Tshwmsim 2

Cov Lus Uas Xa Mus Rau Pawg Ntseeg Efexaus

1“Sau mus rau tus timtswv uas saib pawg ntseeg hauv lub nroog Efexaus hais tias:

“Cov lus no yog los ntawm tus uas tuav rawv xya lub hnubqub hauv Nws txhais tes xis thiab ncig mus ncig los nruabnrab hauv xya tus ncej kub txawb teeb: 2Kuv paub txog tej uas koj ua, paub txog koj txoj kev khwv, thiab koj lub siabntev. Kuv paub tias koj tiv tsis taus cov neeg phem, thiab koj twb sim cov neeg uas lawv hais tias lawv yog cov timthawj tiamsis lawv tsis yog, koj thiaj pom tias lawv yog neeg dag xwb. 3Koj ua siabntev, txawm yog koj raug kev txomnyem vim Kuv lub npe los koj tsis tsotseg li. 4Tiamsis Kuv tseem muaj qhov uas tsis txaussiab rau koj: koj tau muab koj thawj txoj kev hlub tsotseg lawm. 5Koj sim xav seb koj twb poob ntawm koj lub chaw mus deb npaum licas lawm! Ciali tso koj tej kev txhaum tseg thiab rov mus ua li tej uas thaum chivthawj koj ua. Yog koj tsis tso koj tej kev txhaum tseg, Kuv yuav los cuag koj thiab muab koj tus ncej txawb teeb rho tawm ntawm nws lub chaw mus. 6Tiamsis koj muaj ib qho uas zoo: koj ntxub yam uas cov neeg Nikaulaites ua ib yam li Kuv ntxub thiab.

7“Yog leejtwg muaj pobntseg, ciali mloog tej lus uas Vaj Ntsujplig qhia rau cov pawg ntseeg!

“Kuv yuav pub rau tus uas kovyeej mus noj tsob txivntoo uas muaj txojsia uas nyob hauv Vajtswv lub Vaj. #Chiv 2:9; Tshwm 22:2; Exek 28:13; 31:8 (LXX)

Cov Lus Uas Xa Mus Rau Pawg Ntseeg Xamawnas

8“Sau mus rau tus timtswv uas saib pawg ntseeg hauv lub nroog Xamawnas hais tias:

“Cov lus no yog los ntawm tus uas yog lub hauvpaus thiab yog lub ntsis, tus uas twb tuag lawm thiab rov muaj sia dua. #Yaxaya 44:6; 48:12; Tshwm 1:17; 22:13 9Kuv paub txog tej teebmeem uas los raug koj; Kuv paub tias koj pluag, tiamsis qhov tseeb tiag, koj yeej npluanuj! Kuv paub txog tej lus phem uas hais nkaug koj los ntawm cov neeg uas lawv khav hais tias lawv yog neeg Yudais, tiamsis lawv tsis yog; lawv yog lub chaw uas teevhawm Xatas! 10Tsis txhob ntshai tej kev txomnyem uas koj tabtom yuav raug. Ciali ua tibzoo mloog nawb! Dab ntxwgnyoog yuav sim koj los ntawm qhov uas nws yuav ntes nej qeeleej coj mus kaw rau hauv tsev lojcuj, thiab nej yuav raug kev tsimtxom kaum hnub. Koj yuavtsum ncajncees rau Kuv, txawm yuav ntsib kev tuag los xij, Kuv thiaj yuav muab txojsia ua nqizog uas yog ua lub mom kovyeej rau koj.

11“Yog nej leejtwg muaj pobntseg, ciali mloog tej lus uas Vaj Ntsujplig qhia rau cov pawg ntseeg!

“Tus uas kovyeej yuav tsis raug mob los ntawm txoj kev tuag zaum thib ob. #Tshwm 20:14; 21:8

Cov Lus Uas Xa Mus Rau Pawg Ntseeg Penkamus

12“Sau mus rau tus timtswv uas saib pawg ntseeg hauv lub nroog Penkamus hais tias:

“Cov lus no yog los ntawm tus uas muaj rab ntaj ob sab ntse uas ntse heev. 13Kuv paub koj qhov chaw nyob, qhov chaw ntawd yog qhov uas dab Xatas lub zwmtxwv nyob. Txawm yog Atipas, uas yog Kuv ib tug timkhawv ncajncees raug tua rau ntawm qhov chaw uas dab Xatas nyob, los koj tseem nyob ruaj nrees rau ntawm Kuv lub npe thiab tsis tso koj txoj kev ntseeg tseg. 14Txawm li ntawd los Kuv tseem muaj qeeyam uas tsis txaussiab rau koj: nej cov muaj qeeleej xyaum ua rawsli tej uas Npala-as qhia; nws qhia rau Npalaj kom dag cov neeg Yixalayees yuamkev ua txhaum los ntawm qhov uas kom lawv noj tej zaub-mov uas twb muab fij rau tej mlom lawm thiab kom lawv ua kev nkauj kev nraug. #Teev 22:5-7; 31:16; 2Kev 23:4; Teev 25:1-3 15Tibyam nkaus li ntawd, koj muaj ib co neeg uas coj ua rawsli cov neeg Nikaulaites tej lus qhia lawm thiab. 16Yogli ntawd, ciali tso koj tej kev txhaum tseg! Yog koj tsis ua li ntawd, Kuv yuav los cuag koj sai-sai no, thiab yuav muab rab ntaj uas tawm hauv Kuv lub qhovncauj los tawmtsam cov neeg ntawd.

17“Yog nej leejtwg muaj pobntseg, ciali mloog tej lus uas Vaj Ntsujplig qhia rau cov pawg ntseeg!

“Kuv yuav muab ib co manas uas tau muab zais cia lawm rau tus uas kovyeej. Thiab Kuv yuav muab ib lub pobzeb dawb uas muaj ib lub npe tshiab sau rau ntawm lub pobzeb ntawd rau nws. Tsis muaj leejtwg paub lub npe ntawd li, tsuas yog tus uas tau lub pobzeb ntawd thiaj paub xwb. #Khiav 16:14-15; 16:33-34; Yauh 6:48-50; Yaxaya 62:2; 65:15

Cov Lus Uas Xa Mus Rau Pawg Ntseeg Thiyatilas

18“Sau mus rau tus timtswv uas saib pawg ntseeg hauv lub nroog Thiyatilas hais tias:

“Cov lus no yog los ntawm Vajtswv tus Tub uas ob lub qhovmuag ci ib yam li nplaimtaws, thiab txhais kotaw ci ib yam li tej toojdag uas luag twb muab txhuam ci-ci lawm. 19Kuv paub txog tej uas koj ua. Kuv paub txog koj txoj kev hlub, koj txoj kev ntseeg, koj tes haujlwm, thiab koj txoj kev ua siabntev. Kuv paub tias nimno koj tseem ua haujlwm ntau tshaj li thaum ub uas koj nyuamqhuav pib ua. 20Tiamsis no yog qhov uas Kuv tsis txaussiab rau koj: koj yeem mloog tus pojniam uas hu ua Yexenpees, uas nws suav hais tias nws yog ib tug cev Vajtswv lus. Los ntawm nws tej lus qhia, nws dag-ntxias Kuv cov tubtxib mus ua kev nkauj kev nraug thiab mus noj tej zaub-mov uas luag twb muab fij rau tej mlom lawm. #1Vaj 16:31; 2Vaj 9:22, 30 21Kuv tau cia sijhawm rau nws tso nws tej kev txhaum tseg, tiamsis nws tsis kam hloov li. 22Yogli ntawd, Kuv yuav muab tus pojniam no pov rau saum lub lav mob; thiab Kuv yuav ua kom cov neeg uas nrog nws sibdee, raug kev txomnyem loj kawg nkaus li. Yog lawv tsis muab tej kev phem uas lawv nrog tus pojniam ntawd ua tsotseg, ces Kuv yuav ua li ntawd rau lawv tamsim no ntag. 23Kuv yuav muab cov uas raws tus pojniam ntawd qab thiab ua li nws tej lus qhia tua kom tuag. Thaum ntawd txhua pawg ntseeg yuav paub tias Kuv yog tus uas tshawb nrhiav neeg lub siab thiab tej kev xav, Kuv yuav muab nqizog rau nej txhua tus rawsli tej uas nej ua los. #Nnkauj 7:9; Yelemi 17:10; Nnkauj 62:12

24“Tiamsis nej txhua tus uas nyob hauv lub nroog Thiyatilas uas yeej tsis tau coj rawsli tej lus qhia uas phem ntawd thiab tsis tau kawm tej uas luag hais tias, ‘tej no yog Xatas tej ntsiablus uas tsis muaj neeg paub.’ Kuv qhia rau nej hais tias, Kuv yuav tsis muab lwm lub nra los ntxiv rau nej. 25Tiamsis nej yuavtsum tuav tej uas nej muaj lawm kom ruaj-ruaj mus txog hnub uas Kuv rov los. 26-28Tus uas kovyeej thiab ua rawsli Kuv lub siab nyiam mus txog thaum kawg, Kuv yuav pub hwjchim rau nws ib yam li Kuv Txiv tau pub rau Kuv. Kuv yuav tsa nws ua tus kav txhua haivneeg huv tibsi, nws yuav tswj lawv los ntawm tus qws hlau, thiab yuav muab lawv tsoo kom tawg mosnyoos ib yam li tej laujkaub av. Thiab kuv yuav muab lub hnubqub uas ci thaum yuav kajntug rau tus ntawd. #Nnkauj 2:8-9 (LXX)

29“Yog nej leejtwg muaj pobntseg, ciali mloog tej lus uas Vaj Ntsujplig qhia rau cov pawg ntseeg!

Currently Selected:

Tshwmsim 2: MWW2022

Highlight

Copy

Compare