ROM 1

1 # Miin 9.15; 13.2; 1 Kor 1.1; 2 Kor 1.1; Gel 1.15. Pol, Jisu Kristo ka miira, kiiniñkonii paka gyoliñ nii, Pinii ka ayapuyu paka atii tiingunii 2nii mina mo kappyopa hemme tola dotiinii mohka nyibuhenii atañlo darii piniipota ho, 3ayapuyu mohka Oho ka piigo mi, huna David ka ohoasi hokii bukotiinii asiialyo kii dalyi 4ho Pinii ka Oho lutii Yajiyallo ka darii ka harchichikelo mohka shiiniiñ hokii ka turiturku kuko hopa, Jisu Kristo ngunu Attoh, 5#Miin 26.16-18; Rom 15.18; Gel 2.7,9. hukiilona ngunu aroh-aya la kiiniñkonii ka miigomi kapa tiinii henjelaka luniiñ tako hopa, niimpalukoda mohka armyañ ka piigo kiipa hikha ganda siiko ho, 6nunu miilañmi lutala hutiina Jisu Kristo kii hiila lusu donii;

7 # 1 Kor 1.3; 2 Kor 1.2; Gel 1.3; Ipi 1.2; Pil 1.2; Kol 1.2; 1 Tes 1.2; 2 Tes 1.2; 1 Tim 1.2; 2 Tim 1.2; Tai 1.4; Pel 3; 2 Jn 3. Hikha Rom daka Pinii ka heniiñ atañ, hutiina piniimiyu hiila lusu donii:

Nunumi aroh-aya hiilyi ho chimie Pinii ngunuka Aba ho Attoh Jisu Kristo kokii.

Payapacho hiila Kuniiñ

8 # Rom 16.19. Kappyopa, ngo Pinii mi payapacho lulyi Jisu Kristo mi luta nala nunu miilañrupa, niimpalukoda nunuka henjemi hikha dohadolo so gyukotii. 9Niimpalukoda Pinii ngiika haki, humina ngo miihodonii ngiika yajiyallo lo Oho ka ayapuyu ho, lungo mapa ngo kiirañ niimi ngiika kuniiñ ho hempadu, 10#Rom 15.23,32; Miin 19.21. tahiibiidola niitañpajalo Pinii ka henko ho kamikalo ho ngo nunuko ahchi ladopa. 11Niimpalukoda ngo hempḛr nunumi kapa nanto, ngo nunuko yajiyallo ka ahmiñayiñ tonge mi lulii dupa nunu mika alḛr giinii pa, 12hiika hii, ngunu taliisiila kone anyañ ka henje lo haro lupa siidupa, anyerulo nunu kiilo la ho ngiikiilo. 13#Rom 15.22. Ngo nunumi chinke nenado, anubarmii atañ, ngo kiirañ nunuko ahnañto (hojalo siisilohe pa atiñ tola done), niimpalukoda ngo amoo iche ladupa nunuka punkoho ho hiika agiñho khiibe Midomiyu atañka punko hokii tiirḛ. 14#1 Kor 9.16. Ngo miibidopa lyido anyerupa Grik la nyibomiyu atañpa, helamiyu la piicha nyipa tiirḛ: 15hopa ngo ayapuyu mi tonsḛrkhenyo nando nunu mitrḛ hutiina Rom ho dunii.

Ayapuyu ka Harchichike

16 # 1 Kor 1.18,24. Niimpalukoda ngo hiinyañma ayapuyu pa: siikasi Pinii ka harchichike hikha koneabi paka sangopyako hutiina henje nyadonii, kapyopa Jew pa ho Grik patrḛ. 17#Rom 3.21; Gel 3.11; Pil 3.9; Hib 10.38. Niimpalukoda siikaso Pinii ka denki mi kakiñdo henjelo henjenii atañpa; hiila ketola do, “Hukiihona henje giidonii denki lo sankiñ doke.”#1.17 Malo Denki atañ henje loke sankiñ donii

Miyu ka Diimu mumunii

18 # Ipi 5.6; Kol 3.6. Niimpalukoda Pinii ka hadii hii yapuñ hokii kakiñ kendo hikha henjemanii atañ la diimmah miyu atañmi hutiina mohluka demma lo jijemi nampi biidonii. 19Niimpalukoda niihna chinkiñ donii Pinii ka piigo mi mohlupa kadḛrpa do, niimpalukoda Pinii mohlumi hiimi kakiñ tiiku. 20Dohadolo mika pubii jaho hokii mohka kapalama nii henjuhii, myando koda, mohka lyulamasanii harchichike la piniiaju hii, kadḛrpa kakiñ tola do drih puniiñ atañ ho. Hopa mohlumi hello lakiñma; 21#Ipi 4.17-18. mohlu Pinii mi chinsuda hojalo mohlu Pinii mi khiima malo mohmi payapacho luma, ho mohlu mohluka henjuho gonduama ho mohluka piigoamanii henju hii kamo giida. 22Piibi lusudo, mohlu piicha paya lyido, 23#Miin 17.29. ho shiilamanii Pinii ka tatukatu mi puchinii ajju paya liibiido, miyukapu malo piita malo achu-amyo malo tabutiyyo kapu pulala.

24Hopa Pinii mohlumi kahpa biido mohluka helyihembyo miibḛr nii ahha ho, mohluka apoatañ mi khiisu mapa miiko mohluka punkoho, 25niimpalukoda mohlu jije Pinii ka piigo mi amuhlo liisu biido ho heriinyada ho miihonyada putolaka donii miya, Puniibomika hensa niimi, huna ayu dahepa lyakiñ donii! Amen.

26Niimpalukoda siika piigopake Pinii mohlumi kahpa biinenii khiimanii henjuho. Mohluka nyimii atañ dumiñhenju miya opalala hensamanii yamiya herii nyada, 27ho milobo atañ tiirḛ hiichulipa dumiñka nyimii atañ agiñ hoka hensu niimiya opa lala ho mohlu anyañ ya hensu nyada, milobo atañ hiinyañ manii loda miinyada milobo agiñho ho mohlu mohluka miigyopa kapa kendoke mohluka miikha kopa.

28Ho mohlu Pinii mi lukodopa lyima lyiniiñ; Pinii mohlumi kahpa biido piigo giimanii henjuho ho miidimako miijuluju ho. 29Mohlu kapane demma miiju poteje giida, diimmah, hemikaminiiñ, kanamapa miiniiñ. Poteje kariñ, miyumenii, gasupasu, surudonyo, nyapakoya luniiñ, mohlu biicho, 30nipanii, Pinii mika kahunii, lujutaru, hengiñhentii siiniiñ, hentiisiila luniiñ, diimmah mika miiliñnii, annii-aba luniiñ tamanii, 31piicha, henje giimanii, ahhagiimanii, kiinyi. 32Mohlu Pinii ka dapo mi chinsu dotrḛ hutiina siika drih atañmi miidonii shiido pa lyido hiila, mohlu kontii hiimi miima, hojalo hiimika miinii atañ miilañmi ayado ludota.

Currently Selected:

ROM 1: APATBSI

Highlight

Copy