MIINIIÑ 26

Pol Agrippa ka hata hoka Lupya Siiniiñ

1Agrippa Pol mi lutii, “Niimi ludo pa bibii lyike.” Ho Pol mohka alah mi lyuliñ biidola ho mo lupya siitii:

2“Ngo hendo atohmi arho do hiila niika hata hoka danii siimi, Radde Agrippa, ngiimika siilo lupya siido paka biniiñmi hikha Jew atañka haliinii atañmi, 3niimpalukoda no chindo hikha miiju atañmi ho Jew atañka chesuresu niimi; hopa ngo niimi yardu chimiepa dula ngiimi tagepe hiila.

4“Ngiika sanju yapa hokiija, ngiika atoh ganda hokiika saribii jaho hokii ho Jerusalem hoka saniimi, chindoke hikha Jew atañ. 5Mohlu hempḛr anyañ hokii chindoke, mohlu matiirḛ pyako talyi hendo koda, ngunuka butii ka hempḛr henje henju jaho ngo Parisi ka sanju jaho santii. 6Ho siisi ngo tenka koto la dasu danii hengi naniiñ Pinii ka ngunu aba atañ mika biniiñ so, 7nii mina ngunuka alyañlenye haluka kapa kendo hiila ka hentinii, mohlu allo ayoh dadu mi kula dotii. Ho siika hengi naniipa ngo Jew atañlo halii kotii, O radde! 8Niimpa nunu henje nyalama Pinii shiinii mi turdo pa miila do hiila?

9 # Miin 9.1-8; 22.4-16. “Ngotiirḛ hensuto ngo abuje drih atañlo Nazaret daka Jisu armyañ mi chekho lakiñne. 10Ho ngo hiila Jerusalem ho miito; ngo abuje henjenii miyu atañmi patiihude ho kontii aliimapa, nyibu burii kokii otority kubiila, hojalo mohlumi shiido pa miito hiila ngo mohlumi chekhola lubo monto. 11Ho ngo mohlumi lamo kela hikha sinagog ho miito ho mohlumi nipa pa miilañ miito; ho mohlumi hempḛr hadii la chekhoto, ngo mohlumi miihimiire to nyibo ganda lohepa.

Pol Mohka Lyibomonii mi Lukodo

(Miin 9.1-19; 22.6-16)

12“Hiila ngo Damaskas ho myodi bohii nyibu burii kokii otority ho miisaniimi kubiila. 13Allo liipa ho, O radde, ngo lembo ho hutoh kapa yapuñ ho, danyi mitrḛ kanyañya, ngiimi ho hutiina ngiika agiñho imbo monii atañmi byokhe bii. 14Ho ngunu hikha kiiddi ho giiyi kiile, ngo aguñ gonge tapa Hibru aguñ pa ludopa, ‘Sol, Sol, niimpa no ngiimi miihimiire du? Si no atoh mike heru miipa siibii donii attoh mika alih tuku niisi.’ 15Ho ngo luto, No hupe Attoh? Ho Attoh lune, ‘Ngo Jisu humina no miihimiire donii. 16Hojalo gurito ho niika alih lo dato; niimpalukoda ngo niiko siika piigo pake ahdunii, niimi kahe dupa miiho niipa ho haki biniipa nii drih mina no kapa tiinii ngiimi ho hiika atañmi ngiika niikohoka ahniiñmi, 17niimi miyuatañ ko kiiniñ biilyi ho Midomiyu atañko, huko hona ngo niimi kiiniñ biilyi nii 18mohluka amee mi miiko kiine dupa, niimpalukoda mohlumi kamo hokii hutoh dalyiho mobokiine dupa ho Saitan ka harchichike hokii Pinii ko, niimpalukoda mohlumi ingyamiigyanii hokii hello koke nendupa ho hiika atañka agiñho atii dupa hutii mina ngiiko darii miitii kunii.’

Pol Mohka Miigomiiniiñ mi Lukodo

19“Hopa, O Radde Agrippa, ngo dariiganda hokiika mihu kapa niimi takho lamato, 20hojalo kapyopa Damaskas daka dunii mi luko lupyotii, ho Jerusalem, ho hikha Judia gandaho, ho Midomiyu atañ kotrḛ, niimpalukoda mohlumi henkur la Pinii ko ahkur kiine dukupa ho aya miigo miike nendupa mohluka henkur kuniiñmi. 21Siika piigopa Jew atañ ngiimi latutii piniiude ho, ho ngiimi mempa miitii. 22Siika allo lohe pa ngiiko hembyuñnii hii do Pinii kokiika ahnii, hopa ngo siikaso da pyakodupa atu ho kahe miilañmi, hang lumapa hojalo niihna nyibuhenii la Mose nyi lutiinii hiimi lyike nendupa: 23Kristo heru henkiñdo lodake, ho hiiko, kapyo japa ka shiinii hokiika turiturku niipa lyikiñdo, mo hutoh mi gyuko kendo miyuatañ mi ho Midomiyu atañ mi.”

24Ho mo siika lupya siiniiñmi lukele, Festas hempḛr goropa lutii, “Pol, no runduke; niika hempḛr uro chiniisi niimi rungii doke.” 25Hojalo Pol lutii, “Ngo ruma ke, hempḛr khiiniiñja Festas, hojalo ngo jije mike luko dunii. 26Niimpalukoda radde siika drih atañmi chindo ke, ho mohmi ngo biiso mapa luko du; niimpalukoda ngiimi lukotii siika drih atañ sokii kone hetrḛ hargii lakiñma kapa mapa, niimpalukoda siikasi khonchañ ho miila lyima. 27Radde Agrippa, no nyibuhenii atañmi henje duha? Ngo chindo no henje du hiila.” 28Ho Agrippa Pol mi lutii, “No ngiimi ohepada myodu so kristan pa miitodo hendoha!” 29Ho Pol lutii, “Ohepada ha malo diirii kendoha, ngo Pinii mi kuchi niimi kontii ma hojalo hikha siilo ka ngiika luniiñ mika tapa nii atañ patrḛ kristan lyido pa ngiika lyichañho, siika dachañ ranyi mi apalala.”

30Ho radde guritii, ho govonor ho Bernice ho hutiina mohluka agiñho dubo montii nii; 31ho mohlu lingii kula la, mohlu kone anyañ lusu nyatii, “Siika miyu si hang miigya ma mendopa malo pattiih tundopa.” 32Ho Agrippa Festas mi lutii, “Siika miyu simi apa dojalo aya kendo mo matiirḛ Kesar mi yama tiikoda.”

Currently Selected:

MIINIIÑ 26: APATBSI

Highlight

Copy