Malakaus 16

Yexus Sawv Hauv Qhovtuag Rov Los

(Mathais 28:1-8; Lukas 24:1-12; Yauhas 20:1-10)

1Thaum dhau hnub Xanpataus lawm, Malis Madalas, Malis uas yog Yakaunpaus niam, thiab Xalaumes txawm mus yuav tshuaj tswqab coj mus pleev Yexus lub cev. 2Hnubkaj thaum kajntug txoog, thaum lub hnub tabtom pib tawm tuaj, lawv txawm mus tom lub qhovntxa. 3Thaum lawv taug kev mus, lawv sibtham hais tias, “Leejtwg yuav pab peb muab daim lagzeb uas npog lub rooj ntxas dov tawm?” (Daim lagzeb ntawd loj kawg li.) 4Thaum lawv mus txog lawm, lawv tsa qhovmuag ntsia mas pom tias daim lagzeb twb dov rau ibcag lawm. 5Thaum lawv mus rau hauv lub qhovntxa, lawv pom ib tug tub hluas hnav ib lub tsho dawb ntev-ntev nyob hauv lub qhovntxa sab xis, mas lawv ntshai kawg li.

6Tus tub hluas ntawd hais rau lawv tias, “Nej tsis txhob ntshai, kuv paub tias nej tuaj nrhiav Yexus uas yog neeg Naxalev uas luag muab ntsia rau saum ntoo khaublig. Nws tsis nyob ntawm no, Nws twb sawv los lawm! Nej saib maj, ntawm no yog qhov chaw uas luag muab Nws lub cev tso cia. 7Nej ciali rovqab mus qhia rau Nws cov thwjtim, thiab hais rau Petus hais tias, ‘Nws yuav ua nej ntej mus rau pem Kalilais; nej yuav ntsib Nws ped rawsli Nws tau qhia rau nej lawm.’ ” #Math 26:32; Malak 14:28

8Cov pojniam ntawd txawm tawm hauv lub qhovntxa khiav rovqab los, ntshai ua ibce tsheehnyo thiab ntxhovsiab kawg. Lawv tsis qhia rau leejtwg li rauqhov lawv ntshai heev.

Nqe Xaus Qub Ntawm Phau Malakaus#16:8: Tej phau ntawv qub uas xuas tes sau thiab tej phau uas xub txhais tsis muaj cov nqe xaus ntev no nyob rau hauv phau Malakaus (nqe 9-20).

Yexus Tshwm Rau Malis Madalas Pom

(Mathais 28:9-10; Yauhas 20:11-18)

[ 9Thaum Yexus sawv hauv lub qhovtuag rovqab los uas yog Hnubkaj thaum tseem ntxov-ntxov, Nws xub los tshwm rau Malis Madalas pom uantej. Malis Madalas yog tus uas Yexus tau ntiab xya tus dab tawm lawm. 10Nws tau mus qhia tej uas nws pom rau Yexus cov phoojywg uas lawv tseem tabtom nyuajsiab thiab quajntsuag. 11Txawm lawv hnov Malis hais tias Yexus twb rov muaj txojsia thiab Malis twb pom Yexus lawm los lawv tsis ntseeg li thiab.

Yexus Los Tshwm Rau Ob Tug Thwjtim Pom

(Lukas 24:13-35)

12Tomqab ntawd, Yexus hloov dua lwm lub cev los tshwm rau ob tug thwjtim pom, thaum lub sijhawm uas nkawd tabtom taug kev mus rau pem yajsab. 13Nkawd rovqab los qhia tej no rau cov thwjtim mloog, tiamsis lawv kuj tsis ntseeg nkawd li thiab.

Yexus Los Tshwm Rau Kaum-Ib Tug Thwjtim Pom

(Mathais 28:16-20; Lukas 24:36-49; Yauhas 20:19-23; Tes Haujlwm 1:6-8)

14Thaum kawg Yexus los tshwm rau kaum-ib tug thwjtim pom thaum lawv tabtom noj mov. Yexus cem lawv, rauqhov lawv tsis muaj kev ntseeg, lawv muaj lub siab tawv, vim lawv tsis kam ntseeg tej neeg uas twb pom Yexus ciajsia rov los lawm. 15Yexus hais rau lawv tias, “Nej ciali mus thoobplaws lub ntiajteb no thiab qhia Txoj Moo Zoo rau txhua haivneeg. #Teshl 1:8 16Tus uas ntseeg thiab ua kevcai rausdej yuav dim; tiamsis tus uas tsis ntseeg yuav raug txim. 17Cov uas ntseeg yuav tau lub hwjchim uas ua tau tej txujci tseemceeb: lawv yuav tuav Kuv lub npe ntiab tau dab tawm; lawv yuav hais tau lwmyam lus tshiab; 18yog lawv tuav raug nab los nab yuav tsis tom, yog lawv haus tau tshuaj muaj taug los lawv yuav tsis tuag; thaum lawv cev tes npuab cov neeg muaj mob, cov neeg ntawd yuav zoo.”

Vajtswv Coj Yexus Mus Saum Ntuj

(Lukas 24:50-53; Tes Haujlwm 1:9-11)

19Thaum tus Tswv Yexus qhia lawv tas lawm, Vajtswv txawm coj Nws mus rau saum ntuj ceebtsheej thiab mus nyob ntawm Vajtswv sab xis. #Teshl 1:9-11 20Cov thwjtim thiaj tawm mus qhia thoobplaws txhua qhov, thiab tus Tswv tau nrog lawv ua haujlwm thiab lees paub tias lawv tej lus qhuabqhia yeej tseeb tiag los ntawm qhov uas lawv ua tau tej txujci tseemceeb.]

Dua Lwm Nqe Xaus Qub#16:20: Tej phau ntawv qub uas xuas tes sau thiab tej phau uas xub txhais, muab cov nqe xaus luv no tso rau hauv phau Malakaus uas yog ntxiv rau ntawm cov nqe xaus ntev (nqe 9-20).

[ 9Cov pojniam mus cuag Petus thiab Nws cov phoojywg, thiab qhia me ntsis txog txhua yam uas Yexus tau hais rau lawv. 10Tomqab ntawd, Yexus thiaj xa Nws cov thwjtim mus thoobplaws sab hnubtuaj mus rau sab hnubpoob, uas yog mus qhia txojlus ciajsia thiab txoj kev cawmdim uas nyob mus ibtxhis.]

Currently Selected:

Malakaus 16: MWW2022

Highlight

Copy