ROM 3

1Ho Jew kii nii ayayanii do? Malo mitupikonii hii nii khiiniiñ pa lyido? 2#Rom 9.4. Abuje kapakohe lembo ho. Miitu ribiila, Jew atañmi Pinii mohka luniiñmi bitii. 3Nii miichi tonge matiirḛ lotii makoda? Hokoda mohluka lotiimanii hii Pinii ka lotii mi piigoama dopa miibii dopeha? 4Pema hiilama! Pinii jije ke hikha miyu amuh siijalo, hiila ketola do,

“niimi niika luniiñ loke niimi lotii lukiñ donii,

Ho lumiñ kendo niimika ayakacho kalyi ho.”

5 # Rom 5.9; 6.19; 1 Kor 9.8; Gel 3.15. Hojalo ngunuka diimmah hii matiirḛ Pinii ka ayakacho kaniiñmi kakiñ dokoda, nii hiila pe ngunu luchinii? Pinii miikha dopeha ngunumi pamyo kela? (Ngo miyu ka luchañ hoke ludu nii.) 6Pema hiilama! Niimpalukoda hokoda niihtañpa Pinii dohadolo mi ayakacho kachi? 7Hojalo matiirḛ ngiika amuh luniiñlo Pinii ka jijemi abugiido koda mohka tatukatuho, niimpa ngo siisilohepa halii kochi ingyamiigyanii hiila? 8#Rom 6.1,15. Ho niimpa diimmah mi miitema aya mi ahke nendupa? miyu tangenii ayamapa lula ngunumi luliido lubiidola. Mohlumika halii niisi handiko.

Konetiirḛ Denki ma

9 # Rom 1.18-32; 2.1-29; 11.32; 3.23. Nii hokoda? Ngunu Jew atañ hang aya yado peha? Ma, hiila ma loda cho; niimpalukoda ngo khiilii tiiku hikha miyu atañmi, anyeru Jew atañla Grik atañ nyimi, ingyamiigya ka harchichike ka ura ho doku hiila, 10hiila keto la do:

“Kone tiirḛ denki ma hiila, ma, kone tiirḛma;

11kone tiirḛ tachiñnyama, kone tiirḛ Pinii mi mema.

12Miilañru mokur nyadoku, tongepa mohlu ingya nyada;

Kone tiirḛ aya miima, koneka kone tiirḛ.”

13“Mohluka langu hii byuh ubuke,

Mohlu mohluka allyo mi gollu naniiñpa giido.”

“Tabu ka kiime hii mohluka nyachu ho giido.”

14“Mohluka aguñ ho poteje beniiñ ho kochi giido.”

15“Mohluka alih hii miyu menkiñ lyiho nyibya do,

16mohluka lembo ho byasanii ho miliñdorso hii do,

17ho chimie ka lembo mi mohlu chima.”

18“Pinii mika biiso naniiñ hii mohluka amee ho giima.”

19 # Rom 2.12. Siisi ngunu chindo dapo hii nii ludo hii hiika atañmi ludo hutiina dapo ka ura ho dunii, niimpalukoda kone abika aguñmi lutiñnaniiñpa, ho hikha dohadolo hii Pinii lo taka kokiñdo. 20#Miin 13.39; Gel 2.16; 3.11; Rom 7.7. Niimpalukoda miyumima kone tiirḛ lupya siila kema mohka hataho dapo miigo miiniiñlo, niimpalukoda dapo hokiila ingyamiigya niika chiniiñ hii ahtii.

Niitañpa Ngunu Pinii Agiñho Denki pa Atii siikiñ do

21 # Rom 1.17; Pil 3.9; 2 Pit 1.1. Hojalo siisi Pinii ka denki mi kakiñ tiiku dapo mi apa lala, dapo la nyibuhenii nyi hiimi haki bisu do, 22#Rom 4.5; 9.30; 10.12; Gel 2.16. Pinii ka denki hii Jisu Kristo mika henje kopa ahkiñdo hikha hutiina henje nyadonii. Niimpalukoda hiiko khiingu khiire nyima; 23#Rom 3.9. niimpalukoda miilañru ingyamiigyanii adiñ ho Pinii ka tatukatu hokii hupalyunya tiiku, 24#Rom 4.16; 5.9; Ipi 2.8; Tai 3.7; Ipi 1.7; Kol 1.14; Hib 9.15. mohlu denki lukotii mohka aroh-aya mika ahmiñayiñ paka biko hopasii, tupyabiniiñ lo niihna Kristo Jisu ko donii, 25humina Pinii atii tiisi bitiinii mohka ai lo bisi bidupa, henje lo larii kiinedupa. Siikasi Pinii ka denki mi kakiñ dupa, niimpalukoda mohka piniipigiiniiho mo kapyo hoka ingyamiigyanii atañmi impo biitiiku; 26#1 Jn 2.2; Kol 1.20. hiika hii hiila kakiñ dupa siika myoduso mo atoh loda denki ke hiila ho mo hiimi tiirḛ lupya bido huna Jisu mi henje donii.

27Hokoda nii ngunuka hentiisiila ka luniiñ hii lyikiñdo? Siikasi lapa limbiilyi. Nii henjumiiju pa? henjumiiju ka miigo pa? Ma, hojalo henje ka henjumiiju pa. 28#Miin 13.39; Rom 5.1; Ipi 2.9. Niimpalukoda ngunumi lukotii miyu mi henje kopa ke lupya tiikunii dapo ka miiniiñmi lapa lala. 29#Rom 9.24; Miin 10.34-35. Malo Pinii si Jew atañ kontii ka Pinii peha? Mo Midomiyu atañ katrḛ Pinii masu peha? Ḛh, Midomiyu kiitrḛ, 30#Rom 4.11-12,16. Pinii hii kone siilyi nii; ho mo mitupikonii mi lupya kendo mohluka henje giinii lo ho mitupipakoma niimi mohluka henje kopa. 31#Rom 8.4; Mt 5.17. Ngunu hokoda dapo mi jopa talyi peha siika henjelo? Pema hiilama! hiilamapa, ngunu dapo mi atii bikiñdo.

Currently Selected:

ROM 3: APATBSI

Highlight

Copy