Levis Kevcai 26
26
Koobhmoov Rau Tus Mlooglus
(2 Kevcai 7:12-24; 28:1-14)
1Tus TSWV hais tias, “Tsis txhob puab mlom lossis puab mojzeeg pobzeb, tsa ncej zeb lossis txaug pobzeb tso rau hauv nej lub tebchaws rau nej pehawm. Kuv yog tus TSWV, uas yog nej tus Vajtswv. #Levi 19:4; Khiav 20:4; 2Kev 5:8; 16:21-22; 27:1 2Nej yuavtsum ceev Kuv cov hnub Xanpataus thiab hwm qhov chaw uas pehawm Kuv. Kuv yog tus TSWV.
3“Yog nej ua neej rawsli Kuv tej kevcai thiab hwm Kuv tej lus xaaj, #2Kev 11:13-15; 28:1-4 4Kuv yuav tso nag los rau nej raws caij raws nyoog, kom daim av thiaj ntsu qoobloo thiab tej txivntoo thiaj yuav txitxiv ncw. 5Nej tej qoobloo yuav zoo heev ua rau nej muaj nplej hlais mus txog thaum lub caij de txivhmab, thiab nej yuav de txivhmab mus txog thaum lub caij uas nej cog qoob. Nej yuav muaj noj muaj haus nplua-mias, thiab nej yuav tau zoo nyob kajsiab lug hauv nej lub tebchaws.
6“Kuv yuav pub kom nej lub tebchaws muaj kev thajyeeb, nej yuav tau zoo pw tsaugzog thiab tsis muaj leejtwg yuav ua rau nej ntshai. Kuv yuav muab tej tsiaj nyaum hauv lub tebchaws ua kom tu noob mus, thiab yuav tsis muaj kev tsov kev rog nyob hauv lub tebchaws li. 7Nej yuav kovyeej nej cov yeebncuab. 8Nej tsib leeg yuav kovyeej 100 leej, thiab nej 100 leej yuav kovyeej 10,000 leej.
9“Kuv yuav foom koobhmoov rau nej thiab pub kom nej muaj tubki coob heev; Kuv yuav ua rawsli Kuv tej lus cogtseg uas Kuv tau nrog nej sib coglus lawm. 10Nej yuav sau tau qoobloo ntau nplua-mias txaus nej noj thawm niaj thawm xyoo; nej tseem yuav tau muab tej qoob qub uas seem noj tsis tag yawm povtseg mas thiaj yuav muaj chaw txaus ntim tej qoob tshiab. 11Kuv yuav nrog nej nyob hauv Kuv lub Tsevntaub uas dawbhuv, thiab Kuv yuav tsis ntxub nej ib zaug li. 12Kuv yuav nrog nej nyob; Kuv yuav yog nej tus Vajtswv, thiab nej yuav yog Kuv haivneeg. #2Klt 6:16 13Kuv yog tus TSWV, uas yog nej tus Vajtswv uas coj nej tawm hauv lub tebchaws Iziv los, kom nej thiaj tsis tau ua qhev ntxiv lawm. Kuv twb muab nej tej quab lov povtseg thiab cia nej tsa taus taubhau mus kev lawm.”
Rautxim Rau Kev Tsis Mlooglus
(2 Kevcai 28:15-68)
14Tus TSWV hais tias, “Yog nej tsis mloog Kuv tej lus xaaj, nej yuav raug txim. #2Kev 28:15-68 15Yog nej tsis ua raws Kuv tej kevcai thiab Kuv tej lus xaaj, thiab tsis coj rawsli Kuv tau coglus tseg rau nej lawm, 16Kuv yuav rautxim rau nej. Kuv yuav tso kev puastsuaj los rau nej, tej kab mob uas kho tsis zoo thiab tej kab mob npaws yuav ua rau nej digmuag thiab ua rau nej yuav tuag suajkaum zujzus. Nej cog qoobloo, tiamsis nej yuav tsis tau noj, rauqhov nej tej yeebncuab yuav kovyeej nej thiab yuav noj tej qoob uas nej cog ntawd. 17Kuv yuav tawmtsam nej, nej yuav swb, thiab cov neeg uas ntxub nej yuav ua cov tswj nej; txawm yog tsis muaj leejtwg caum nej li los nej yuav ciali khiav vim nej ntshai heev.
18“Tomqab uas nej raug tej xwmtxheej no tag lawm, yog nej tseem tsis mloog Kuv lus thiab, Kuv yuav rautxim rau nej kom hnyav tshaj qhov qub xya npaug ntxiv. 19Kuv yuav rhuav nej lub hwjchim khavtheeb kom puastsuaj mus, yuav tsis tso nag los, ua rau nej lub tebchaws qhuav tawv cuag hlau. 20Nej yuav khwv kawg nej lub zog los tsis muaj qabhau rau nej, rauqhov nej lub tebchaws yuav tsis zoo qoob thiab tej txivntoo los yuav tsis txitxiv.
21“Yog nej tseem pheej tawmtsam Kuv thiab tsis kam mloog Kuv lus, Kuv yuav tsub kev rautxim rau nej xya npaug ntxiv. 22Kuv yuav tso tej tsiaj qus uas nyaum heev los tawmtsam nej; tej tsiaj ntawd yuav tom nej cov menyuam, tom nej tej tsiajtxhu, ua rau nej tshuav tsawg heev, txawm yog nej tej kev los yuav ciaj quavpoj tas.
23“Tomqab tej kev rautxim no dhau lawm, yog nej tseem tsis mloog Kuv lus thiab tseem pheej rausiab ntso tawmtsam Kuv ntxiv, 24Kuv yuav tawmtsam nej thiab rautxim rau nej kom hnyav tshaj qhov qub uas tag los lawm xya npaug ntxiv. 25Kuv yuav coj kev tsov kev rog tuaj rau nej thiab rautxim rau nej vim nej rhuav Kuv tej lus cogtseg; txawm yog nej sibsau mus nyob hauv nej tej nroog kom nej muaj kev kajsiab los Kuv yuav tso tej mob phem los raug nej, thiab yuav muab nej cob rau nej cov yeebncuab tes. 26Kuv yuav txiav nej txoj kev noj kev haus kom tu mus, kaum leej pojniam yuav koom ib lub qhovtxos cub tej mov uas lawv muaj lawm xwb. Lawv yuav muab cov mov ntawd los luj sibfaib, thiab thaum nej noj tag los tsis tsau li.
27“Tomqab tej no dhau lawm, yog nej tseem pheej tawmtsam Kuv thiab tsis mloog Kuv lus, 28Kuv yuav chim rau nej thiab yuav rautxim rau nej hnyav tshaj qhov qub xya npaug ntxiv. 29Nej yuav muaj kev tshaib nqhis loj heev, txog qhov uas nej yuav ciali muab nej tej tub tej ntxhais noj. 30Kuv yuav rhuav tshem nej tej chaw pe dab saum tej ncov roob, muab nej tej thaj uas hlawv hmoov tshuaj tswqab tsoo povtseg, thiab muab nej lub cev uas tuag lawm pov rau saum nej tej mlom uas yog mlom tuag; Kuv yuav ntxub nej heev. 31Kuv yuav ua kom nej tej nroog puastsuaj tag, Kuv yuav rhuav tshem nej tej chaw pe mlom kom puastsuaj, thiab yuav tsis txais nej tej khoom fij uas tswqab ntxiag ntawd. 32Kuv yuav rhuav kom nej lub tebchaws puastsuaj tag, ua rau nej cov yeebncuab uas tuaj txeeb tau nej lub tebchaws xav tsis thoob li. 33Kuv yuav coj kev tsov kev rog tuaj rau nej kom nej tawg uasab uasua mus nrog tej neeg txawv tebchaws nyob. Nej lub tebchaws yuav ciaj nrojtsuag, thiab nyob puasntsoog cia. 34-35Ces nej lub tebchaws yuav zoosiab rau ntau xyoo uas tau so vim nej tsis ncua kom nws tau so; nej lub tebchaws yuav tau zoo so thaum nej raug ntiab tawm mus nyob rau hauv nej cov yeebncuab lub tebchaws.
36“Kuv yuav ua kom nej cov uas raug ntiab tawm mus nyob hauv nej cov yeebncuab lub tebchaws ntawd ntshai heev, txawm yog tej suab cua ntsawj ib nyuag daim nplooj ntoos nrov xwb los nej yuav khiav tsis saib qab. Nej yuav khiav cuag li muaj neeg caum nej hauv tshavrog, txawm yog tub tsis muaj yeebncuab nyob ze nej li, los nej yuav ciali ntog zomzaws. 37Txawm yog twb tsis muaj leejtwg caum nej li, los nej ib leeg ciali dawm ib leeg ntog, thiab nej yuav tsis muaj cuabkav sawv tawmtsam nej cov yeebncuab hlo li. 38Nej yuav tuag tag rau hauv luag teb luag chaw, nej cov yeebncuab lub tebchaws yuav muab nej nqos tag huv tibsi. 39Nej tus puav uas tseem seem nyob rau hauv nej cov yeebncuab lub tebchaws, los ciali yuav sem zujzus mus vim nej tej kev txhaum thiab nej cov yawgkoob tej kev txhaum.
40“Tiamsis yog tias nej cov xeebntxwv lees lawv tej kev txhaum thiab lawv cov yawgkoob tej kev txhaum, uas lawv tau tawmtsam Kuv thiab ntxeevsiab rau Kuv, 41es ua rau Kuv muab lawv ntiab mus nyob rau hauv lawv cov yeebncuab lub tebchaws; yog tias thaum kawg, lawv txo lawv lub siab thiab nyob lawv lub txim tag lawm, 42Kuv yuav nco txog tej uas Kuv tau coglus tseg rau Yakhauj, Ixaj thiab Anplahas lawv, thiab Kuv yuav rov nco txog lub tebchaws uas Kuv twb muab rau Kuv haivneeg lawm. #Chiv 28:13-14; Chiv 26:3-4; Chiv 17:7-8 43Tiamsis cov neeg hauv lub tebchaws ntawd yuavtsum xub tawm uantej, kom lub tebchaws tau so. Lawv yuavtsum nyob lawv lub txim kom tag, vim qhov uas lawv tsis kam ua rawsli Kuv tej kevcai thiab tej lus xaaj. 44Txawm li ntawd los xij, thaum lawv tseem nyob hauv lawv cov yeebncuab lub tebchaws, Kuv yuav tsis tso lawv tseg lossis ntxub lawv lossis rhuav kom lawv puastsuaj tu noob. Kuv yuav tsis rhuav lolus uas Kuv cogtseg rau lawv lawm, rauqhov Kuv yog tus TSWV, uas yog lawv tus Vajtswv. 45Kuv yuav rov coglus li Kuv tau coglus rau lawv cov yawgkoob thaum uas Kuv qhia Kuv lub hwjchim rau txhua haivneeg los ntawm qhov uas Kuv coj Kuv haivneeg tawm hauv tebchaws Iziv los, kom Kuv, uas yog tus TSWV, thiajli yog lawv tus Vajtswv.”
46Tagnrho tej no puavleej yog tej kevcai thiab tej lus xaaj uas tus TSWV tau muab rau Mauxes saum Roob Xinais, kom muab qhia rau cov neeg Yixalayees.
Currently Selected:
Levis Kevcai 26: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
