Teev Npe 11
11
Tus TSWV Tso Hluavtaws Los
1Cov pejxeem pib yws lawv tej kev txomnyem rau tus TSWV. Thaum tus TSWV hnov lawv tej lus yws, Nws chim rau lawv heev Nws thiaj tso hluavtaws los hlawv lawv. Hluavtaws tau kub lawv lub yeej tag ib tog. 2Cov pejxeem thiaj quaj mus thov Mauxes pab; Mauxes thiaj thov tus TSWV ces hluavtaws thiaj tuag lawm. 3Yogli ntawd, thiaj muab qhov chaw ntawd tis npe hu ua Tanpelas,#11:3: Tanpelas: Lub npe no hais muaj ntsis thooj li lolus Henplais uas hais tias “kubhnyiab.” rauqhov tus TSWV tau tso hluavtaws los kub lawv.
Mauxes Xaiv Xyacaum Leej Thawjcoj
4Muaj ib co neeg txawv tebchaws nrog cov Yixalayees taug kev uake. Lawv nqhis nqaij heev, txawm yog cov Yixalayees los ciali pib yws hais tias, “Kheevlam peb muaj nqaij noj xwb lau! 5Peb tseem nco tau thaum peb nyob hauv tebchaws Iziv peb txeev noj nqaij ntses, thiab yeej tsis tau them ib kis nyiaj li. Peb muaj dib ntsuab, dib liab, tej dos raj, dos ntug hauvpaus, thiab tej qij huv tibsi. 6Tiamsis nimno peb tsis muajzog li lawm, rauqhov peb tsis muaj dabtsi noj, tsuas yog niajhnub noj cov manas no xwb!”
( 7Manas zooli cov noob zaubtxhwb uas daj lis. 8-9Hmontuj cov manas no poob nrog tej lwg los hauv lub yeej. Thaum kajntug sawvdaws mus khaws coj los zom lossis tuav ua hmoov, ces muab cub kom siav mamli muab puab ua ncuav. Cov manas ntawd qab li tej hmoov nplej pleev roj txivntoo uas muab cub noj.)
10Mauxes hnov cov pejxeem uas tawm tuaj sawv ua tej pab tej pawg ntawm lawv tej qhovrooj tsevntaub lub suab yws. Nws nyuajsiab kawg li rauqhov tus TSWV chim heev rau lawv, 11nws thiaj hais rau tus TSWV tias, “Vim licas Koj thiaj cia tej kev kubntxhov no los rau kuv? Vim licas Koj thiaj tsis txaussiab rau kuv? Vim licas Koj thiaj muab tagnrho cov neeg no lub nra los tso rau kuv? 12Kuv tsis yog tus uas tsim lawv lossis tso lawv los yug ua neeg los sav! Vim licas Koj thiaj kom kuv tu lawv thiab muab lawv puag rau hauv xubntiag yam li tus menyuam mos, es coj lawv mus kom txog lub tebchaws uas Koj tau coglus tseg rau lawv cov yawgkoob lawm? 13Kuv yuav mus nrhiav nqaij qhovtwg thiaj txaus cov neeg no noj? Lawv pheej yws thiab thov kom kuv muab nqaij rau lawv noj! 14Kuv ib leeg xwb ris tsis taus cov neeg no, lub nra no hnyav dhau rau kuv lawm! 15Yog Koj tseem pheej yuav ua li no rau kuv xwb, thov Koj ciali muab kuv tua tamsim no yog tias Koj tseem hlub kuv thiab, kom kuv thiaj tsis tau tiv tej kev nyuajsiab no ntxiv lawm.”
16Tus TSWV hais rau Mauxes tias, “Hu cov Yixalayees xyacaum tus txwjlaug uas sawvdaws suav hais tias yog cov thawjcoj tuaj cuag Kuv. Kom lawv tuaj rau ntawm lub Tsevntaub Sibntsib, thiab hais kom lawv nrog koj sawv rau ntawd. 17Kuv yuav los nrog koj tham, thiab Kuv yuav muab tus Ntsujplig uas Kuv muab rau koj lawm faib rau lawv, kom lawv thiaj yuav pab tau koj ris cov neeg no lub nra, tsis txhob cia koj ib leeg ris xwb.
18“Hais rau cov pejxeem tias, ‘Ntxuav nej kom huv rau tagkis; nej yuav tau nqaij noj. Tus TSWV twb hnov nej tej suab yws hais tias nej xav tau nqaij noj thiab thaum nej nyob hauv tebchaws Iziv nej tseem tau zoo dua li los nyob ntawm no. Zaumno tus TSWV yuav muab nqaij rau nej, mas nej yuav tau nqaij noj. 19Nej yuav muaj nqaij noj tsis yog muaj noj ib-ob hnub, lossis tsib-rau hnub, lossis kaum hnub, lossis neesnkaum hnub xwb, 20tiamsis nej yuav muaj noj tsheej hli, mus txog thaum uas nqaij tawm hauv nej qhovntswg los, mus txog thaum uas nej dhuav tej nqaij ntawd. Tej no yuav tshwmsim tuaj, rauqhov nej tau tso tus TSWV uas nrog nej nyob tseg thiab tau yws Nws hais tias vim licas nej thiaj yuavtsum tau tawm hauv tebchaws Iziv los!’ ”
21Mauxes hais rau tus TSWV tias, “Cov neeg uas kuv coj los no muaj 600,000 leej, Koj hais tias Koj yuav muab nqaij rau lawv noj kom txaus ib hli no lov? 22Yuav muab nyuj thiab muab yaj npaumtwg los tua thiaj txaus lawv noj? Yog mus ntes tagnrho tej ntses hauv hiavtxwv los no puas yuav txaus lawv noj?”
23Tus TSWV teb tias, “Kuv txhais npab luv dhau lov? Zaumno koj yuav pom tias tej uas Kuv hais ntawd muaj tseeb lossis tsis tseeb lau!”
24Yogli ntawd, Mauxes thiaj tawm mus qhia rau cov pejxeem Yixalayees rawsli tus TSWV hais. Nws hu tau xyacaum tus txwjlaug tuaj thiab coj lawv mus sawv ncig lub Tsevntaub. 25Tus TSWV los rau hauv tauv huab thiab haislus hauv tauv huab tuaj rau Mauxes. Nws thiaj muab tus Ntsujplig uas Nws muab rau Mauxes lawm faib rau xyacaum tus txwjlaug ntawd. Thaum tus Ntsujplig ntawd los rau lawv lawm, lawv txawm tsa suab hlo qhia ib yam li cov xibhwb cev Vajtswv lus, tiamsis dhau ntawd lawv ciali tsis qhia ntxiv li lawm.
26Ntawm xyacaum tus txwjlaug ntawd, muaj ob tug uas npe hu ua Edas thiab Medas; nkawd nyob hauv lub yeej xwb, tsis tau mus rau tom lub Tsevntaub. Txawm yog nkawd nyob hauv lub yeej xwb los tus Ntsujplig lub hwjchim los rau saum nkawd, ces nkawd txawm pib tsa suab hlo qhia ib yam li cov xibhwb cev Vajtswv lus li thiab. 27Txawm muaj ib tug tub hluas khiav mus qhia tej uas Edas thiab Medas ua ntawd rau Mauxes.
28Noos tus tub Yausuas uas ibtxwm ua tus pab Mauxes thaum tseem yog tub hluas los, thiaj hais rau Mauxes tias, “Tus tswv, koj yuav tau cheem kom nkawd ciali tsum!”
29Mauxes teb tias, “Puas yog koj khib txog kuv? Kuv yeej xav kom tus TSWV pub Nws tus Ntsujplig rau tagnrho Nws haivneeg thiab ua rau lawv txhua tus qhia ib yam li cov xibhwb cev Vajtswv lus!” 30Ces Mauxes thiab cov Yixalayees xyacaum tus txwjlaug txawm rov mus rau hauv lub yeej lawm.
Tus TSWV Tso Noog Ncuab Ya Los
31Tamsim ntawd tus TSWV txawm tso ib nthwv cua ntsawj ib co noog ncuab ya nram hiavtxwv siab li 1 mev saum npoo av los. Cov ncuab ntawd los nyob rau ntawm ntug yeej thiab nyob puagncig lub yeej mus deb tsheej hnub ke.#11:31: Cov ncuab … hnub ke; lossis Cov ncuab ntawd los nyob rau hauv lub yeej thiab nyob puagncig lub yeej mus deb tsheej hnub ke, mas lawv nyob sib tsub mus siab li 1 mev saum npoo av. 32Cov pejxeem sawvdaws tawm mus ntes ncuab ib hnub, ib hmos, thiab hnub tomqab ib hnub; tsis muaj ib tug uas ntes tau tsawg tshaj tsibcaug tawb. Ces lawv nqa los tseev thiab muab ziab thoobplaws ntug yeej cia ua nqaij qhua. 33Thaum lawv tseem muaj nqaij noj ua npuav ua npo, tus TSWV chim rau cov pejxeem heev, Nws thiaj tso kab mob kis los rau lawv. 34Lawv thiaj tis npe rau qhov chaw ntawd hu ua Kinpalaus Hata-avas (txhais hais tias “Cov Ntxa ntawm kev Nqhis”), rauqhov lawv log cov neeg uas nqhis nqaij rau thaj chaw ntawd.
35Cov pejxeem sawvdaws thiaj khiav ntawm Kinpalaus Hata-avas mus rau Haxelaus thiab lawv mus tsuam yeej nyob rau ntawd.
Currently Selected:
Teev Npe 11: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
