ROM 4

Abraham mika Katiñnaniiñ

1Nii hiila pe ngunu Abraham ka piigo mi luchi nii, ngunuka aba-apa asiialyo kii dalyilo? 2#1 Kor 1.31. Niimpalukoda Abraham mi matiirḛ miigomiiniiñ lo lupyatiikoda, mohko hentii siisanii hang ako dokiñdo, hojalo Pinii ka hata homa. 3#Rom 4.9,22; Gel 3.6. Niimpalukoda piniipota si nii hiila ludo? “Abraham Pinii mi henjetii, ho hiipa mohmi denki hiila khiitii.” 4#Rom 11.6. Siisi kone huna miigo miidonii, mohka miijo mi ahmiñayiñ hiila khiima hojalo mohka injo hiilasii. 5#Rom 3.22. Ho kone huna miigo miimanii hojalo mohmi henje dunii huna ingyamiigya miyu mi lupya bidu hiila, mohka henje mi denki hiila khiikodu. 6Hopa David tiirḛ lyaniiñ mi luliñtii hiika miyu mi humina Pinii denki hiila khiitiinii miigo hokii apalala:

7“Lyanko kendo hiika atañ huka miigya niimina hello bitii kunii, ho huka ingyamiigya mi hipu tiiku nii;

8lyanko kendo hiika miyu hii humina Attoh mohka ingyamiigya mi khiika keñkumanii.”

9Siika lyaniiñ mika luniiñsi hokoda mitupipa konii pa kontii siipeha, malo mitupipakoma nii miilañ mipeha? Ngunu ludu henje hiisu Abraham mi denki hiila khiiko dopa lyisu tiinii. 10Hokoda niihtañpa hiikahii mohmi khiiko dopa lyine? Hiikahii kapyo hopeha malo mohka mitupipakoku lala peha? Hiikahii kami homa siipeha, hojalo mohka mitupipakoma rampa. 11#Rom 3.22,30. Mo mitupikonii mi kagiñnaniipa lariitii malo denki ke hiila tiiho kotii, nii mina mo henjelo giitiinii mohka mitupipakoma rampa. Hiilaka lyiniiñsi mohmi hikha dadoka aba pa miidupa hutiina henje nyadonii mitupipakoma siitrḛ ho huna mohlumi denki hiila khiidonii, 12ho hiichulipa mitupikonii atañka aba patrḛ hutiina mitupikonii kontii mapa hojalo henje mi katiñ nambii dola imbotiinii nii mina ngunuka aba Abraham giitiinii mohka mitupipakoma rampa.

Pinii ka Hemme Niimi Henje Losu Larii Lakiñ Siidonii

13 # Gel 3.29. Abraham la mohka ohoasi atañ paka hemme nii, mohlumi dohadolo mi pendu pa hiila, dapo kiipa amatii hojalo henje ka denki kiipa. 14#Gel 3.18. Siikasi matiirḛ dapo kokii kontiilo pensikokiñ dokoda, henje hii piigoama ho hemme binii hii araku. 15#Gel 3.10. Niimpalukoda dapo hii hadii mi ahgiitii, hojalo nohna dapo nyimanii hiiko talemiile hii nyima.

16Hopa niihna henje mi hentiñ tiinii, niimpalukoda hemme niimi aroh-aya ho doke nendupa ho hikha mohka ohoasi mi chigiikiine dupa-dapo ka ashoh kontii mimapa hojalo hiika atañ miilañmi hutiina Abraham ka henje mi tache mondo nii, niimpalukoda mo ngunu miilañ ruka aba, 17#Jn 5.21. hiila ketola do, “Ngo niimi abuje halugiira ka aba pa miibii lyike” Pinii ka hataho humina mo henje tiinii, huna shiinii mi sango bidunii ho doliñtote lutiinii drih nyimanii atañmi. 18Hentinaniiñ nyimapa miilañ mo hentiñtii, mo abuje halugiira ka aba pa lyikiñdo; mohmika lukoniiñ chulipa, “Hiitañ niikii ohoasi dukiñ doke.” 19#Hib 11.12. Mo henjeho ajju yamatii mohka atoh apo mika henka siilyi ho, shiikiñ patrḛ lyisu tiiku niimpalukoda mo anyañ nyang lange pahe akha tiiku, malo mo Sarah ka taluñ niimi henka lala. 20Hang henjemanii mohmi Pinii ka hemme niimi hemmo dopa miimatii, hojalo mo uroyapa alḛr yayatii mohka henje ho Pinii mika mo assañdiilañ siilyinii, 21hikha yartokula dotiiku Pinii miila kendo hiila nii mina mo hemme bitiinii. 22#Rom 4.3. Hopa niihna mohka henje hii “mohmi khiigiitii denki hiila.” 23#Rom 15.4; 1 Kor 9.10; 10.11. Hojalo aguñ atañ, “hiika hii mohmika khiiniiñ hii,” mohpa kontii kematii, 24hojalo ngunu patrḛ. Hiika hii ngunumi khiigii kendo huna mohmi henje donii shiiniiñ hokiika turi kunii Jisu ngunuka Attoh hiila, 25#Rom 8.32. humina shiidopa miitiinii ngunuka palle kopa ho turiturku ku ngunumi luderbidupa.

Currently Selected:

ROM 4: APATBSI

Highlight

Copy