Filipis Lus Tawqhia
Lus Tawqhia
Tsab ntawv Filipis no yog Paulus sau mus rau thawj-thawj pawg ntseeg uas Paulus tsa tau nyob rau sab Yulauv, hauv lub xeev Makedaunias uas yog tebchaws Loos kav. Tsab ntawv no yog Paulus uas yog ib tug timthawj ua tus sau thaum nws tseem raug kaw rau hauv tsev lojcuj, thiab yog lub sijhawm uas nws raug kev nyuajsiab vim muaj lwmtus ntseeg uas ua Vajtswv haujlwm tawmtsam nws, thiab nws ntxhovsiab rau tej kev qhia cuav uas nyob rau hauv pawg ntseeg Filipis. Txawm li ntawd los tsab ntawv no ua rau sawvdaws muaj kev zoosiab thiab kev ruajsiab vim yog qhov kev qhia uas hais txog Paulus txoj kev ntseeg uas ruaj-khov rau hauv Yexus Khetos nkaus xwb.
Lub homphiaj uas sau tsab ntawv no yog Paulus uatsaug rau cov ntseeg hauv lub nroog Filipis uas lawv tau xa khoomplig mus pab rau Paulus thaum nws muaj kev cheemtsum. Paulus siv lub sijhawm no los txhawb lawv, kom lawv thiaj ua taus siabloj thiab muaj kev ciasiab, txawm yog muaj ntau yam teebmeem los raug nws thiab raug lawv los xij. Nws nquahu kom lawv muaj tus cwjpwm uas txo hwjchim ib yam li Yexus, zoo dua li lawv ua neeg muabhlob thiab khavtheeb. Nws rov qhia kom lawv ncontsoov tias qhov uas lawv tau los koom nrog Khetos ntawd yog ib qhov khoomplig uas yog Vajtswv txoj hmoovhlub uas lawv tau txais los ntawm txoj kev ntseeg xwb, tsis yog los ntawm qhov uas lawv coj rawsli cov Yudais tej Kevcai. Paulus sau txog tej kev zoosiab thiab kev kajsiab uas Vajtswv pub rau cov neeg uas ua neej nyob rau hauv Khetos.
Tsab ntawv no lub ntsiab yog hais txog txoj kev zoosiab, kev ruajsiab, kev koomxeeb thiab kev ua siabntev tiv nyob rau hauv lub neej uas ntseeg Vajtswv. Tsab ntawv no kuj qhia hais tias Paulus muaj lub siab hlub pawg ntseeg hauv lub nroog Filipis kawg li.
Txheejtxheem
Lus tawqhia (1:1-11)
Paulus tej teebmeem (1:12-26)
Lub neej nyob rau hauv Yexus Khetos (1:27—2:18)
Kev npaj rau Timautes thiab Epafauditus (2:19-30)
Ceebtoom kom ceevfaj cov yeebncuab thiab teebmeem (3:1—4:9)
Paulus thiab nws cov phoojywg hauv Filipis (4:10-20)
Xaus lus (4:21-23)
Currently Selected:
Filipis Lus Tawqhia: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.