Filipis 1

1Kuv uas yog Paulus, nrog rau Timautes, wb yog Yexus Khetos li tubtxib.

Wb sau tsab ntawv no rau txhua tus uas ntseeg Vajtswv hauv lub nroog Filipis, nrog rau cov txwjlaug thiab cov ncignum huvsi: #Teshl 16:12

2Thov Vajtswv uas yog peb Leejtxiv thiab tus Tswv Yexus Khetos pub txoj hmoovhlub thiab kev nyabxeeb rau nej.

Paulus Thov Vajtswv Pab Cov Ntseeg Hauv Filipis

3Txhua zaus uas kuv xav txog nej, kuv yeej ncontsoov ua kuv tus Vajtswv tsaug; 4thiab txhua zaus uas kuv thov Vajtswv pab nej sawvdaws, kuv yeej thov nrog txoj kev zoosiab xwb, 5vim nej tau koomtes nrog kuv ua tes haujlwm uas qhia Txoj Moo Zoo txij thawj hnub los txog rau niajhnub no. 6Yogli ntawd, kuv thiaj ciasiab hais tias Vajtswv tus uas tau pib ua tes haujlwm zoo no nyob rau hauv nej lawm, Nws yeej yuav ua kom tes haujlwm ntawd tiav rau hnub uas Yexus Khetos los. 7Yeej tsimnyog uas kuv xav li ntawd txog nej txhua tus, rauqhov nej yeej nyob nraim hauv kuv lub siab! Nej sawvdaws puavleej nrog kuv tau txoj koobhmoov uas Vajtswv pub rau kuv, tsis hais tamsim no uas kuv raug kaw rau hauv tsev lojcuj los yog thaum kuv tseem tabtom hais daws txog Txoj Moo Zoo, thiab ua kom Txoj Moo Zoo ntawd ruaj khovkho. 8Vajtswv yeej ua tau timkhawv qhia rau nej hais tias kuv yeej hlub nej ib yam li Yexus Khetos hlub nej.

9Kuv thov Vajtswv pab kom nej txoj kev sibhlub yuav loj zujzus ntxiv, thiab kom nej paub qhov tseeb thiab txiavtxim siab rau yam uas yog, 10kom nej thiajli paub xaiv hais tias yam twg yog yam uas zoo tshaj, thiab thiaj yuav ua tau neeg dawbhuv thiab tsis muaj chaw thuam tau thaum txog Hnub uas Yexus Khetos rovqab los. 11Nej lub neej yuav puvnpo txoj kev dawbhuv uas yog Yexus Khetos tibleeg thiaj muab tau rau nej, qhov ntawd thiaj yuav ua rau Vajtswv tau ntsejmuag thiab raug qhuas.

Ua Neej Pub Rau Khetos

12Cov kwvtij, kuv xav qhia rau nej paub tias tej uas kuv raug, tseem hajyam ua rau Txoj Moo Zoo nthuav dav ntxiv xwb. 13Vim tej uas kuv raug no, tagnrho cov tubrog uas zov huabtais lub vajloog thiab txhua tus uas nyob ntawm no, thiaj paub tias qhov uas kuv raug kaw hauv tsev lojcuj twb yog vim kuv yog Yexus Khetos li ib tug tubtxib. #Teshl 28:30 14Thiab qhov uas kuv raug kaw hauv tsev lojcuj no, tseem hajyam ua rau cov ntseeg muab siab rau ntseeg tus Tswv heev ntxiv, thiab ua rau lawv hajyam muaj lub siab tawv mus qhia Vajtswv Txojlus tsis ntshai li.

15Yeej muaj tseeb hais tias qeeleej qhuabqhia txog Khetos, tiamsis yog lawv qhia tawm ntawm txoj kev khib thiab kev sibcav xwb, tiamsis lwmtus kuj muaj lub siabncaj qhia tiag-tiag. 16Lawv cov no yog cov uas ua los ntawm txoj kev hlub, rauqhov lawv paub tias Vajtswv yog tus uas muab tes haujlwm hais daws txog Txoj Moo Zoo no rau kuv ua. 17Tiamsis dua lwm cov lawv tsis muaj lub siabncaj qhia txog Khetos, lawv tsuas qhia kom lawv tau nqizog xwb; lawv xav tias lawv yimhuab yuav tsim teebmeem ntxiv rau kuv, thaum uas kuv tseem tabtom raug kaw hauv tsev lojcuj no.

18Tiamsis tej ntawd yeej tsis ua licas rau kuv! Txawm yuav qhia ncaj thiab tsis ncaj los qhov tseemceeb tsuav yog Khetos zaj raug qhia nyob rau txhua qhov xwb ces kuv yeej zoosiab lawm. Thiab kuv yuav niajhnub zoosiab, 19vim kuv paub tias los ntawm nej txoj kev thov Vajtswv thiab los ntawm Yexus Khetos tus Ntsujplig txoj kev pab, luag yeej yuav tso kuv xwb. 20Qhov uas kuv ntshaw tshajplaws thiab ciasiab ntsoov rau ces yog qhov uas kom kuv tsis txhob ua ib yam dabtsi uas yuav ua rau kuv tau kev txajmuag, tiamsis kom kuv muaj lub siab tawv txhua lub sijhawm, tshwjxeeb yog tamsim no, kom kuv ua tau lub neej rau Khetos tau ntsejmuag, txawm kuv yuav ciaj thiab yuav tuag los xij.

21Rau kuv, ces txawm yog kuv muaj txojsia nyob los kuv tsuas nyob pub rau Khetos, txawm kuv tuag los hajyam zoo xwb. 22Yog kuv tseem muaj txojsia nyob ntawm sab nqaijtawv no ntxiv mus, ces hajyam ua rau kuv muaj cuabkav ua tau haujlwm kom tawgpaj txitxiv ntxiv xwb. Tiamsis kuv tsis paub tias xyov kuv yuav xaiv txoj twg thiajli zoo. 23Kuv ua ob lub siab. Kuv muaj ib lub siab xav tso lub ntiajteb no tseg thiab mus nrog Khetos nyob ntshe yuav zoo dua; 24tiamsis yog yuav kom pab tau nej mas yuavtsum yog kuv muaj sia nyob yuav zoo tshaj. 25Thaum kuv paub tseeb li no lawm, kuv thiaj paub tias kuv yuavtsum tau nyob. Kuv yuav tau nyob pab nej, kom nej lojhlob thiab muaj kev zoosiab nyob rau hauv txoj kev ntseeg, 26kom thaum kuv rovqab tau nrog nej nyob, nej thiaj yuav muaj kev zoosiab nyob rau hauv Yexus Khetos vim tseem muaj kuv.

27Qhov uas tseemceeb tshaj yog nej yuavtsum ua nej lub neej kom tsimnyog rawsli Khetos Txoj Moo Zoo, kom txawm yog kuv tuaj saib nej thiab tsis tuaj los kom kuv tau hnov xov hais tias nej tseem sawv khovkho thiab koom ib lub siab tivthaiv txoj kev ntseeg uas yog Txoj Moo Zoo. 28Tsis txhob ntshai nej cov yeebncuab, yuavtsum ua siab tawv qhawv. Qhov no yuav qhia tau rau lawv paub tias lawv yuav yog cov swb thiab nej yuav yog cov yeej, rauqhov Vajtswv yog tus uas muab txojkev yeej ntawd rau nej. 29Vim Vajtswv tau pub rau nej los ua Khetos tes haujlwm, tsis yog los ntseeg Nws nkaus xwb, nej yuav raug kev txomnyem tibyam nkaus thiab; 30nej tabtom raug tibyam li uas nej pom kuv raug yav tas los, thiab tej uas niajhnub no nej hnov tias kuv tseem tabtom raug thiab. #Teshl 16:19-40

Currently Selected:

Filipis 1: MWW2022

Highlight

Copy