KEYUM KERO 27
27
Isaakke Jakobme Utepooro Políkname
1Edílo Isaak mijing along kadí delokke bík amige mikmol kadí, delo bí, oo obíng Esaume tomla sipe poto, “E ngok ua,” delo Esau, “Sina ngo,” emyan suto. 2Bí poto, “Kaatola, ngo mijingkai delokke ngo edílodí siyéne dem kénsumang. 3Depeila supak, nok apta-patanana ekurangem gela, moonamlo ngok legape aptatoka, 4delokke ngokke mííbang gamnam dokorpe, adínem keela, ngo dodope ngok keraso boma bilangka. Ngokke simang adape, dem dopala nok teyolo ngo utepooroem políkdope.”
5Esaume dekepe Isaakke podudem, Rebekah bí tatto. Depeila edílo Esau moonampe aptalo gíkadí delo, 6Rebekah Jakobme poto, “Nok yaike, nok abíng Esaume supak agom ponamko, 7‘Aptalo gíla, ngokke mííbanam ngamnam dokorpe adínem keela, ngok simang adape, Ruutum ke keralo ngo dem dopala nome utepooro agomem polík dope,’ emnam em ngo tatto. 8Depeila ngok ua, ngok ponamem tallangka. 9Bénbamlo gíla, ngelna bénbíl annyiko laalen toka. Ngo nok abu lokke ngamnam dokorpe adín dem ibiyé. 10Dem no, nok abu keralo bík simangadape dola nom utepooroem políkdope bomabitoka.”
11Idola Jakob, bík ane dem poto, “Kaatola, ngok abíng Esaubí amíd kanako, delokke ngo asig ayoe remyaknako. 12Ngok abue mengkí kolok, ngokke bím yadnamem gagla, utepooro paadumem pénamem agílo bomasupelo.” 13Delo ane de bím poto, “Ngok ua, pénam de ngokkíng kayémangalo, idola no ngok agomem tattola. Sa menape gíla ngokkeso dekedem langaatoka.” 14Delo bí gíla dekedem ane kerang delo langaala, bík anede abu delokke ngamnam dokor pakpe keebito. 15Delo Rebekah bí bíkke tombulo menam, Esauke gaiyalumna egedem Jakobme gemoto. 16Delo bénbíl kídí delokke asig ayoem bíkke alag annyi delola, mílína alíng delo airupe ilíkto. 17Delo Jakob kíng, ngamperung donam inam dem lang bíkke isunam burla goona ettíng dem bilíkto.
18Delo bí gíla, “Ngok Yayi,” emla poto. “Sina ngo, ngok ua, no sékoi?” emla bí pola ííyansuto. 19Jakob bí abudem poto, “Ngo nok obíng Esau moko, nok pokampe sina ngo itung, supak darepla ngok apta namem dola, ngom nokke utepooro polík penam eme polík langka.” 20Idola bík oo dem Isaak poto, “Ngok oo no kape kísa menang asak apta laaton?” Bí poyansuto, “Kapeila nok Shédí ngom igulla sikepe ikai.” 21Isaak delo Jakobme poto, “Ngok ua, no Esau agíya ma angu koya, ukkídope ngok anínso aatola.” 22Delo Jakob bí, bíkke abu Isaak kelo aanínto. Delo bím memdola poto, “Nok agom gomukde Jakobke kísa ido, idola alag kídísi Esauke alage.” 23Bí Jakobme memkén maato, kapeila bík alag kídíde Esauke kísa amíd kato. Delo bí utepooro políkpe idola, 24lekoda íísi-íímotoku, “No arope ngok oo Esau bía?” Bí poyansuto, “E, ngomin.” 25Delo bí poto, “Apta adín dem bomato. Ngo dopala nok teyolo utepooro agomem políkdope.” Delo bí bomala, dem bí doto delokke onggur alang demte bomabila, bí tííto. 26Delo bík abu Isaak, bím poto, “Ngok ua, ngokkíng aanínla ngom mumpuptoi.” 27Delo bí bíkkíng aanínla, bím mumpupto delo bí galuk delok aríem namla bím utepooroem polík dola poto,
“Kaatola, ngok oo sokke arísi Ruutum ke
arík teyolo utepooro ruulíknam
arík arí kísa;
28Shédíbí nok teyolo taleng telokke tangarem okat molangka,
delokke among sokke ardaem ruubila donam-tíínamem bojé modakyika.
29Nome ami kídíe agér ibi dakyika,
delokke opín kídíe nome kumlangka.
Nok ane lokke oo kídíe nom kumla,
bíro kídí teyolo no ruutum bomdak langka.
Nom péna teyolo péname kadak langka,
delokke utepooro políkna kídílo utepooroe kadak langka.”
Esauke Ankíname
30Isaakke utepooro políkname iyinpak rodem, Jakobke bík abu Isaakke delok gílenpak rongkuem, aptalok Esau píítoku. 31Bíkom ngamdope domíem ila, bík abu keradelo boma bito. Delo bí poto, “Ngok yaino gerepla, nok oo lokke geta domíem dobika, delokke ngom utepooroem polík bilangka.”
32Bík abu Isaak bím ííto, “No séko?” Bí poyan suto, “Ngo nok obíng Esau moko.”
33Delo Isaak yagorupe dan-gong sudola poto, “Dekemílo sékoda geta domíem ngokkíng bomala, nok angku mangadape, ngo dola utepooroem políknam bí? Aroe bí utepooroem pangkai.” 34Dem tatyéname Esau ríríng emla séngépe kapla, bík abudem poto, “E ngok yai, ngom kom no utepooro agomem políktola.” 35Idola Isaak emto, “Nok aníe aala, ngom yatla, nokke lok utepooroem laabomkai.” 36Esau poto, “Bíkke, si ngom lennyinape yatname. Bík amínem emmumpe Jakob emmang. Bí ngokke obíng tarongem laalangala, supak ngokkíng utepooro emte langkamto. Ngok legape utepooroko apekpe mesiibimanía?” 37Esaume Isaak poyansuto, “Kaatola, nok ruutum pe bím ngo ilíkto, bík bíro kídíem, bík béérangpe ngo bito, delokke donam-tíínam daadiloope pardope ngo utepooroem polík rodem, ngok ua, nok kepe ngo ingkoko ibilayén?” 38Idokom Esau bík abudem rogu gugapto, “E ngok yai, no utepooro atelpak kokom mebila ngom utepooroem políkmayénía?” Depe pola Esau érla kapto.
39Delo bík abu Isaak oo dem poyan suto,
“Kaatola, among sokke ardako luyulo nok duupekue kayé,
delokke kedonna taleng telokke tangar luyulo no yégoyé.
40Nok yoksalok no turyé idola,
bíro lokke béérangpe iyé.
Idola edílo no akpé suyédí delo bík rumkílok no mopít suyé.”
41Esau Jakobme aklíng alooto, kapeila bík abue Jakobme utepooroem bilíkto. Depeila bí mííto, “Abu gíímang teyolo ankídíe píídak, delo ngo Jakobme mokayé.” 42Idola edílo Esauke agomdem Rebekah tattodí, delo bíkke oo aníyang Jakobme tomla poto, “Kaatola, nok abíng Esaubí, nom mokape mííla agí aapíem eetet motungku, 43depeila ngok agomem tattola, Haran amolo ngok bíro Laban kíng dugnyokla, 44nok abíng sokke marname aikumang tetengem, oolko duupo toka. 45Edílo bí maryimape, nokke bík teyolo inamem kénsu yimayédí, delo ngo nom tomyéku. Ngo kapekísa nonyike legape longe atello ankí kenoyén?”
Labankeelo Jakobme Isaakke Melíkname
46Rebekah Isaakme poto, “Hittit nyameng kídí legape ngo aapíe ankíla apéé aloodung. Buluke kísana lok Jakobkom Hittit mime laabomílo, ngo turla yébomnam kayimang.”
Currently Selected:
KEYUM KERO 27: adiBSI
Highlight
Copy
Compare
Share
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
