Loos 4

Anplahas Ua Yamntxwv

1Yogli ntawd, peb yuav hais licas txog peb yawgkoob Anplahas? Nws ua nws lub neej licas? 2Yog Vajtswv suav hais tias Anplahas ncajncees los ntawm tej uas nws ua, ces nws yeej muaj lus khav tau xwb, tiamsis nws yuav tsis muaj dabtsi khav nyob ntawm Vajtswv lub xubntiag. 3Vajtswv Txojlus hais tias, “Anplahas ntseeg Vajtswv, thiab vim nws txoj kev ntseeg ntawd, Vajtswv thiaj suav hais tias nws yog neeg ncajncees.” #Chiv 15:6; Kalat 3:6

4Tus neeg uas ua haujlwm nws yeej tau nqizog, tiamsis tej nqizog ntawd yuav suav tsis tau hais tias yog khoomplig, rauqhov tej ntawd yog nws khwv nws thiaj tau. 5Tus uas ciasiab rau txoj kev ntseeg es tsis ciasiab rau tes haujlwm, thiab tus uas ntseeg Vajtswv tus uas pab tau tus neeg txhaum kom ua tau neeg ncajncees, txoj kev ntseeg zooli no yog txoj uas Vajtswv txaussiab thiab suav hais tias nws yog tus ncajncees. 6Daviv kuj hais ib yam li ntawd, thaum nws hais txog tus uas muaj kev kajsiab vim Vajtswv suav hais tias nws ncajncees, tsis yog vim tes haujlwm uas nws ua:

7“Cov neeg uas Vajtswv zam lawv tej kev phem,

thiab zam lawv lub txim, yog cov uas tau zoo nyob kajsiab lug. #Nnkauj 32:1-2

8Tus uas Vajtswv tsis suav nws lub txim, tus ntawd tau zoo nyob kajsiab lug!”

9Txoj kev kajsiab uas Daviv hais no tsuas yog muaj rau cov neeg uas ua kevcai txiav xwb lov? Tsis yog li ntawd! Nws muaj rau cov neeg uas tsis ua kevcai txiav thiab. Peb twb txeev hais tias, “Anplahas ntseeg Vajtswv, Vajtswv thiaj suav hais tias Anplahas yog neeg ncajncees.” 10Thaum twg Vajtswv suav hais tias Anplahas yog neeg ncajncees? Yog thaum uantej lossis tomqab uas Anplahas ua kevcai txiav? Yog thaum uantej, tsis yog tomqab.

11Qhov uas Anplahas ua kevcai txiav ntawd yog lub cim uas qhia hais tias vim nws txoj kev ntseeg, Vajtswv thiaj suav hais tias nws yog neeg ncajncees uantej uas nws ua kevcai txiav. Yogli ntawd, Anplahas thiaj yog leejtxiv ntawm sab kev ntseeg rau txhua tus uas ntseeg Vajtswv, txawm yog lawv tsis tau ua kevcai txiav los xij, Vajtswv yeej suav hais tias lawv yog neeg ncajncees. #Chiv 17:10 12Anplahas kuj yog leejtxiv rau cov neeg uas ua kevcai txiav lawd thiab, qhov ntawd, tsis yog vim lawv ua kevcai txiav xwb, tiamsis vim lawv kuj ua lub neej ntseeg Vajtswv ib yam li peb txiv Anplahas ua nws lub neej uantej uas nws ua kevcai txiav thiab.

Vajtswv Coglus Rau Cov Uas Ntseeg Nws

13Qhov uas Vajtswv coglus rau Anplahas thiab nws li cajces hais tias lub ntiajteb no yuav yog nws tug, qhov ntawd tsis yog vim nws coj rawsli txoj Kevcai, tiamsis yog vim nws ntseeg, Vajtswv thiaj suav hais tias nws yog tus ncajncees. #Chiv 17:4-6; 22:17-18; Kalat 3:29 14Rauqhov yog tias Vajtswv muab tej uas Nws coglus tseg ntawd rau cov neeg uas coj rawsli txoj Kevcai, ces txoj kev ntseeg yeej tsis tseemceeb thiab Vajtswv tej lus cogtseg yeej tsis muaj qabhau dabtsi li. #Kalat 3:18 15Vim muaj txoj kevcai thiajli ua rau Vajtswv chim; tiamsis yog ho tsis muaj txoj kevcai, yeej tsis muaj neeg ua txhaum kevcai.

16Yogli ntawd, txoj kev coglus yog los ntawm txoj kev ntseeg, Vajtswv yuav muab Nws txoj hmoovhlub uas Nws tau coglus lawm pub rau txhua tus uas yog Anplahas cajces, tsis yog pub rau cov uas coj rawsli txoj kevcai xwb, tiamsis pub rau cov uas ntseeg ib yam li Anplahas ntseeg; rauqhov Anplahas yog peb sawvdaws leejtxiv ntawm sab kev ntseeg. #Kalat 3:7 17Rawsli Vajtswv Txojlus hais tias, “Kuv tau tsa koj ua leejtxiv rau ntau haivneeg.” Tej lus cogtseg ntawd yog hais timntsej timmuag ntawm Vajtswv tus uas Anplahas ntseeg; Nws yog tus Vajtswv uas tsa tau cov neeg uas tuag lawm sawv rov los muaj txojsia thiab yog tus uas hais kom yam uas ibtxwm tsis tau muaj dua ciali muaj, ces txawm muaj rawsli ntawd. #Chiv 17:5

18Txawm yog twb tsis muaj ib yam dabtsi uas yuav txaus ciasiab rau, los Anplahas yeej tseem ntseeg thiab ciasiab, vimli ntawd nws thiaj dhau mus ua “leejtxiv rau ntau haivneeg.” Rawsli Vajtswv Txojlus hais tias, “Koj li cajces yuav ntau npaum li tej hnubqub saum nruabntug.” #Chiv 15:5 19Thaum ntawd nws hnubnyoog twb yuav muaj 100 xyoo; nws lub cev ces twb zooli lub cev uas tuag lawm, thiab Xalas los twb xeeb tsis taus tub lawm; txawm li ntawd los nws txoj kev ntseeg yeej tseem ruaj-khov rau ntawm Vajtswv. #Chiv 17:17

20Nws yeej tsis tso nws txoj kev ntseeg tseg thiab yeej tsis ua ywjfab ywjfwj txog Vajtswv tej lus cogtseg; nws txoj kev ntseeg tseem hajyam ua rau nws ruaj-khov ntxiv, thiab nws hajyam ua Vajtswv tsaug xwb. 21Nws yeej paub tseeb hais tias Vajtswv yeej ua tau rawsli Vajtswv tau coglus tseg lawm. 22Twb yog vim nws txoj kev ntseeg ntawd, “Vajtswv thiaj suav hais tias nws yog neeg ncajncees.” 23Lolus uas hais tias “Vajtswv thiaj suav hais tias nws yog neeg ncajncees,” tsis yog sau rau Anplahas tibleeg xwb, 24tiamsis yog sau rau peb txhua tus uas Vajtswv suav hais tias ncajncees no thiab, uas ntseeg tus Vajtswv uas tau tsa peb tus Tswv Yexus sawv hauv qhovtuag rovqab los. 25Vim peb tej kev txhaum es Yexus Khetos thiajli raug txoj kev tuag, tiamsis Nws tau sawv hauv qhovtuag rov los muaj txojsia, kom peb ua tau neeg ncajncees. #Yaxaya 53:4-5

Currently Selected:

Loos 4: MWW2022

Highlight

Copy