KEYUM KERO 28
28
1Delo Isaak Jakob me tomla, utepooro agom políkdola Jakobme poto, “Kanaan among soge no mime lamayé. 2No Paddan-aram amonglo, nokke ane lokke abu Bethuelke ekumlo gíla, nok ane lokke bíro Laban ke ome konem mimepe laatoka. 3Ralya yalumna Shédíbí nom utepooroem ruulíkla, ome-oo kamola, parmola milung amikope imo dakyika. 4Bí Abraham kelo utepooro políknamdem, nokke lolang nok otíng oyinlo bika langka, delokke supak ke yébomko amongsim Shédíke Abrahamme bipe emla tolík sunamsim nom bidak langka.” 5Depe emla Jakob me Isaak bí, Paddan-aram amonglo, Esau keelang Jakobke ane Rebekahke bíro Aramean ami Bethuelke oo, Laban kíng melíkto. 6Jakob me utepooroem políkla, Paddan-aram amonglo mime matadope Isaak bí melíkto emnamem Esau kénto. 7Delok teyonglo, ane-abu agomem tatla, Jakob Paddan-arampe enkai emnam emte bí kénkai. 8Dekepe ikolok Esaubí ane-abu si Kanaan lokke mimem nyamengpe míímanamem kénkai. 9Depeila bí Abrahamke oo Ishmael kíng gíla bík ome, Nebaioth ke bírme Mahalathme mimepe, bík mime kídí teyong lo laatemto.
Jakobke Immange
10Beersheba lok Jakob gílenla Haranpe ento. 11Yumepe irong dem bí moolop kolo pííla dooto. 12Delo bí immalo, bortakna ebangko amolokke ila teyong among telo píídope delokke teyong kotoki kídíe ebang delok tokdu-saatok dope kaato. 13Delo bík anín delo Ruutum bí dakla sipe podope tatto, “Ngomino Ruutum bí, nok abu Isaak kelang Abraham ke Shédíbí; nokke supakke ketko amongdem, ngo nom lang nok otíng-oyinlo biyé. 14Nok otíng-oyine kédéng lokke demul kísa iyé, bulu sanggo danpe, anggo danpe, línggí danpe lang sokko danpe gípan subomyé; delokke nokke loklang, buluke lok tani amonge utepooro ruulík namem paayé. 15Kaatola, ngo nokkíng yémín gela, no ingko-ingkolo yégo yédí, ngo nom gagbom ayaryé, delokke so among so aalat boyéku; kapeila nom potonam kídísim ipíngmang tetedem, ngo nokkelo yémín geyé.”
16Delo Jakob darngo sulangkula agíe mansuto, “Aropakpe Ruutum so moolopso kadung, ngo sim atí kénmato.” 17Bí pesola agíe mansuto, “Si pesorían runam moolopko; abídmang, si Shédíke ekume delokke si teyong amongke eyabe.” 18Delo rokompe Jakob gerepla, bíkke dumtenpe bomtonam lííbyang dem gaangpe díípala, delok teyong delo tél lok pílíkto. 19Delo moolop dem Bethel#28:19 Bethel: Shédíke ekum. emla amín mínlíkto, idola kerape dem doolungdem Luj emtuai. 20Delo Jakob pésudola manto, “Shédíbí ngokkíng arope duumín geyémílo, delokke ngok entíng-gítíng so kaabom yémílo delokke dope-tíípenam emlang ege-galuk gepenamem rubiyémílo, 21delok teyonglo, ngok abu ekumlo aiyope aalat sula imoyé kumílo, delo Ruutum no ngokke Shédípe iyé; 22delokke si gaangpe díínam lííbyang si Shédíme kumpompe iyé, delokke no ngom ingko-ingkoem biyédí delokke íying sanpegem, ngo nom biyé.”
Currently Selected:
KEYUM KERO 28: adiBSI
Highlight
Copy
Compare
Share
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
