Ntawv Nkauj 94
94
Vajtswv Yog Tus Txiavtxim Rau Txhua Yam
1Tus TSWV, Koj yog tus Vajtswv uas ua pauj rovqab;
qhia Koj txoj kev chim rau sawvdaws pom!
2Koj yog tus txiavtxim rau tibneeg ntiajteb;
ciali sawv thiab ua pauj rau cov neeg khavtheeb kom tsimnyog.
3Tus TSWV, cov neeg siabphem yuav zoosiab mus txog thaum twg?
lawv yuav zoosiab mus txog thaum twg?
4Lawv yuav haislus khavtheeb ntsuav
thiab khav txog tej kev phem uas lawv ua mus txog thaum twg?
5Tus TSWV, lawv caijtsuj Koj haivneeg
lawv tsimtxom cov uas yog Koj tug.
6Lawv tua cov pojntsuam thiab cov menyuam ntsuag,
lawv tua lwm haivneeg uas los nyob hauv peb lub tebchaws.
7Lawv hais tias, “Tus TSWV yeej tsis pom peb li;
cov Yixalayees tus Vajtswv yeej tsis quavntsej txog hlo li.”
8Kuv haivneeg, uacas nej yuav ruam ualuaj?
Yuav thaum twg nej mamli ntse?
9Vajtswv twb yog tus tsim peb ob lub pobntseg—uacas Nws thiaj yuav tsis hnov?
Nws twb yog tus tsim peb ob lub qhovmuag—uacas Nws thiaj yuav tsis pom?
10Nws twb yog tus qhuabntuas txhua haivneeg—uacas Nws thiaj yuav tsis rautxim rau lawv?#94:10: lawv; lossis peb cov thawjcoj uas siabphem.
Nws twb yog tus qhia txhua tus—uacas Nws thiaj yuav tsis muaj kev txawjntse?
11Tus TSWV paub txhua yam uas tibneeg xav hauv siab;
Nws paub tias tej uas tibneeg xav yeej tsis muaj qabhau dabtsi li.
12Tus TSWV, cov neeg uas Koj qhuabntuas,
cov uas Koj muab Koj txoj kevcai qhia rau, mas muaj kev kajsiab lug!
13Koj pub lawv tau so txij hnub uas muaj kev ntxhovsiab
mus txog hnub uas luag khawb tau qhov cuab cov tibneeg siabphem.
14Tus TSWV yuav tsis tso Nws haivneeg tseg;
Nws yuav tsis ncaim cov uas yog Nws tug hlo li.
15Yuav rov muaj kev ncajncees nyob rau hauv tej tsev tu plaub,
mas cov neeg ncaj yuav coj thiab ua rawsli txoj kev ncajncees ntawd.
16Leejtwg tau sawv mus tawmtsam cov neeg siabphem pub rau kuv?
Leejtwg tau tuaj kuv tog tawmtsam cov neeg ua phem ua qias?
17Yog tus TSWV tsis tau los cawm kuv,
ntshe kuv twb mus ceevnrooj rau hauv lub tebchaws uas nyob ntsiagto#94:17: lub tebchaws uas nyob ntsiagto: Yog tubtuag teb (saib 6:5). lawm.
18Thaum kuv quaj hu hais tias “Kuv ntog lawm lau”;
tus TSWV, Koj txoj kev hlub uas ruaj-khov tau tsa kuv sawv.
19Thaum kuv ntxhovsiab thiab txhawjxeeb,
Koj nplig kuv thiab ua rau kuv rov muaj kev zoosiab.
20Koj yeej tsis koomsiab nrog cov txiavtxim tsis ncaj
uas txiavtxim tsis rawsli txojcai,
21lawv tuavhauv ua tsis ncaj rau cov neeg zoo
thiab txiav lub txim tuag rau tus neeg tsis muaj txim.
22Tiamsis tus TSWV tivthaiv kuv;
kuv tus Vajtswv tsomkwm kuv.
23Nws yuav rautxim rau lawv vim tej kev phem uas lawv ua
thiab ua kom lawv puastsuaj vim lawv tej kev txhaum;
tus TSWV uas yog peb tus Vajtswv yuav ua kom lawv puastsuaj.
Currently Selected:
Ntawv Nkauj 94: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
