudula amiem sikepe tomlenna koo alung kísaneke.
17“ ‘Ngolu nolum tapung mutbituai;
depe ilate nolu miri momato;
ngolu pengé lubituai depe ilate nolu ankímang.’
18“Depe emnamde Joan bí angkane doma tíímape yéto, delo amikídíe, ‘Bí uyu gedung’ emto. 19Tanike Ue angkane dola tííla ito, delo amie ‘Si domon tíímon nako kajanang ulna kídí lokke delokke Paab gena kídíke angongko’ emto. Idakkom kénnam kepe bíkke agér kídarsulok lengkansupa.”
Arope Míímana Taone
(Lk 10:13-15)
20Bulu míílat suku mangkolok, bíkke irisinyo alumem iko taondem Jisu bí lukaa lenkai. 21“Korajin doolunga, no gérmadak; Bethsaida, no gérmadak! Noluke keralo irisinyo inam kísape Tur lolang Sidonlo ibi tuamílo bulu konnyi mennyingkai muun ege gela duuk ankíem metbu nyoolum sula míílat suyékuai. 22Idakkom ngo nolum aruem podung nolum pemílo bisardí longelo Tur delang Sidon kede hakjém gepoyé. 23Delokke no Kapernaum no, teyong amolo dupía? Depe imayé, no rumkíng yalum#11:23: Grik lo dorum-líísam emdung. belo tokyé. Noluke keralo ibinam irisinyoem Sodom lo ibiamílo, de silo melope duuyai. 24Idakkom ngo nolum podung, nolum pemílo, Sodom kede bisardí longelo dongge popoyayé”.
Ngokkíng Aala Duuno Sutola
(Lk 10:21-22)
25Delo Jisu bí pokai, “Yayie, teyong among kelang tani amongke Ruutum nom ngo koyiddung, kapeila no kénna paana kídí lokke sim atí kídí sim mesupto, delokke dekedem koo kídí lodan lengkan bito. 26Yayie, De arorunge, kapeila de nokke ibasuname.” 27“Takam atíem ngokke abue ngom tolíkdung. Uem sékote kénmang ngokke abu petome kénsudung, delokke sékote Abu me kénmang Oo petom elang Ue bím lengkan bipe emla ullennam kídí petome kénsudung. 28Ngokkíng aatola, nolu adírna delokke eget gena kídíe, delo ngo nolum duuno sumope. 29Nolu ngokke jungoliem getoka delokke ngokkelok kéntoka, kapeila ngo dengomnako delokke ainange remagnako, delo noluke aid legape duuno supekuem paayé. 30Legade ngokke jungoli de geponako delokke ngokke eget si essanako”.
Currently Selected:
MATI 11: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
