MIINIIÑ 16

Timoti Pol la Silas nyika Agiñ ho Imbo montii

1Ho mo Derbe ho Laistra hotiirḛ ahtii. Henjeajiñ kone hiiko dutii, Timoti hiila armyañ, Jew annii ka oho mo henjemiyu; hojalo mohka aba Grik tii. 2Mo anubarmii atañlo khiiko la lyitii Laistra la Ikonium ho. 3Pol Timoti mi mo agiñho imbo dokoda hiila hentii; ho mo mohmi ingiitii ho mohmi mitupipatii niimpalukoda hiika ganda atañ ho Jew duko hopa, mohlu hikha chintii mohka aba Grik hiila. 4Mo anye mohluka lembo ila citi atañmi impo biitii, mohlu mohlumi bitii kaniipa lusuniimi niihna kiiniñkonii atañko ho amiabañ atañ ahchi tiinii hutiina Jerusalem ho dutiinii. 5Hopa gyoliñkonii atañka henje hii alḛr ritii, ho mohlu allodadu mi abuyaya la lyitii.

Troas ho: Pol ka Mihukaniiñ

6Ho mohlu Phrygia la Gelesia ganda mi impo biila intii, niimpalukoda Darii Yajiyallo Asia ho aguñmi lukoyo hiila lutii. 7Ho mohlu Misia ka pache dalyiho ahchi biikele, mohlu Bitinia ho indupa miitii, hojalo Jisu ka Yajiyallo mohlumi inke nematii; 8hopa, Misia mi impo biila, mohlu Troas ho totii. 9Ho ayoh ho Pol mihu kappatii: Masedonia hokii miyu kone mohmi mela ho lubiido, “Masedonia ho ahto ho ngunumi hembyuñ pe.” 10Ho mo mihu kapa lala, nyibya loda ngunu Masedonia ho indupa miidu, hiila hela Pinii ngunumi gyodo ke ayapuyu mi mohlumi luko kiine dupa.

Pilipi ho: Lidia ka Lyibomonii

11Hopa Troas hokii khori biila, ngunu Samotrace ho khobo, ho allo lonye niiho Neapolis ho, 12ho hiiko hokii Pilipi ho, niihna Masedonia ka gandachie ka citi akho japa dotiinii, ho Rom ka koloni ho. Ngunu siika citi ho allo lonye lohiñhe dutiihe; 13ho dumoalo ho ngunu hagya ka ago, kiile pache dalyiho botiihe, nohna ngunu hela hiiko kuniiñ ka lengo dokiñdo hiila; ho ngunu duhala ho annii akha atañmi hoka ahniiñ atañmi lukola lyi. 14Kone huna ngunuka luniiñ mika taniibo annii akha armyañ Lidia hiila, Taitira citi hokii, niiji pulye pyunii, Pinii mika heriinii. Attoh mohka ahha mi miikotii Pol luniiñmi tage dopa. 15Ho mo baptisma laku lala, mohka ude uru agiñho, mo ngunumi mehii, lubiidola, “Nunu matiirḛ ngiimi Attoh pa lotiido hiila kado milo ngiika ude so ahto ho duto.” Ho mo ngunumi uropa lyarii.

Pilipi daka Patiihude ho

16Ngunu kuniiñ ka lengoho impa ila dokele, ngunu miira nyimii kone kapate huko hona uyi-ahniiñ yajiyallo giitiinii ho mo abuje mingo giila lyitii mohka atohmi mikhii rumbii dola. 17Mo Pol ngunumi imbo mongii, gyubii dola, “Siika miyu atañsi Hempḛr Kaye Pinii ka miira atañ, mohlu sangopyako ka lembo mi gyukodo.” 18Ho siika siimi mo abuje allo miitii. Hojalo Pol hadiitii, ho mokur biila ho yajiyallo mi lutii, “Ngo niimi Jisu Kristo ka armyañ pa lubii lyike mohkokii lintoku.” Ho hii hiika myodu jaho ago lintiiku.

19Ho mohka atoh hiimi kapa lala mohka mingo dupa ka hengiñ naniiñ hii hiineku hentii, mohlu Pol la Silas nyimi latutii ho mo anyemi biijḛr lengoho sangii niiko selii biitii; 20ho mohlu mohlumi diigolugolulyañ boko ahgiila mohlu lutii, “Siika miyu anyesi Jew ho mohlu ngunuka citi mi ahiare miipada. 21Mo anye ka luniiñsi hiika miiju mike, niihna ngunuka miijumanii, Rom miyuatañ talii mola kemanii ho miila kemanii.” 22#2 Kor 11.25. Miyu atañ mo anye mika pako ho pabo montii; ho diigolugolulyañ bo mo anye ka pulye mi sarchetii ho mo anye mi dachañ la hitote lutii. 23Ho mohlu abuje mo anyemi kiila lala, mohlu mo anyemi patiihude ho jopa liitii, patiihude kalya bomi mo anyemi aya kabii tolya lutii. 24Siika miitolya luniiñmi talii la, mo mo anye mi patiihude urañjaho atiitii ho mo anye ka alih mi rato la atiitii.

25Hojalo ayoh liipa ho Pol la Silas nyi kula ho Pinii pa bariebiisie sila dotii, ho patiihude mika kabiibo mo anye mi tala dotii, 26ho aluñpada hiiko hempḛr uropa myobu hutii, hopa patiihude ka rali hii abyu ritii; ho ohepada hikha alyeh atañ miiko ritii ho kone abika dachañtapḛr hii husu hitii. 27Pattiih ude mika kabiibo huro biila patiihude ka alyeh atañmi miiko tola dopa kapa lala, mo mohka ilyo mi seliñ lala mo atoh pakhii shiipa miitii, hiila hela pattiih tunko bo hargii haja giine hiila. 28Hojalo Pol gyutii hempḛr goropa, “Atohmi ayamapa miisuyo, ngunu miilañru si dake.” 29Ho mo muru kutii ho ura ho haratii, ho alyela biiso biidola mo Pol la Silas nyika hataho giihitii, 30ho mo anye mi ago lingiila ho lutii, “Miyu anyesi, niihpe ngo miido koda lyangur kokiñ donii?” 31Ho mo anye lutii, “Attoh Jisu mi henjeto, ho niimi lyangur kendoke, niimi ho niika udeuru mi.” 32Ho mo anye mohmi Attoh ka aguñmi lukotii ho miilañrumi mohka ude hoka dunii mi. 33Ho mo mo anye mi ingiitii hiika ayoh ho, ho mo anye ka une mi ase bitii, ho mo nyibya loda baptisma latii, hikha mohka uru atañ agiñho. 34Ho mo mo anye mi mohka ude ho chagiitii, ho mo anye mi diigo bitii; ho mo hikha mohka ude uru agiñho hempyo montii mohka Pinii mika henje kopa.

35Ho allo kukele, diigolugo lulyañbo atañ sipahi mi kiiniñtii, lubiidola, “Hiika miyu atañmi inke nento ku.” 36Ho patiihude kabiibo Pol mi luko biido, lubiidola, “Diigolugo lulyañbo atañ niinyimi inke nento ludo; hopa siisi agoho linto ku ho chimie pa ingeku.” 37Hojalo Pol mohlumi lutii, “Mohlu ngiinyimi supuñ kadopa hihii, hang haliimapa, ngiinyi Rom miyu mi, ho ngiinyi mi patiihude ho jopalii; ho siisi mohlu ngiinyimi mi chimapa neliñ toku hiila yuha? Ma! Mohlumi so ahke nento ho ngiinyimi ago lingii kiine toku.” 38Sipahi siika aguñ luniiñmi diigolugo lulyañbomi lukotii, ho mohlu biisotii mohlu mo anye Rom miyu hiila chila la; 39hopa mohlu ahla ho mo anye mi hello kupe lutii. Ho mohlu mo anye mi ago lingii kula ho mo anye mi citi apa tela ingeku lutii. 40Hopa mo anye patiihude hokii ago lintii ku, ho Lidia ho sohatii; ho mo anye anubarmii atañmi kapa lala, mo anye haro lupa tela ho intiiku.

Currently Selected:

MIINIIÑ 16: APATBSI

Highlight

Copy