Loos 8

Ua Neej Rawsli Vaj Ntsujplig Qhia

1Nimno tsis muaj kev rautxim rau cov uas nyob rau hauv Yexus Khetos lawm. 2Rauqhov Vaj Ntsujplig txoj kevcai uas coj peb los tau txojsia nyob rau hauv Yexus Khetos, twb tso kuv#8:2: kuv; tej phau ntawv qub uas xuas tes sau, muaj koj; lwm phau hais tias peb. dim ntawm txoj kevcai uas ua rau muaj txoj kev txhaum thiab txoj kev tuag lawm. 3Vajtswv ua tau yam uas txoj Kevcai tsis muaj peevxwm ua tau, vim yog neeg sab nqaijtawv tsis muajzog. Vajtswv txib Nws tus Tub los yug ua neeg muaj rojntsha zoo ib yam li peb cov uas yog neeg txhaum, kom Nws thiaj theej tau neeg lub txim. 4Vajtswv ua li ntawd, kom peb cov uas tsis ua lub neej rawsli sab nqaijtawv, tiamsis ua lub neej rawsli Vaj Ntsujplig, thiaj yuav ua tau rawsli txoj kev ncajncees ntawm txoj Kevcai tej lus qhia kom puvntoob.

5Cov uas ua lub neej rawsli sab nqaijtawv, cov ntawd yeej xavntsoov rau tej uas sab nqaijtawv ntshaw. Tiamsis cov uas ua lub neej rawsli Vaj Ntsujplig, cov ntawd yeej xavntsoov rau tej uas Vaj Ntsujplig lub siab ntshaw. 6Tus uas cia sab nqaijtawv ua tus tswj nws, thaum kawg nws yuav raug kev ploj kev tuag, tiamsis tus uas cia Vaj Ntsujplig ua tus tswj nws, thaum kawg nws yuav tau txojsia thiab kev thajyeeb. 7Cov neeg uas cia sab nqaijtawv ua tus tswj lawv, cov ntawd ua yeebncuab rau Vajtswv; rauqhov lawv tsis ua rawsli Vajtswv txoj kevcai, qhov tseeb tiag, lawv yeej coj tsis tau rawsli txoj kevcai ntawd. 8Cov uas ua rawsli sab nqaijtawv, cov ntawd yeej ua tsis tau haum Vajtswv siab.

9Yog Vajtswv tus Ntsujplig nyob hauv nej lawm tiag, nej yeej yuav tsis ua nej lub neej rawsli sab nqaijtawv qhia rau nej, tiamsis nej yuav ua rawsli Vaj Ntsujplig qhia rau nej. Tus uas tsis muaj Khetos tus Ntsujplig, tus ntawd yeej tsis yog Khetos tug. 10Tiamsis yog Khetos nyob hauv nej lawm, txawm yog nej lub cev yuav txawj tuag vim txoj kev txhaum, los nej tus ntsujplig yuav tsis tuag#8:10: nej tus ntsujplig yuav tsis tuag; lossis Vaj Ntsujplig yog nej txojsia. vim Vajtswv suav hais tias nej yog neeg ncajncees lawm. 11Yog Vajtswv tus Ntsujplig uas tsa Yexus sawv hauv qhovtuag rovqab los, nyob rau hauv nej lawm, ces tus uas tsa Khetos sawv hauv qhovtuag rovqab los ntawd, yuav pub rau nej lub cev uas txawj tuag kom muaj sia, uas yog los ntawm Nws tus Ntsujplig uas twb nyob rau hauv nej lawm. #1Klt 3:16

12Yogli ntawd cov kwvtij, peb muaj ib tes haujlwm uas yuavtsum tau ua, tiamsis tsis yog yuav ua rawsli sab nqaijtawv xav kom peb ua. 13Yog nej ua nej lub neej rawsli sab nqaijtawv, nej yeej yuav tuag; tiamsis yog nej ua nej lub neej rawsli Vaj Ntsujplig, nej yuav tua tau tej haujlwm ntawm sab nqaijtawv kom tuag mus, thiab nej yuav ciajsia. 14Cov uas cia Vajtswv tus Ntsujplig ua tus coj, cov ntawd yog Vajtswv cov menyuam. 15Rauqhov tus Ntsujplig uas Vajtswv muab rau nej ntawd tsis yog tus uas muab nej ua qhev kom nej txhawj nej ntshai, tiamsis yog tus uas coj nej los ua Vajtswv li menyuam, thiab los ntawm Nws lub hwjchim, nej muaj cuabkav hu Vajtswv hais tias, “Anpas! Txiv!” #Kalat 4:5-7 #Malak 14:36; Kalat 4:6 16Vajtswv tus Ntsujplig nrog rau peb tus ntsujplig ua timkhawv hais tias peb yog Vajtswv cov menyuam. 17Vim peb yog Vajtswv cov menyuam lawm, peb yuav tau txais tej koobhmoov uas Nws npaj tseg rau Nws haivneeg, thiab peb yuav tau nrog Yexus Khetos txais tej uas Vajtswv tau npaj tseg rau Nws lawm thiab; rauqhov yog peb twb nrog Khetos koom Nws txoj kev txomnyem lawm, peb yeej yuav tau nrog Nws koom Nws tus tshwjchim uas ci ntsa-iab thiab.

Tus Tshwjchim Uas Ci Ntsa-iab Yav Tomntej

18Kuv suav hais tias txoj kev txomnyem uas tamsim no peb raug yeej piv tsis tau tus tshwjchim ci ntsa-iab uas Vajtswv tseem yuav pub rau peb yav tomntej no. 19Ibpuas tsavyam uas Vajtswv tsim, yeej tosntsoov hnub uas Vajtswv yuav qhia txog Nws cov menyuam. 20Txhua yam uas Vajtswv tsim puavleej raug Nws foom phem, tsis yog tej ntawd xaiv txoj kev puastsuaj ntawd, tiamsis yog Vajtswv yeej pomzoo cia tej ntawd raug kev puastsuaj. Txawm li ntawd los tseem muaj kev ciasiab #Chiv 3:17-19 21hais tias, muaj ib hnub twg ibpuas tsavyam uas Vajtswv tsim, yuav dim ntawm txoj kev puastsuaj uas txawj lwj mus, thiab yuav tau nrog Vajtswv cov menyuam txais txoj kev ywjpheej uas zoo kawg nkaus.

22Peb paub tias txij thaum ub los txog niajhnub no, ibpuas tsavyam uas Vajtswv tsim ntsaj ntsoogqees nrog txoj kev mob, ib yam li tus pojniam uas mob plab yuav yug menyuam. 23Tsis yog ibpuas tsavyam uas Vajtswv tsim thiaj ntsaj ntsoogqees xwb, peb cov uas tau txais Vaj Ntsujplig uas yog thawj yam khoomplig uas Vajtswv pub rau peb lawm, los peb tseem ntsaj ntsoogqees tosntsoov hnub uas Vajtswv yuav coj peb los ua Nws cov menyuam thiab#8:23: Tej phau ntawv qub uas xuas tes sau, tsis muaj coj peb los ua Nws cov menyuam thiab. txhiv hlo peb lub cev kom dim. #2Klt 5:2-4 24Twb yog vim peb ciasiab li ntawd, peb thiaj dim; tiamsis yog peb twb pom yam uas peb ciasiab rau lawm, ces qhov ntawd tsis yog txoj kev ciasiab lawm. Leejtwg tseem yuav ciasiab rau tej uas nws twb pom lawm? 25Tiamsis yog peb ciasiab rau tej uas peb qhovmuag tsis pom, mas peb yeej yuav ua siabntev tos xwb.

26Ib yam nkaus li ntawd, thaum peb tsaugmuag Vaj Ntsujplig los pab peb. Rauqhov peb tsis paub tias peb yuav thov yam twg, tiamsis Vaj Ntsujplig yog tus thov Vajtswv pab peb ntawm lub suab ntsaj laws uas tsis muaj leejtwg yuav piav tau. 27Vajtswv tus uas pom mus rau hauv peb lub siab, yeej paub txog Vaj Ntsujplig tej kev xav; rauqhov tej uas Vaj Ntsujplig thov pab rau Vajtswv cov neeg, tej ntawd yeej rawsli Vajtswv lub siab nyiam.

28Peb paub tias Vajtswv siv txhua yam uas tshwmsim los ua yam zoo pub rau cov uas hlub Nws,#8:28: txhua yam uas tshwmsim los ua yam zoo pub rau cov uas hlub Nws; tej phau ntawv qub uas xuas tes sau, muaj txhua yam yog ua qhov zoo rau cov uas hlub Vajtswv. cov ntawd yog cov uas Nws tau hu los rawsli Nws lub homphiaj. 29Cov uas Vajtswv twb xub xaiv cia lawm, Nws muab tshwj rau ibcag kom lawv peemtsheej zooli Nws tus Tub, kom Leejtub thiaj yog tus tij nyob hauv cov ntseeg. 30Cov uas Vajtswv muab tshwj rau ibcag lawm, Nws hu lawv los; cov uas Nws hu los lawm, Nws suav hais tias lawv yog cov uas ncajncees; cov uas Nws suav hais tias ncajncees lawm, Nws pub Nws tus tshwjchim uas ci ntsa-iab rau lawv.

Vajtswv Txoj Kev Hlub Nyob Hauv Yexus Khetos

31Yogli ntawd, peb yuav hais licas txog tej no? Yog Vajtswv tuaj peb tog lawm, leejtwg tseem yuav tawmtsam tau peb? 32Vajtswv yeej tsis cawm Nws tus Tub, tiamsis Nws muab Nws tus Tub los theej peb sawvdaws lub txhoj! Nws twb pub tau Nws tus Tub, es Nws tseem yuav muab tsis tau txhua yam pub dawb rau peb thiab no lov? 33Leejtwg tseem yuav komtxim tau rau cov neeg uas Vajtswv xaiv lawm? Vajtswv tuskheej twb suav hais tias lawv tsis muaj txim lawm! 34Leejtwg tseem yuav rautxim tau rau lawv? Yuav tsis yog Yexus Khetos! Nws twb tuag, thiab tshaj qhov ntawd, Nws twb sawv hauv qhovtuag rov los muaj txojsia thiab nyob ntawm Vajtswv sab xis thov Vajtswv pub rau peb.

35Leejtwg tseem yuav cais tau peb tawm ntawm Khetos txoj kev hlub thiab? Teebmeem puas cais tau, lossis kev nyuajsiab, kev tsimtxom, kev tshaib nqhis, kev tsis muaj khaubncaws hnav, kev txhawj-ntshai, lossis kev ploj kev tuag puas cais tau? 36Rawsli Vajtswv Txojlus hais tias,

“Vim yog Koj es peb thiaj niajhnub ntsib kev tuag;

luag suav hais tias peb zooli tus yaj uas yuav raug cab mus tua.” #Nnkauj 44:22

37Tiamsis txawm yogli ntawd los, Khetos tus uas hlub peb, twb pab peb kovyeej txhua yam ntawd huv tibsi lawm! 38Rauqhov kuv paub tseeb hais tias yeej tsis muaj ib yam dabtsi uas yuav cais tau peb tawm ntawm Vajtswv txoj kev hlub li: txawm yog kev tuag lossis kev muaj sia nyob, cov timtswv lossis cov uas muaj hwjchim kav saum nruabntug, nimno lossis yav tomntej, 39saum nruabntug lossis hauv nruab tivtxwv, yeej tsis muaj ib yam uas yog Vajtswv tsim es yuav muaj peevxwm muab peb cais tau tawm ntawm Vajtswv txoj kev hlub uas nyob rau hauv Yexus Khetos tus uas yog peb tus Tswv kiag li.

Currently Selected:

Loos 8: MWW2022

Highlight

Copy