Teev Npe 6
6
Kev Tswjhwm Rau Cov Naxis
1Tus TSWV xaaj rau Mauxes tias, 2“Koj muab cov kevcai no qhia rau cov Yixalayees. Yog nej leejtwg, tsis hais txivneej lossis pojniam, uas tau coglus tshwjxeeb yuav peemtsheej mus ua cov Naxis thiab muab nws fij rau tus TSWV, 3mas yuavtsum caiv tsis txhob haus cawv txivhmab thiab cawv ntsim. Nws yuavtsum tsis txhob haus tej cawv uas muab kua txivhmab ua lossis tsis txhob noj tej txivhmab lossis cov txivhmab qhuav hlo li. #Lukas 1:15 4Tiam twg uas nws tseem yog ib tug Naxis, nws yuavtsum tsis txhob noj ib yam dabtsi uas yog los ntawm txivhmab li, txawm yog tej noob lossis tej tawv xwb los tsis txhob noj li.
5“Thaum uas nws tseem nyob hauv qhov kev coglus ua Naxis, nws yuavtsum tsis txhob txiav plaubhau lossis chais hwjtxwv. Nws yuavtsum ua neeg dawbhuv mus txog thaum lub sijhawm uas nws muab nws tuskheej fij rau tus TSWV tiav lawm, thiab nws yuavtsum tseg nws cov plaubhau kom ntev. 6Thaum lub sijhawm uas nws ua kevcai fij nws rau tus TSWV, nws yuavtsum tsis txhob mus ze tej neeg tuag. 7Txawm yog nws niam nws txiv, nws kwv nws tij, lossis cov muam tuag, los nws yuavtsum tsis txhob mus ze vim yuav ua rau nws lub cev tsis huv, rauqhov lub cim uas muab nws cais fij rau Vajtswv nyob saum nws taubhau. 8Tiam twg uas nws tseem yog ib tug Naxis, nws yeej yog tus neeg uas dawbhuv rau ntawm tus TSWV.
9“Yog muaj ib tug neeg ciali tuaj tuag rau ntawm tus Naxis ib sab, ua rau tus Naxis ntawd cov plaubhau uas dawbhuv tsis huv lawm, nws yuavtsum tos xya hnub thiab chais nws cov plaubhau mas nws thiaj rov ua tau tus neeg dawbhuv rawsli kevcai. 10Hnub thib yim nws yuavtsum nqa ib nkawm nquab taug lossis ib nkawm nquab nyeg tuaj rau tus povthawj hlob ntawm lub qhovrooj uas nkag rau hauv lub Tsevntaub Sibntsib. 11Tus povthawj hlob muab ib tug los fij daws txim thiab muab ib tug los hlawv fij, ua kevcai ntxuav nws, rauqhov nws tau chwv neeg tuag lawm. Tibhnub ntawd nws yuavtsum ua kevcai fij nws cov plaubhau 12thiab rov muab nws fij rau tus TSWV dua rawsli lub sijhawm uas nws tseem yog ib nws Naxis thiab cab ib tug thav yaj hnubnyoog ib xyoos tuaj tua ua khoom fij daws txim. Zaum qub uas thaum nws xub ua, siv tsis tau lawm, rauqhov nws tau ua rau nws cov plaubhau tsis huv lawm.
13“Nov yog txoj kevcai rau tus Naxis thaum lub sijhawm uas nws fij nws tuskheej txwm lub hnubnyoog lawm: nws yuavtsum mus rau tom lub qhovrooj uas nkag rau hauv lub Tsevntaub Sibntsib #Teshl 21:23-24 14thiab coj peb tug tsiaj uas tsis muaj ib qho phem li mus fij rau tus TSWV, xwsli: ib tug thav yaj hnubnyoog ib xyoos rau kev hlawv fij, ib tug xyuas yaj hnubnyoog ib xyoos rau kev fij daws txim, thiab ib tug laug yaj rau kev fij ua kev sib raugzoo. 15Nws yuavtsum nqa ib tawb ncuav uas tsis xyaw keeb mus thiab; muab ib co puab ua tej lub ncuav tuab-tuab xyaw roj txivntoo thiab muab ib co puab ua tej lub ncuav nyias-nyias pleev roj txivntoo, nrog rau cov hmoov nplej thiab cawv txivhmab tuaj fij ntxiv.
16“Tus povthawj hlob yuav tau coj tagnrho tej khoom no mus fij rau tus TSWV thiab muab fij daws txim thiab muab ibtxhia hlawv ua khoom fij rau tus TSWV. 17Nws yuavtsum muab tus laug yaj nrog rau tawb ncuav uas tsis xyaw keeb fij rau tus TSWV ua kev sib raugzoo, thiab muab cov hmoov nplej thiab cov cawv txivhmab fij nrog uake. 18Tus Naxis yuavtsum chais nws cov plaubhau nyob rau ntawm lub qhovrooj uas nkag rau hauv lub Tsevntaub Sibntsib thiab muab nws cov plaubhau coj mus hlawv rau hauv lub cubtawg uas tabtom hlawv cov khoom fij ua kev sib raugzoo.
19“Tus povthawj hlob yuavtsum muab ceg tes yaj uas tub muab hau siav lawm, nrog rau lub ncuav tuab thiab lub ncuav nyias hauv lub tawb los, coj mus cob rau tus Naxis txhais tes. 20Dhau ntawd, tus povthawj hlob yuavtsum muab cov khoom no mus yom fij ua ib qho khoom tshwjxeeb rau tus TSWV, nrog lub hauvnrob thiab cesqab uas muab yom fij ua tus povthawj hlob tug rawsli txoj kevcai; cov khoom fij no yog cov dawbhuv rau tus povthawj hlob. Tomqab ntawd tus Naxis mamli haus cawv tau.
21“No yog txoj kevcai uas tus Naxis yuavtsum coj. Tiamsis yog nws coglus tseg yuav muab khoom fij tshaj li txoj kevcai coglus tseg ntawd, mas nws yuavtsum ua kom tiav raws nraim li nws tau coglus tseg lawm.”
Cov Povthawj Hlob Tej Lus Foom Koobhmoov
22Tus TSWV xaaj rau Mauxes tias, 23“Koj qhia rau Aloos thiab nws cov tub kom siv tej lus no foom koobhmoov rau cov neeg Yixalayees:
24“Thov tus TSWV foom koobhmoov thiab tsomkwm nej;
25Thov tus TSWV lub ntsejmuag ci ntsa-iab rau nej thiab hlub nej;
26Thov tus TSWV tsa qhovmuag saib nej thiab pub rau nej muaj kev thajyeeb.”
27Tus TSWV hais tias, “Yog lawv tuav Kuv lub npe foom koobhmoov rau cov Yixalayees, Kuv yuav foom koobhmoov rau lawv.”
Currently Selected:
Teev Npe 6: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
