Malakaus 15

Philaj Taug Yexus Zaj

(Mathais 27:1-2, 11-14; Lukas 23:1-5; Yauhas 18:28-38)

1Thaum kajntug txoog, cov thawj povthawj hlob txawm mus nrog cov txwjlaug, cov xibhwb uas qhia Kevcai, thiab tagnrho cov thawjcoj hauv Koomhaum qibsiab, seb lawv yuav ua licas rau Yexus. Lawv muab Yexus khi thiab coj mus cob rau Philaj. 2Philaj nug Yexus hais tias, “Koj puas yog cov Yudais tus vajntxwv?”

Yexus teb tias, “Yog li koj hais.”

3Cov thawj povthawj hlob kom ntau yam txog Yexus, 4yogli ntawd, Philaj thiaj rov nug Yexus hais tias, “Koj tsis teb lawv lov? Koj puas hnov txog ntau zaj uas lawv kom Koj no?”

5Tiamsis Yexus tsis teb ib los li thiab, ua rau Philaj xav tsis thoob li.

Txiavtxim Muab Yexus Tua

(Mathais 27:15-26; Lukas 23:13-25; Yauhas 18:39—19:16)

6Txhua zaum uas ua kevcai Hla Dhau, Philaj yeej tso ib tug neeg raug txim rawsli cov pejxeem thov. 7Muaj ib tug txivneej hu ua Npalanpas, nws raug kaw nyob hauv tsev lojcuj nrog rau cov neeg uas ntxeevsiab rau nomtswv uas lawv tau tua neeg rau thaum muaj kev ntxeev nom ntxeev tswv ntawd. 8Thaum cov neeg coob-coob tuaj uake thiab thov Philaj kom tso ib tug neeg rau lawv rawsli nws ibtxwm tso, 9Philaj nug lawv hais tias, “Nej puas xav kom kuv tso cov Yudais tus vajntxwv rau nej?” 10Philaj yeej paub tseeb hais tias qhov uas cov thawj povthawj hlob ntes Yexus tuaj rau nws ntawd twb yog vim lawv khib xwb.

11Tiamsis cov thawj povthawj hlob ntxias kom cov pejxeem thov Philaj tso Npalanpas los rau lawv. 12Philaj rov nug cov pejxeem hais tias, “Nej xav kom kuv ua licas rau tus uas nej hu hais tias yog cov Yudais tus vajntxwv?”

13Lawv qw nrov-nrov hais tias, “Muab Nws ntsia rau saum ntoo khaublig!”

14Philaj rov nug lawv hais tias, “Vim licas? Nws tau ua txhaum dabtsi?”

Lawv yimhuab qw nrov dua qub hais tias, “Muab Nws ntsia rau saum ntoo khaublig!”

15Philaj xav ua kom haum cov pejxeem sawvdaws siab, nws thiaj tso Npalanpas rau lawv. Nws thiaj kom lawv muab Yexus nplawm, thiab muab cob rau lawv coj mus ntsia rau saum ntoo khaublig.

Cov Tubrog Ua Saib Tsis Taus Yexus

(Mathais 27:27-31; Yauhas 19:2-3)

16Cov tubrog txawm coj Yexus mus rau hauv lub tshavloog ntawm tus tswvxeev lub vajloog thiab hu tagnrho lawv cov tubrog tuaj uake. 17Lawv muab ib lub tsho ntev tsamxem rau Yexus hnav, thiab muab pos kausntsaj qhaib ua ib lub kausmom looj Nws taubhau. 18Lawv uatxuj hawm Nws thiab hais tias, “Thov kom cov Yudais tus Vajntxwv muaj sia nyob ntev!” 19Lawv muab ib tug lojkov ntaus Yexus taubhau, nto qaubncaug rau Yexus, txhoscaug thiab uatxuj pe Nws. 20Thaum lawv ua saib tsis taus Yexus tas lawm, lawv muab lub tsho ntev tsamxem hle thiab rov muab Nws cev khaubncaws kho rau Nws hnav. Ces lawv txawm coj Nws tawm mus thiab muab Nws ntsia rau saum ntoo khaublig.

Yexus Raug Ntsia Rau Saum Ntoo Khaublig

(Mathais 27:32-44; Lukas 23:26-43; Yauhas 19:17-27)

21Thaum lawv tabtom tawm mus, lawv ntsib ib tug txivneej hu ua Ximoos, uas yog neeg Kulenes, nws yog Alexadaws thiab Lufus txiv, nws tabtom dhau kev uas yog tuaj pem yajsab tuaj; cov tubrog txawm ciali yuam kom nws kwv Yexus tus ntoo khaublig. #Loos 16:13 22Lawv coj Yexus mus rau ntawm qhov chaw uas hu ua Khaulakhauthas, uas txhais hais tias, “Pobtxha Taubhau.” 23Thaum ntawd lawv txawm muab cawv txivhmab tov xyaw tshuaj maules cev rau Yexus haus, tiamsis Nws tsis kam haus. 24Thaum lawv muab Nws ntsia rau saum ntoo khaublig lawm, lawv txawm muab Nws cev ristsho los twv seb leejtwg yuav tau yam twg. #Nnkauj 22:18 25Lub sijhawm uas lawv muab Yexus ntsia rau saum ntoo khaublig yog thaum cuaj teev sawvntxov. 26Cov lus uas lawv sau kom txog Yexus yog: “Cov Yudais tus Vajntxwv.” 27Lawv kuj muab ob tug tubsab ntsia nrog Yexus thiab; ib tug nyob ntawm Nws sab xis thiab ib tug nyob ntawm Nws sab laug. 28#15:28: Tej phau ntawv qub uas xuas tes sau ntxiv nqe 28 no rau: Tej no muaj tiav rawsli Vajtswv txojlus uas hais tias, “Luag suav hais tias Nws ua txhaum ib yam li tej neeg txhaum thiab” (saib Lukas 22:37). #Yaxaya 53:12

29Cov neeg uas dhau kev co taubhau nto thiab txobthuam Yexus hais tias, “Ahaj! Koj twb yuav rhuav lub Tuamtsev thiab peb hnub Koj yuav rov ua dua tshiab no ne! #Nnkauj 22:7; 109:25; Malak 14:58; Yauh 2:19 30Ciali nqis saum ntoo khaublig ko los thiab cawm Koj kom dim los mas!”

31Cov thawj povthawj hlob thiab cov xibhwb qhia Kevcai los kuj thuam Yexus ib yam nkaus thiab. Lawv sibtham hais tias, “Nws cawm tau lwmtus, tiamsis Nws ho cawm tsis tau Nws tuskheej! 32Kom tus Mexiyas uas yog cov Yixalayees tus vajntxwv ciali nqis kiag saum ntoo khaublig los tamsim no, kom peb thiajli pom thiab ntseeg tau Nws!”

ob tug tubsab uas raug ntsia rau saum ntoo khaublig nrog Yexus los kuj txobthuam Yexus thiab.

Yexus Txoj Kev Tuag

(Mathais 27:45-56; Lukas 23:44-49; Yauhas 19:28-30)

33Thaum tavsu, thoobplaws lub tebchaws txawm ciali tsausntuj nti tau peb txoosteev. 34Thaum peb teev hnubqaij, Yexus txawm hu nrov-nrov hais tias, “Elau-is, Elau-is, lemas xanpathanis?” uas txhais hais tias, “Kuv tus Vajtswv, Kuv tus Vajtswv, vim licas Koj thiaj muab Kuv tsotseg lawm?” #Nnkauj 22:1

35Ibtxhia neeg uas sawv ntawd hnov Yexus hais li ntawd, lawv hais tias, “Nej mloog seb, Nws tabtom hu Eliyas!” 36Cov neeg ntawd muaj ib tug txawm khiav mus muab ib lub xwbkuab raus cawv txivhmab qaub, muab chob rau ib tug pas thiab cev mus rau Yexus haus, thiab hais tias, “Tos rawm, cia peb tos mentsis seb puas pom Eliyas los pab txo Nws saum tus ntoo khaublig!” #Nnkauj 69:21

37Yexus hu ib suab nrov-nrov, ces Nws txawm tusiav nrho lawm.

38Daim ntaub uas thaiv hauv lub Tuamtsev txawm ntuag rhe saum hau ti nkaus rau hauv taw ua ob daig. #Khiav 26:31-33 39Tus thawj tubrog pawg pua uas sawv tom hauvntej ntawm tus ntoo khaublig pom tias Yexus tusiav licas,#15:39: pom tias Yexus tusiav licas; tej phau ntawv qub uas xuas tes sau, muaj pom Yexus qw nrov-nrov thiab tusiav lawm. ces nws thiaj hais tias, “Tus no yeej yog Vajtswv tus Tub tiag!”

40Muaj ib cov pojniam tuaj sawv deb-deb ntsia. Ibtxhia ntawm cov pojniam ntawd yog Malis Madalas, Malis uas yog Yakaunpaus hluas thiab Yauxes niam, thiab Xalaumes. #Lukas 8:2-3 41Lawv yog cov uas ibtxwm raws thiab pab Yexus thaum Nws tseem nyob pem Kalilais. Muaj ntau tus pojniam uas nrog Yexus tuaj rau hauv Yeluxalees los kuj nyob ntawd thiab.

Log Yexus

(Mathais 27:57-61; Lukas 23:50-56; Yauhas 19:38-42)

42-43Thaum yuav tsausntuj, Yauxej uas yog neeg hauv lub nroog Alimathias txawm tuaj txog. Nws yog ib tug thawjcoj hauv lub Koomhaum qibsiab uas sawvdaws hwm, thiab yog ib tug uas tosntsoov Vajtswv lub Tebchaws yuav los. Hnub ntawd yog Hnub Npaj (uas yog ib hnub uantej Hnub Xanpataus), yogli ntawd, Yauxej thiaj ua lub siab tawv qhawv mus thov Philaj kom muab Yexus lub cev rau nws. 44Philaj txawm xav tsis thoob txog qhov uas nws hnov tias Yexus tuag lawm, nws thiaj hu tus thawj tubrog pawg pua los nug seb Yexus tuag lawm los tsis tau. 45Thaum tus thawj tubrog qhia rau Philaj hais tias muaj tseeb li ntawd lawm, Philaj thiaj tsocai muab Yexus lub cev rau Yauxej. 46Yauxej mus yuav ib chaws ntaub mag, nws muab Yexus lub cev txo, muab chaws ntaub mag qhwv thiab muab tso rau hauv ib lub qhovntxa uas twb yeej txaug tau rau hauv ib phab pobzeb lawm. Nws dov ib daim lagzeb loj los npog lub rooj ntxas cia. 47Malis Madalas thiab Malis uas yog Yauxes niam ntsiantsoov thiab pom qhov chaw uas coj Yexus lub cev mus log.

Currently Selected:

Malakaus 15: MWW2022

Highlight

Copy