Filipis 3

Txoj Kev Ncajncees Uas Tseeb

1Cov kwvtij, thaum kawg no, nej ciali zoosiab vim qhov uas nej tau nrog tus Tswv koom uake. Qhov uas kuv rov sau tej uas kuv twb sau tuaj rau nej yav tas los lawm, yeej tsis muaj dabtsi nyuaj rau kuv, tiamsis tsuas yog yuav ua kom nej muaj kev cobphum dua qub xwb.

2Nej yuavtsum ceevfaj cov dev ntawd, ceevfaj cov neeg uas ua phem ua qias, thiab ceevfaj cov neeg uas muab lawv tej tawv nqaij txiav. 3Peb thiaj yog cov ua kevcai txiav uas tseeb tiag, tsis yog lawv; peb pehawm Vajtswv los ntawm Vaj Ntsujplig, peb khav ntxhias txog Yexus Khetos, thiab peb yeej tsis ciasiab rau tej kevcai ntawm sab nqaijtawv kiag li. 4Yog kuv yuav ciasiab rau tej ntawd los yeej tau kawg. Yog nej leejtwg xav tias nws ciasiab tau rau tej kevcai ntawm sab nqaijtawv ntawd, kuv tseem hajyam muaj chaw ciasiab rau tej ntawd dua nws.

5Thaum yug kuv puv yim hnub xwb, lawv twb muab kuv ua kevcai txiav lawm. Kuv yog neeg Yixalayees, kuv yog xeem Npeeyamees, kuv yog tseem-tseem rojntsha neeg Henplais; yog yuav hais txog qhov uas coj rawsli Yudais tej kevcai, kuv yog ib tug Falixais ntag, #Loos 11:1; Teshl 23:6; 26:5 6kuv lub siab kublug xwb, kuv thiajli tsimtxom pawg ntseeg. Yog tias ib tug neeg twg muaj cuabkav ciali dawbhuv tau vim nws coj rawsli txoj kevcai, ces yeej tsis muaj leejtwg yuav thuam tau kuv li. #Teshl 8:3; 22:4; 26:9-11

7Tiamsis txhua yam uas yav tas los muajnqis rau kuv, nimno kuv suav hais tias tej ntawd tsis muajnqis lawm, vim kuv xav rau Yexus Khetos lawm xwb. 8Tshaj qhov ntawd thiab, kuv suav hais tias txhua yam tsis muajnqis li lawm, vim kuv tau yam uas tseem muajnqis heev dua tej ntawd; yam ntawd yog qhov uas kuv los paub Yexus Khetos tus uas yog kuv tus Tswv. Kuv saib tej ntawd zoo ib yam li tej liamsim lawm xwb, kuv thiajli muab txhua yam povtseg huv tibsi kom kuv thiaj tau Yexus Khetos 9thiab tau nrog Nws koom ib txojsia. Qhov uas kuv coj rawsli txoj Kevcai ntawd yeej ua tsis tau kom kuv ua tau neeg dawbhuv. Qhov uas kuv muaj txoj kev dawbhuv yog los ntawm txoj kev ntseeg Khetos xwb, uas yog txoj kev dawbhuv los ntawm Vajtswv los, uas yog txoj kev ntseeg.

10Qhov uas kuv xav tau tshajplaws yog kuv xav paub Khetos thiab xav saj lub hwjchim uas ua rau Nws sawv hauv qhovtuag rovqab los, xav muaj feem koom nrog Nws raug kev txomnyem thiab xav tuag zooli Nws, 11uas ciasiab hais tias Vajtswv yeej yuav tsa kuv sawv hauv qhovtuag rovqab los.

Khiav Mus Rau Tus Ciam Tom Kawg

12Kuv tsis tau hais tias kuv twb tau txais tej no lawm lossis ua tau kuv lub neej zoo kawg nkaus lawm, tiamsis kuv tseem tabtom siv zog ua kom kuv tau tej ntawd los ua kuv tug, ib yam nkaus li Yexus Khetos tau coj kuv los ua Nws tug. 13Cov kwvtij, kuv tsis xav#3:13: tsis xav; tej phau ntawv qub uas xuas tes sau, muaj tsis tau xav. hais tias kuv twb tau txais qhov ntawd lawm; tiamsis muaj ib yam uas kuv ua, yam ntawd yog tsis txhob xav txog yav tas los lawm, tiamsis rausiab ntso mus kom txog yam uas tseem nyob tom hauvntej. 14Yogli ntawd, kuv thiajli khiav ncajnraim mus rau tus ciam tom kawg kom kuv tau qhov nqizog uas Vajtswv tau hu kom kuv los txais hauv Tswv Yexus nyob saum ntuj ceebtsheej.

15Peb cov uas yeej lojhlob tiav niam tiav txiv ntawm sab kev ntseeg lawm, tsimnyog peb yuavtsum muaj qhov kev xav zoo ib yam nkaus. Tiamsis yog muaj qeeyam uas nej xav txawv lawm, Vajtswv yeej yuav qhia kom meej rau nej paub. 16Txawm licas los xij, cia peb coj rawsli tej uas peb twb coj los txog niajhnub no lawm.

17Cov kwvtij, nej yuavtsum xyaum ua rawsli kuv ua. Nej yuavtsum ua tibzoo saib cov neeg uas lawv coj rawsli tej yamntxwv uas peb twb ua rau nej xyaum lawm. #1Klt 4:16; 11:1 18Kuv twb qhia tej no rau nej ntau zaus lawm, nimno kuv rov qhia dua rau nej nrog lub kuamuag poob, vim muaj ntau leej ua lawv lub neej zooli lawv yog yeebncuab rau Khetos tus ntoo khaublig. 19Thaum kawg lawv yuav raug kev puastsuaj, vim lawv tus vajtswv yog lawv lub plab; lawv tseem muab yam uas tsimnyog txajmuag coj los khav, thiab lawv tsuas xav txog tej uas yog ntiajteb li xwb. 20Peb yog neeg qaumntuj, peb niajhnub ua siabntev tos peb tus Cawmseej, uas yog Tswv Yexus Khetos, tus uas yuav los saum ntuj los. 21Nws yuav muab peb lub cev uas txawj mob txawj tuag no hloov dua tshiab kom zooli Nws lub cev uas ci ntsa-iab uas yog los ntawm Nws lub hwjchim uas muaj peevxwm kav tau ibpuas tsavyam huv tibsi.

Currently Selected:

Filipis 3: MWW2022

Highlight

Copy