KEYUM KERO 29
29
Labanke Ekumlo Jakobke Pííname
1Delo Jakob endan tetela, sanggo lokke ami kídí yéko amonglo pííto. 2Delo arík arang delo asi déérungko delokke dem gargoola mér alung angum kokai ketbom dupe kaato; kapeila asi déérung deloge alungdem asi bidungai, delokke asi déérung delo bortakna lííbyang ko kato. 3Edílo mér alung dem asi bipe iyédí, mér kaabomna kídíe lííbyang dem jooyala, asi bila delokke lííbyang dem jootum langkula ito. 4Jakob mér kaabomna kídídem ííto, “Ngok bíro kídía, íngko lokkeda nolu?” Bulu poyan suto, “Ngolu Haran lokke.” 5Bulum bí ííto, “Nolu Nahorke oo Laban me kéndunía?” Bulu poyan suto, “Ngolu kéndung.” 6Bulum bí íítoku, “Bí aidunía?” Bulu poyansuto, “Bí aidung delokke kaatola, bíkke ome Rasel eena mér alungem asi bipe emla aadakne.” 7Jakob bulum poto, “Supak longe alume idung ada, nolu kape mér kídíem asi bipala, dota-tííta mokuman?” 8Idola bulu pokai, “Ngolu mér tabunge aadum suyin kumadem atí ilamang delokke lííbyang sim lobín palamin, mér alungsim asi biyéne.”
9Jakob ke bulum lupo sududem, Rasel bík abu mér kídíem goobomla pííto. 10Edílo Jakob bíkke ane lokke bíro, Labanke ome Rasel melang Laban ke mér kídíem kaatodí, Jakobbí gíla lííbyang dem jooya bila mér alung dem asi bito. 11Delo bí Rasel me mumpup dola ashéng lok yagorupe kapto. 12Delo bí Rasel me popato, “Ngo nok abu lokke erange, Rebekah ke ue.” Dem tatla bí duglang kula bík abudem popatoku. 13Edílo Laban bí bíkke bírme oo, Jakob ke koborem tattodí delo bí dugríkla, gomrík sula, mumpupla ekumlo aabotoku. Jakob Laban me inam tabungem popa payinto. 14Jakob me Laban bí emto, “Arope no ngokke iyyi adínsue.” Jakob delo poolo apíngko duuto.
Rasel keepelang Leah keepe Jakobke Agér Ibiname
15Laban Jakobme poto, “No ngok erange emla asampe agér ibiyénía? Nokke ireem edítko emyédí ngom potoka.” 16Laban ome annyiko katuai, abíyade Leah delokke aníyade Rasel. 17Leah amige edíímanakuai, idola Rasel kampoe ila ayange inamkuai. 18Jakob Rasel me mííto. Depeila bí poto, “Ngo nokke ome aníyang Raselke legape dítak kínídko nome agér ibiyé.” 19Laban poto, “Angu amilo bidum dem pemílo, nom binamde ainame; ngokkíng duumín gelangka.” 20Depe emkolok Jakob bí Raselke legape dítak kíníd ko agér ibito. Dekede, bíkke Raselme mííbom sunam legape longe anyong kísape ito. 21Depe irongem Jakob poto, “Ngokke nom yébidí longem yépíng bito. Ngokke méngem, ngo mimepe bomdope bitola.” 22Delo Laban bík edung-erang ami kídíem tomdum sula domanko iboto. 23Idola delo Raselke ayanpe Leahme melíkla, Jakob bím ketboto. 24Leah ke béérangpe idope Laban abíl mimeko Jilpahme bitak suto. 25Delo rodem kaaname Leah. Depeila Jakob Labanme poto, “Ngom no kape sikepe ikan? Ngo Rasel keepe agér ibimanía? Kapeda no ngom yadkan?” 26Laban poyan suto, “Ngoluk among so abíyang kadudem aníyangem bipoomang. 27No nyameng aranem sim hopta sim ipíng geyéla, dítak kínídko yépong bikumílo, ngo nom Rasel meteng biyé.” 28Jakob agom dem elíkto. Depeila nyamran adeng-apede iyin rodem, Laban bík ome Raselme Jakobke mimepe bito. 29Laban Raselke abíl mimeko Bilhahme bitak suto. 30Jakob Raselme mimepe ila, Leah mempemílo, bojéyape Raselme mííyato. Delok rongem dítak kíníd konko Laban me agér ibitoku. 31Rasel mempemílo Leahme anyoyape ayanamem Ruutum bí kaayédem, Leahme ome-oo odope ito, idola Rasel negenpe ito. 32Delo Leah koo gela oo ko oto. Oo delokke amínem, Reuben emla mínto. Emgade Leah sikepe, “Ngok ankí kenoem Ruutum bí kaabito. Supak lokke ila ngok miloe ngom ayang yéku” emla mansuto. 33Lekoda bí koo ko gelangkula ooko odo langkula sipe emto, “Ngom ayang manamem Ruutum bí tatla, sim koo sim kom bitoku.” Depe emla koo delokke amínem Simeon emla mínto. 34Lekoda bí koo ko gelangkula ooko odo langkula, sikepe emtoku, “Supak ngok miloe ngokkíng ai-kamporupe gyapyéku, kapeila ngo bím oo angumnape obikai.” Depeila Lebi emla oodem amínem mínto. 35Lekoda bí koo ko gelangkula ooko otoku. Delo bí sipe emto, “Supakke orum so dan ngo Ruutum me yidgedung.” Depeila bí oo delokke amínem Judah emla mínto. Delokrodem Leah koo oyimang.
Currently Selected:
KEYUM KERO 29: adiBSI
Highlight
Copy
Compare
Share
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
