Levis Kevcai 25
25
Xyoo Thib Xya
(2 Kevcai 15:1-11)
1Tus TSWV hais rau Mauxes saum lub Roob Xinais #Khiav 23:10-11 2kom hais rau cov Yixalayees tias, “Thaum nej mus nyob hauv lub tebchaws uas Kuv yuav muab rau nej, nej yuavtsum hwm tus TSWV los ntawm qhov uas nej yuav tsis cog qoobloo rau hauv tej liaj tej teb txhua-txhua xyoo thib xya. 3Nej siv rau lub xyoos cog qoobloo rau hauv nej tej liaj tej teb, tav nej tej txivhmab hauv nej tej vaj, thiab sau nej tej qoobloo los cia. 4Tiamsis xyoo thib xya yog xyoo uas cia tej liaj tej teb ntawd so, rauqhov yog xyoo so rau tus TSWV. Tsis txhob cog qoobloo rau hauv nej tej liaj tej teb thiab tsis txhob tav nej tej txivhmab hauv nej tej vaj. 5Tsis txhob mus hlais tej nplej uas nws tuaj nws hauv nej tej liaj tej teb uas nej tsis tau tseb, thiab tsis txhob mus de tej txivhmab uas nej tsis tau tav; lub xyoo ntawd yuavtsum cia rau thaj av tau so. 6Xyoo ntawd muaj dabtsi hlav thiab tuaj nyob rau hauv nej tej liaj tej teb, ces nej mus muab tej ntawd los rau nej noj, rau nej cov tubqhe, cov tubzog, cov neeg txawv tebchaws uas nrog nej nyob, 7tej tsiaj nyeg thiab tsiaj qus uas nyob hauv nej lub tebchaws tau noj. Txhua yam uas tuaj hauv tej liaj tej teb puavleej noj tau huv tibsi.
Xyoo Thim Tej Liaj-teb Rovqab
8“Nej suav xya xyoo xya zaus, tagnrho yog muaj plaubcaug-cuaj xyoos. 9Ces thaum lub xya hli ntuj hnub xiab kaum, uas yog Hnub ua Kevcai Theej Txhoj, nej yuav tau tso ib tug txivneej mus tshuab raj tshuab xyu ncig thoobplaws hauv nej lub tebchaws. 10Nej yuavtsum muab xyoo thib tsibcaug ntawd suav ua xyoo dawbhuv, thiab tshajtawm muab kev ywjpheej rau cov pejxeem sawvdaws hauv nej lub tebchaws. Xyoo ntawd, txhua yam uas raug muab muag lawm yuavtsum tau muab thim rovqab rau tus tswv qub lossis nws tej xeebntxwv, thiab txhua tus uas raug muab muag mus ua luag qhev lawm los yuavtsum tso lawv rovqab mus rau lawv tsev neeg. 11Xyoo thib tsibcaug ntawd, nej tsis txhob cog qoob rau hauv nej tej teb lossis hlais tej nplej uas nws tuaj nws lossis tsis txhob de tej txivhmab uas nej tsis tau tav hauv nej tej vaj txivhmab. 12Rauqhov xyoo ntawd, yog xyoo dawbhuv rau nej; nej tsuas noj tau tej uas nws tuaj nws hauv nej tej teb xwb.
13“Txhua yam uas raug muab muag lawm, xyoo ntawd yuavtsum tau muab thim rov rau tus tswv qub. 14Yogli ntawd, thaum nej muag nej tej teb rau nej cov kwvtij Yixalayees lossis nej yuav nws tej teb, nej tsis txhob ua tsis ncaj rau ib leeg twg. 15Saib daim teb ntawd seb tshuav pestsawg xyoo cog qoobloo uantej Xyoo uas thim Rovqab, ces tus muag daim teb ntawd tsuas yuav tus nqi rawsli ntawd xwb. 16Yog tias tseem tshuav ntau xyoo, ces tus nqi yuav siab, tiamsis yog tshuav tsawg xyoo lawm xwb, ces tus nqi yuav qis, rauqhov tsuas muag rawsli lub caijnyoog uas yuav cog tau qoobloo rau hauv daim teb lawm xwb. 17Ib leeg tsis txhob ua tsis ncaj rau ib leeg, tiamsis yuavtsum paub ntshai tus TSWV; Kuv yog tus TSWV uas yog nej tus Vajtswv.
Teebmeem Nyob Rau Xyoo Thib Xya
18“Nej yuavtsum ua rawsli Kuv tej kevcai thiab tej lus xaaj, nej thiaj yuav tau zoo nyob kajsiab lug hauv lub tebchaws. 19Lub tebchaws yuav ntsu qoobloo heev, nej yuav muaj noj muaj haus nplua-mias thiab tau zoo nyob kajsiab lug.
20“Tiamsis nej nug hais tias, ‘Xyoo thib xya ntawd yog peb twb tsis cog thiab tsis sau qoobloo li, es peb yuav noj dabtsi?’ 21Xyoo thib rau, Kuv yuav foom koobhmoov rau lub tebchaws kom ntsu qoob heev, kom txaus noj peb lub xyoos. 22Xyoo thib yim, thaum nej cog qoob rau hauv nej tej teb los nej tseem tau tej qoob uas thaum xyoo thib rau nej sau cia ntawd los noj, thiab nej tseem yuav muaj txaus noj mus txog xyoo thib cuaj uas nej hlais nej tej qoob tshiab ntawd thiab.
Thim Teb Thiab Vajtse Rovqab
23“Tsis txhob muab koj daim teb muag tuag rau luag, rauqhov koj tsis yog tus tswv; daim teb ntawd yog Kuv tug, koj tsuas zooli tus neeg txawv tebchaws uas nrog Kuv nyob xwb.
24“Thaum muab daim teb muag rau lwmtus lawm, tus tswv qub muaj cai txhiv daim teb ntawd rovqab los ua nws tug. 25Yog nej cov Yixalayees leejtwg txomnyem thiab raug yuam kom muab nws daim teb muag, nws cov kwvtij txheebze yuavtsum mus txhiv daim teb ntawd rovqab. 26Yog leejtwg tsis muaj kwvtij txheebze pab txhiv daim teb rovqab, tomqab uas nws muaj nyiaj txaus lawm, nws muaj cai txhiv rovqab. 27Nws yuavtsum suav txij xyoo uas nws muag daim teb mus txog Xyoo Thim seb tau pestsawg xyoo, nws yuavtsum them nyiaj ntxiv rau tus uas yuav nws daim teb. Nws thiaj yuav rov tau daim teb los ua nws tug. 28Tiamsis yog nws tsis muaj nyiaj txaus txhiv daim teb ntawd rovqab, ces daim teb ntawd tseem nyob ntawm tus tswv uas nws muab muag rau mus txog Xyoo Thim tej teb. Xyoo ntawd mam thim tau daim teb rov rau tus tswv qub.
29“Yog leejtwg muag nws lub tsev nyob hauv lub nroog uas muaj ntsayeej, thawj xyoo uas txwm nkaus ib xyoos rau hnub uas muag, nws muaj cai txhiv tau rovqab. 30Tiamsis yog nws tsis txhiv rovqab xyoo ntawd, ces nws tsis muaj cai txhiv rovqab lawm, lub tsev ntawd yog tus uas nws muab muag rau tug thiab nws tej xeebntxwv tug mus li lawm; txawm yog txog Xyoo Thim los yuav tsis thim lub tsev lawm. 31Tiamsis tej tsev uas nyob hauv tej zos uas tsis muaj ntsayeej thaiv, ces ua ib yam li tej teb; thaum txog Xyoo Thim tej teb thiab tej tsev, ces tus tswv qub muaj cai txhiv tej tsev ntawd rovqab.
32“Txawm yog licas los xij, cov Levis muaj cai txhiv lawv tej vajtse hauv tej nroog uas twb muab tu rau lawv lawm rovqab lub sijhawm twg los tau. 33Yog cov Levis leejtwg muab nws lub tsev hauv tej nroog uas tu ua lawv tug lawm muag thiab tseem tsis tau txhiv rovqab, thaum txog Xyoo Thim#25:33: Nqe no sau hais tias Yog… Xyoo Thim; paub tsis meej tias lolus Henplais yog txhais licas tiag txog qhov no. yuavtsum thim lub tsev ntawd rovqab, rauqhov tej tsev uas yog cov Levis tug uas twb yeej nyob hauv lawv tej nroog lawm, thiab lawv twb yog haivneeg Yixalayees ntag. 34Tiamsis tej teb uas nyob ibncig cov Levis tej nroog yuavtsum tsis txhob muab muag; tej ntawd yeej yog cov Levis tug mus ibtxhis li.
Qiv Nyiaj Rau Tus Pluag
35“Yog nej ib tug kwvtij Yixalayees uas nyob ze nej pluag thiab pab tsis tau nws tuskheej lawm, nej yuavtsum pab nws ib yam li tus neeg uas nej ntiav ua haujlwm, kom nws thiaj nrog nej nyob taus. #2Kev 15:7-8 36Tsis txhob tsub pajlaum rau nws them, tiamsis nej yuavtsum paub ntshai Vajtswv, thiab cia nej cov kwvtij Yixalayees nrog nej nyob. 37Tsis txhob tsub pajlaum rau nws them ntxiv rau tej nyiaj uas nej qiv rau nws, thiab tsis txhob muab nej tej qoob muag ua nqi kim-kim rau nws. #Khiav 22:25; 2Kev 23:19-20 38Kuv yog tus TSWV, uas yog nej tus Vajtswv, uas coj nej tawm hauv tebchaws Iziv los, kom Kuv thiaj muab tau lub tebchaws Kana-as no rau nej nyob thiab yog nej tus Vajtswv.
Tso Tej Tubqhe
39“Yog ib tug kwvtij Yixalayees uas nrog nej nyob pluag heev thiab nws muab nws muag ua nej qhev, nej tsis txhob muab nws ua haujlwm ib yam li ib tug qhev. #Khiav 21:2-6; 2Kev 15:12-18 40Nws nrog nej nyob ib yam li tus neeg uas nej ntiav ua haujlwm, thiab nws tsuas ua haujlwm rau nej mus txog Xyoo Thim xwb. 41Lub sijhawm ntawd, nej yuavtsum tso nws thiab nws cov menyuam rov mus nrog nws tsev neeg nyob thiab mus tuav nws tej yawgkoob tej qubtxeeg qubteg. 42Vim haivneeg Yixalayees yog Kuv cov tubtxib, uas Kuv tau coj lawv tawm hauv tebchaws Iziv los, yuavtsum tsis txhob muab lawv muag mus ua qhev. 43Nej tsis txhob tswjhwm lawv los ntawm txoj kev nrujtsiv thiab tsimtxom, tiamsis yuavtsum paub ntshai nej tus Vajtswv. 44Yog nej xav tau tubqhe thiab ntxhais qhev, nej mus yuav ntawm lwm haivneeg uas nyob puagncig nej. 45Nej muaj cai mus yuav tej neeg txawv tebchaws uas nrog nej nyob tej menyuam uas yeej yog yug hauv nej lub tebchaws los ua nej tug. 46Nej muaj cai ceev lawv cia ua qubtxeeg qubteg rau nej tej tubki los yeej tau. Lawv yuav ua haujlwm rau nej mus tag lawv simneej, tiamsis nej yuavtsum tsis txhob tswjhwm lawv los ntawm txoj kev nrujtsiv thiab tsimtxom.
47“Pivxam hais tias muaj ib tug neeg txawv tebchaws nrog nej nyob, nws muajtxiag npluanuj heev, tiamsis nej cov kwvtij Yixalayees muaj ib tug pluag heev ces nws txawm muab nws muag rau tus neeg txawv tebchaws ntawd lossis tus npluanuj ntawd ib tug kwvtij. 48Tomqab uas nws muab nws muag tag lawm, nws cov kwvtij tseem muaj cai txhiv tau nws rovqab; nws cov tijlaug, cov kwv, 49cov dablaug, cov txivntxawm, cov kwvtij uas yog tij-tub kwv-tub, lossis lwmtus kwvtij uas txheebze muaj cai txhiv nws; lossis yog nws khwv tau nyiaj txaus, nws muaj cai txhiv nws rovqab. 50Nws yuavtsum mus nrog tus uas yuav nws ntawd sablaj, thiab nkawd suav txij xyoo uas nws muab nws muag los txog rau Xyoo Thim thiab yuavtsum kom tus nqi uas txhiv nws ntawd kom npaum li tej nqi uas ntiav ib tug tubzog. 51-52Yog tseem tshuav ntau xyoo, nws yuavtsum thim tej nqi uas nws tshuav ntawd ib feem rovqab rawsli cov xyoo uas tseem tshuav ntawd, 53ib yam li yog tus tswv ntawd ntiav nws ua haujlwm ib ntus xwb. Nws tus tswv yuavtsum tsis txhob ua limhiam rau nws. 54Yog nws tsis txhiv nws rawsli uas hais los no, txog Xyoo Thim, tus tswv yuavtsum tso nws thiab nws cov menyuam mus. 55Cov neeg Yixalayees yuav ua tsis tau leejtwg qhev mus li, rauqhov lawv yog Kuv cov tubtxib uas Kuv tau coj lawv tawm hauv tebchaws Iziv los. Kuv yog tus TSWV, uas yog nej tus Vajtswv.”
Currently Selected:
Levis Kevcai 25: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
