MIINIIÑ 15

Jerusalem hoka Dupur

1 # Gel 2.1-10. Hojalo miyu tonge Judia hokii tobiila ho anubarmii atañmi tonsḛrtii, “Nii dahepa nunu Mose ka muju ho mitupipa kotema, nunu lyangur kola kema.” 2Ho Pol la Barnabas nyi chekhotii ho mohluka agiñho cheriitii, Pol mi ho Barnabas mi ho pongeyo tonge mi kahetii Jerusalem ho chake nendupa kiiniñkonii atañko ho amiabañ atañko siika piigopa. 3Hopa, gyoliñkonii lo kiiniñ kotola mohluka lembo ho intii, mohlu Poinisia la Samaria mi impo biitii, Midomiyu atañka lyiguh kuniiñ mi luko biidola, ho mohlu hempḛr hempyo bitii hikha anubarmii atañmi. 4Mohlu Jerusalem ho ahchi biikele, mohlumi kariikatañtii gyoliñkonii ho kiiniñkonii ho amiabañ atañ, ho mohlu hikha lukotii Pinii ka mohluka agiñ hoka miiniiñmi. 5Hojalo henjenii miyu tonge Parisi atañka agiñ hoka dabo monii guri nyatii, ho lutii, “Si mohlumi mitupipa dopa lyikiñ doke, ho mohlumi Mose ka dapo mi atiito hiila lukiñdo.”

6Kiiniñkonii atañ la amiabañ atañ tonge pa dakuñtii siika piigo mi taka siidupa. 7Ho hiiko abuje chesu kula la, Pitar guritii ho mohlumi lutii, “Anubarmii atañ, nunu chindo bilo allo ho Pinii nunumi kahe la miitii, niimpalukoda ngiika aguñlo Midomiyu atañmi ayapuyu mi tapa kiine dupa ho henje kiine dupa. 8Ho Pinii huna ahha mi chidonii mohlupa haki bitii, Darii Yajiyallo bibii dola ngunu mika bichañ ho; 9ho mo hang khiingu khiirema mohlumi la ngunu mila, hojalo mohluka ahha mi asetii henjelo. 10Siisi hopa niimpa nunu Pinii mi tenka da henjeajiñ atañka langu ho halii mi jocha la nii mina ngunuka aba atañ malo ngunu jola manii? 11Hojalo ngunu henjedu ngunumi lyangur tii Attoh Jisu ka aroh-aya kopa, hii chulipa mohlumi tiirḛ.”

12Ho hikha miyuatañ adu nyamatii; ho mohlu taladotii Barnabas la Pol nyika niihtañ kagiñnanii ho kahotamo Pinii miitii mohlumi miigiñ nala Midomiyu atañka punkoho. 13Mohlu luja kula la, Jems lusitii, Anubarmii atañ, ngiimi tageto. 14Simeon luko biine niihtañpa Pinii kapyopa Midomiyu atañka sohane, mohluko hokii miyu laliñtii mohka armyañ pa. 15Ho siika sokii nyibuhenii ka aguñ atañ talii nyatii, keto laka donii chuli,

16Hiikahiiba pa ngo ahkur talyi,

ho Ngo David ka duko mi penti talyi, niihna giihi dokunii;

ngo byaku niimi penti talyi,

ho ngo hiimi pencha talyi,

17niimpalukoda khiibemiyu atañmi Attoh mi meke nendupa,

ho hikha Midomiyu mi hutiina mina ngiika armyañ pa gyotiinii

18Attoh lutii, hu siika drih atañmi bilo ka khu hokii chindopa miitii.

19Hopa ngiika ayakacho kaniisi hiilake ngunu ahiare miipa masa hutiina Midomiyu hokii Pinii kii dalyi ahdonii, 20hojalo hiila kesa mohlumi dasa giitolya uyi miibḛr nii hokii ho kacho hokii ho nii mina garsḛr tiinii ho ai hokii. 21Niimpalukoda santuñ kapyo jaho hokii Mose ko done kapane citi atañ ho hutii na mohmi tonsḛr khenyo nenii, niimpalukoda mo dumoalo karmyañmi sinagog ho purine.

Midomiyu Henjenii Atañ mi Pota Bibiido

22Ho si kakele ayatii kiiniñkonii atañ la amiabañ atañpa, hikha gyoliñkonii agiñho, mohluka punko hokii miyu kaheto ho mohlumi Antiok ho kiiniñto Pol la Barnabas nyika agiñho. Mohlu Judas, Barsabbas luniiñ bomi, ho Silas, anubarmii hoka khiiniiñ jami kiiniñtii, 23siika siiti ka agiñho: “Anubarmii atañ, kiiniñkonii atañla ho amiabañ atañ, anubarmii hutiina Midomiyu Antiok ho Sairia ho Cilicia hokii, aya siidolo hendo. 24Ngunu hiila tapa lala miyu tonge ngunu kokii nunumi aguñ lubii dola ahiare miipa do hiila, nunuka punyu hendḛr lama hiitola, ngunu mohlumi luniiñmi luko biilyi ke, 25si kakoso ngunupa ayado, tongepaka lyardiñ siinii si, miyu kahe lala ho mohlumi nunuko kiiniñ biilyi ke ngunuka heniiñ Barnabas la Pol nyika agiñho, 26miyu huna atoh ka sango mi hempa siibi tiinii Attoh Jisu Kristo pa. 27Ngunu hopa Judas la Silas nyimi kiiniñ biilyi ke, mo anye nunumi luko kendoke siika drih mi aguñ patrḛ. 28Niimpalukoda siikasi kakoso ayado Darii Yajiyallo pa ho ngunu patrḛ nunumi abupa khiikhiidrḛ abha mapa siika khiiniiñ drih atañmi: 29niimpalukoda nunu dasa giitolya nii mina uyi mi membi tiinii ho ai hokii ho nii mina garkhii tiinii ho kacho hokii. Nunu matiirḛ atohmi siika atañ sokii dasa giila dokoda, nunu aya miikiñ doke. Kḛ hiila tiika.”

30Ho mohlumi kiiniñ kulala, mohlu Antiok ho totii; ho miyu atañmi tonge pa gyokuñ lala, mohlu siiti mi bibiido. 31Ho mohlu siimi puri lala, mohlu hempyotii haro lupa niimi. 32Ho Judas la Silas nyi, mo anye nyibuhenii siitrḛ, anubarmii atañmi haro lupatii abuje aguñlo ho mohlumi alḛr lupatii. 33Ho mohlu myodu iche lopa kulala, mohlumi chimie pa kiiniñ tiiku anubarmii atañko hutiina mohlumi kiiniñ tiinii.#15.33: Goñkhu 34 Hojalo kakoso Sailas hiikoho dulya dokoda aya yakiñdo 35Hojalo Pol la Barnabas nyi Antiok ho datii, tonsḛrla ho khenyola Attoh ka aguñmi, abuje khiibemiyu miilañmi.

Pol la Barnabas nyi Impe Siitii

36Ho allo lonye lohiñ dala lala Pol Barnabas mi lutii, “Ahto, kiije ngunu ahkursa ho anubarmii atañ ko sohasa citi kone abi nohna ngunu Attoh ka aguñmi gyuko tonii, ho kakasa mohlu niihtañ dona.” 37Ho Barnabas mo agiñho Jon mi ingii nantii Mak gyoko bomi. 38Hojalo Pol hendiko jaho hentii mohluka agiñho ingii namatii huna mohluko hokii Pampilia ho ingur giitii nii, ho mohluka agiñho imbo matiinii miigo miidupa. 39Ho hiiko hempḛr kadḛr henguhere ritii, hopa mohlu atoh atoh tache ritii; Barnabas mo agiñho Mak mi ingiila ho Saiprus ho khobo tii, 40hojalo Pol Silas mi kahe lala ho intiiku, anubarmii atañlo Attoh ka aroh-aya lo kiiniñ koto la. 41Ho mo Sairia la Cilicia ho intii, gyoliñkonii mi alḛr lupala.

Currently Selected:

MIINIIÑ 15: APATBSI

Highlight

Copy